Bu gün ön cəbhədə düşmənlə döyüşən, erməni terrorçularına qan udduran Azərbaycan Ordusuna ictimaiyyət tərəfindən ən müxtəlif formalarda böyük dəstək verilir. İctimaiyyətimiz ordu ilə ciddi həmrəylik nümayiş etdirir, əsgərlərimizi, ordumuzu ruhlandıran davranışlar göstərir.
Şəhərimizin hər yerində, ali məktəblərin önündən, yaşayış binalarından, sakinlərin pəncərə və eyvanlarından, məscidlərdən və sairdən Azərbaycanın üçrəngli bayrağı asılır, ictimai nəqliyyat vasitələrinin, şəxsi avtomobillərin pəncərələrinə bayraqlar, şəhid qəhrəmanlarımızın şəkilləri, orduya, əsgərlərimizə yönəlik ruhlandırıcı, vətənpərvərlik ruhu aşılayan plakatlar vurulur, uşaqlar, yeniyetmələr küçələrdə, meydanlarda kollektiv vətənpərvərlik mahnıları oxuyurlar, sosial şəbəkələrdə vətənpərvərliyi təbliğ edən videolar yayırlar. Əlbəttə, bütün bunlar Azərbaycan ictimaiyyətinin ordumuza könüllü dəstək verməsinin, ordumuzla həmrəylik nümayiş edirməsinin nümunələridir.
Bu gün gənclər şəhərin müxtəlif yerlərində sakinlərə Azərbaycanın üçrəngli bayrağını paylamaqla ordumuza dəstək göstərirlər. Belə aksiyalar, demək olar ki, son günlər ayrı-ayrı könüllü gənclər tərəfindən intensiv olaraq keçirilir. Bütün bu göstəricilər cəmiyyət və ordu birliyinin bayraq müqəddəsliyi ilə ayrılmaz vəhdətinin təzahürüdür.
Qafqazın ən böyük məscidlərindən olan Heydər Məscidi də ordumuza böyük dəstək nümayiş etdirir, orduya diqqətçəkən jestlər edir. Belə ki, məsciddən Azərbaycan bayrağı asılıb, üçrəngli bayrağımız müqəddəs məkanda əzəmətlə dalğalanır. Heydər Məscidinin imamı Hacı Rüfət Qarayev bizimlə söhbətində bildirdi ki, üçrəngli bayrağımızın məscidin ən görkəmli yerindən asılması məscidin, din xadimlərinin, inanclı insanların ordumuzla həmrəylik nümayiş etdirməsi məqsədi daşıyır.
“Bu gün hamımız həyəcanla qələbə xəbərlərini gözləyirik”
Vətəndaş Cəmiyyəti Alyansının rəhbəri, Yeni Yazarlar və Sənətçilər İctimai Birliyinin sədri, analitik-ekspert, yazıçı-kulturoloq Aydın Xan Əbilov “Bakı-Xəbər”ə bildirdi ki, illərdir bu günü – üçrəngli bayrağımızın işğaldan azad edilən yurd yerlərimizdə dalğalanması anlarını gözləmişik. A.X.Əbilovun sözlərinə görə, ordumuzun düşmən üzərində qazandığı qələbələr ictimaiyyəti həddindən artıq sevindirib. “Bu gün Azərbaycan ictimaiyyəti, xalqı ordumuzla həmrəylik nümayiş etdirir və orduya diqqətçəkən jestlər edir. Hər bir insan çalışır ki, bayrağımızı evlərdən, ictimai yerlərdən, avtomobillərdən asmaqla ordumuza, hərbçilərimizə dəstək versin, onları daha da qələbəyə ruhlandırsın. Bu gün hamımız həyəcanla qələbə xəbərlərini gözləyirik. Azərbaycan xalqı tam varlığı ilə ordumuzun yanındadır. Ali Baş Komandanın qətiyyətli addımları, ordumuzun döyüşkənliyi və qəhrəmanlığı, hərbçilərimizin, generallarımızın, zabitlərimizin Qarabağ cəbhəsində göstərdiyi igidlik, hünər, düşmən üzərində bir-birinin ardınca qazandığı zəfərlər ictimaiyyətin, vətəndaşlarımızın vətənpərvərlik hisslərini bütün hisslərdən üstün edib. Bayraq ulu babalarımızın, nənələrimizin yadigarı, mirası, xalqımızın ruhunun obrazlı ifadəsidir. Ona görə də bütün Bakı, bütün Azərbaycan, dünya azərbaycanlılarının yaşadığı yerlər, şəhərlər Azərbaycan bayrağına qərq olub. Bu gün Azərbaycan bayrağını insanlarımız harada yaşamasından asılı olmayaraq, evlərindən, ofislərindən, maşınlarından asmaqla, hətta geyimlərində nümayiş etdirməklə ordumuza öz dəstəklərini, ordu ilə həmrəyliklərini ifadə edirlər.
İnsanlarımız şəhidlərimizin portretlərini, şəkillərini maşınlarına vururlar, bu da şəhidlərimizin, vətən uğrunda canını fəda edən qəhrəmanlarımızın unudulmadığını göstərir. Şəhidlərimiz qəlbimizdə yaşayır, onların uşaqlara və gənc nəslə tanıdılması üçün ictimaiyyət özü böyük təbliğat aparır. Azərbaycan ictimaiyyəti ordumuza bu dəstək jestlərini ən müxtəlif forma və üsullardan istifadə etməklə göstərir. Bu üsulların da hamısı bir-birindən maraqlıdır”.
A.X.Əbilovun sözlərinə görə, ölkə ziyalıları da, ictimai fəallar da, ictimai qurum rəhbərləri də o dəstəyi daha geniş mənada inkişaf etdirmək üçün bayraqla, vətənpərvərlik aşılayan digər vasitələrlə, ordu və xalq arasındakı həmrəyliyi ifadə edən digər örnəklərlə əlaqədar layihələr həyata keçirməlidirlər.
Özündə 50-yə qədər qurumu birləşdirən Vətəndaş Cəmiyyəti Alyansı tərəfindən Ali Baş Komandanı, Müdafiə Nazirliyini, ordumuzu, hərbçilərimizi dəstəkləmək üçün geniş tədbirlər planı hazırlandığını deyən A.X.Əbilov qeyd etdi ki, həm sosial mediada, həm də real aləmdə üçrəngli bayraq başımızın üzərində, “Qarabağ Azərbaycandır” qəlbimizdə və dilimizdə çıxışlar edirlər, gənclərimizi, əhalimizi, eyni zamanda, bütün bizi istəyənləri sevindirən işlər görür, düşmənlərimizi ideoloji və informasiya savaşında uduzduran addımlar atırlar.
İradə SARIYEVA
