Azərbaycanda koronavirus pandemiyası ilə bağlı tətbiq olunan karantin rejimi ilə əlaqədar təxirə düşən əsas tədbirlər arasında toy və yas mərasimləri xüsusi yer tutur. Artıq 7 aydan çoxdur ki, bu qadağa qüvvədədir.
Ekspertlər pandemiyadan sonra şan-şöhrətli toy məclislərinin sadə nikahla əvəz olunmasını təklif edir, yas məclislərinin tamamilə ləğv olunmasının tərəfdarıdırlar.
Azər Badamov: “Yas mərasimləri ləğv olunsa yaxşı olar”
Millət vəkili Azər Badamov bildirdi ki, koronavirusa qarşı mübarizə qlobal pandemiya elan olunan ilk gündən qarşımızda duran bir nömrəli vəzifədir. Dövlət bütün imkanlarını bu mübarizəyə səfərbər edib. Nazirlər Kabineti yanında yaradılmış Operativ Qərargah ölkədə gündəlik COVID-19-a yoluxma dinamikasını təhlil edərək, çox ciddi qərarlar qəbul etdi, müəyyən məhdudiyyətlər tətbiq olundu: “O cümlədən, toy və yas mərasimlərinin keçirilməsi qadağan olundu. Məhz dövlətin vaxtında qəbul etdiyi qərarlar, tətbiq olunan məhdudiyyətlər, qərarların icrasına ciddi nəzarət və insanların bu işə məsuliyyətlə yanaşması uğurlu nəticələrin əldə olunmasına imkan verdi. Bu gün isə çoxlu məhdudiyyət ləğv edilib və qüvvədə qalan məhdudiyyətlərin də yumşaldılması ətrafında danışılmaqdadır. O cümlədən, mətbuatda ən çox müzakirə toy və yas mərasimlərinə tətbiq olunan qadağaların yumşaldılması ilə bağlıdır”.
Millət vəkili hesab edir ki, yas mərasimləri ləğv olunsa yaxşı olar: “Rəhmətə gedən şəxsin dəfnindən sonra günlərlə təmtəraqlı yas mərasimləri keçirilməsinin torpağın altında əbədi yatan insana heç bir aidiyyəti yoxdur. İnsan öldü, dəfn olundu, başsağlığı verildi və onunla da mərasim bitməlidir. Kimlərin vaxtı varsa və dəfn mərasimində iştirak etmək, rəhmətə gedənin sahibinin yanında olmaq, ona səbr diləmək istəyi varsa, dəfn mərasimində iştirak edib bildirməlidir. Kimlərin isə dəfn günündə buna imkanı çatmır və başsağlığı vermək istəyirsə, bunu telefonla zəng edib və ya qəzetdə başsağlığı verməklə kifayətlənməlidir. Yoxsa, qonşudan geridə qalmayaq təfəkkürü ilə, imkanı oldu-olmadı, günlərlə yas məclislərinin təşkil edilməsinə nə ehtiyac var? Bunu imkanı olanlar üçün də bir fiziki yük hesab edirəm. İmkanı olanlar günlərlə yas məclisini keçirməklə, adətdir deyə, bütün işlərini buraxıb mərasimin keçirilməsi ilə məşğul olur, maddi imkanı olmayanlar isə qonşusunu görüb, borca-xərcə düşüb, məclis keçirir və sonra aylarla borcun altından çıxa bilmir”.
Eyyub Hüseynov: “Təntənəli toy mərasimləri pandemiyadan sonra da davam etməməlidir”
Azad İstehlakçılar Birliyinin (AİB) sədri Eyyub Hüseynov qeyd etdi ki, pandemiyadan sonra toylar mütləq təxirə salınmalı və yaxud sadə bir mərasim təşkil olunmalıdır. Yəni ev şəraitində ailə üzvləri ilə keçirilə bilər. Yas mərasimləri birmənalı şəkildə dayandırılmalıdır: “Ümumiyyətlə, təntənəli toy mərasimləri pandemiyadan sonra da davam etməməlidir. Kiçik toy məsələsinə gəlincə, çox lazımsız bir məsələdir. Hətta bir övladı olan adamlar da kiçik toy məclisi etməməlidirlər. Toylarda gərəksiz yerə israfçılığa yol verirlər. Mən tərəfdarıyam ki, bu məsələ həll olunsun. Çünki regionlardakı monitorinqlər göstərdi ki, koronavirus yenidən yayıla bilər”.
Günel CƏLİLOVA
