Bakıda “Mamajon” və “Foqalyan” restoran adları ətrafında qızğın sosial şəbəkə müzakirələri başlayıb...
Azərbaycan Respublikasının qanunvericiliyinə əsasən, bütün xidmət sahələrində adlar ana dilində olmalıdır. Zəruri hallarda adlarda, reklam lövhələrində ana dili ilə yanaşı, əcnəbi dildən istifadə oluna bilər. Ancaq bir şərt var ki, əcnəbi ad anadilli adın yanında daha kiçik şəkildə yazılmalıdır.
Qanunun bu şəkildə olmasına baxmayaraq, buna əksər restoran, kafe riayət etmir. Onu da qeyd edək ki, bəzi sahibkarlar milli, tarixi yaşadan adlardan çox, əcnəbi isimlərə üstünlük verirlər. Ümumiyyətlə, mağazalara, restoran və kafelərə verilən adlar çox zaman standartlara uyğun gəlmir. Bir vaxtlar tarixi şəxsiyyətlərimizin, qədim şəhərlərimizin, hətta işğal altında olan ərazilərimizin adları verilirdisə, indi obyekt sahibləri başqa bir yol tutublar. Belə ki, şəhərin iki mərkəzi yerindəki restoran adlarını sakinlər, sosial şəbəkə istifadəçiləri ikrahla qarşılayıblar. “Mamajon” və “Foqalyan” adlı restoranlar insanın ağlına fərqli fikirlər gətirir. Ekspertlərin bildirdiyinə görə, “Mamajon” və “Foqalyan” adı erməni adına bənzəyir.
- “Öz dilimizdə ictimai iaşə obyektlərinə veriləcək kifayət qədər ad olduğu halda, çox təəssüf ki, bunu bəziləri nəzərə almaq istəmirlər”
Məsələ ilə bağlı fikir bildirən dilçi-alim Nizami Hüseynov qeyd etdi ki, Azərbaycan dilinin işləkliyinin təmin olunması olduqca vacibdir və bu qaydalara əməl etmək hər bir sahibkarın borcudur. “Öz dilimizdə ictimai iaşə obyektlərinə veriləcək kifayət qədər ad olduğu halda, çox təəssüf ki, bunu bəziləri nəzərə almaq istəmirlər. Ümumiyyətlə, restoranlara, şadlıq evlərinə, otellərə, eləcə də digər ictimai iaşə obyektlərinə milli adların verilməsini tövsiyə edərdim. Əlbəttə, ictimai iaşə obyektlərinə gəlmə adların qoyulmasını uyğun hesab etmək olmaz. Biz bunu qəbul etmirik. Həmişə çalışmalıyıq ki, bu cür obyektlərə özümüzə aid adlar qoyulsun. “Mamajon” Orta Asiya adına oxşayır. “Foqalyan” isə, ümumiyyətlə, yolverilməzdir. Bu restoranı işlədənlərin, çox güman, ermənilərlə əlaqəsi var. Belə hallar yolverilməzdir və ciddi araşdırma aparılmalıdır”.
Günel CƏLİLOVA
