Azərbaycanı istəməyən qara qüvvələrin ölkəmizə qarşı təxribatı ən müxtəlif formalarda özünü göstərir. Düşmənlərimiz indi də məscidlərimizi hədəfə alıb və həqiqətə uyğun olmayan şayiələr, dezinformasiyalar yaymaqla məşğul olurlar.
Bu günlərdə “Tik-tok” sosial şəbəkəsində bir qrup gəncin Heydər Məscidində guya futbol oynamasını əks etdirən videogörüntü yayılıb. Guya ki, bir qrup gənc sözügedən məsciddə futbol oynayıb (?).
Hacı Rüfət Qarayev: “...Azərbaycandakı heç bir məscidə aid deyil”
Heydər Məscidinin imamı Hacı Rüfət Qarayev “Bakı-Xəbər”ə bildirdi ki, həmin görüntülərin Heydər Məscidi ilə heç bir əlaqəsi yoxdur: “Videoda gördüyünüz görüntü Heydər Məscidi adı ilə paylaşılsa da, bura nəinki Heydər Məscidi, hətta Azərbaycandakı heç bir məscidə aid deyil.
Məscidin kollektivi adından bu kimi addımları pisləyir, Azərbaycan dindarlarının və eyni zamanda dindar olmayan insanlarının da hər zaman məscidlərimizin ehtiramını saxladığını bilirik”.
Ekspertlər qeyd edirlər ki, məscidin adının bu şəkildə hallandırılması, onun qaralanması, birmənalı olaraq, Azərbaycanı istəməyən qüvvələrin işidir. Məsələ burasındadır ki, ekspertlər bunun işğalçı Ermənistanın xüsusi xidmət orqanlarının işi olduğunu deyirlər. Bundan başqa, məlumdur ki, ermənilər sosial şəbəkələrdə və internet platformalarında “azərbaycanlı” adı ilə hesablar açır, domenlər alırlar, bunun üzərindən isə ölkəmizə qarşı təxribatlarla məşğul olurlar. Bu işdə ermənilərin əli olduğunu istisna etməyən ekspertlər hesab edirlər ki, cəbhədəki vəziyyətlə əlaqədar olaraq ermənilər və bizi istəməyən digər qüvvələr Azərbaycan cəmiyyətində qarışıqlıq yaratmaq istəyirlər.
Hacı Fuad Nurullayev: “Bu təxribatdır”
Qafqaz Müsəlmanları İdarəsininin sədr müavini hacı Fuad Nurullayev “Bakı-Xəbər”ə bildirdi ki, bu, düşmən təxribatıdır, bunun başqa adı yoxdur. Bunun montaj olduğunu deyən F.Nurullayev hesab edir ki, bu videonu hazırlayıb yayanların məqsədi cəmiyyətimizdə təxribatlar törətmək, qarşıdurma yaratmaqdır. “Mən videoya diqqətlə baxdım. Bu montajdır. Məscidin imamı da düzgün açıqlama verib. Cəbhədəki vəziyyət, düşmənin atdığı addımlar məlumdur. Eyni zamanda da pandemiya dövrüdür. Bəzi qüvvələr belə saxta videolar hazırlayıb yaymaqla cəmiyyətdə qarışıqlıq yaratmaq, insanları başqa-başqa məqsədlərə yönəltmək istəyirlər. Onlar xalq arasında çaxnaşma, qarşıdurma yaratmaq istəyən qüvvələrdir. Bu, birbaşa təxribatdır, montaj vasitəsilə hazırlanan görüntüdür. Sadəcə, insanlar ayıq olmalıdırlar, belə təxribatlara getməsinlər, inanmasınlar. Bu, mümkün olmayan haldır ki, Azərbaycanda hansısa bir məscidin içində bu cür hal baş versin. Belə bir şey ölkəmizdə mümkün olmayan bir məsələdir. Təxribatdır.
Bir məsələni də qeyd edim ki, Heydər Məscidində mehrabın iki tərəfində mənbər yoxdur, bir tərəfində mənbər var. Heydər Məscidində böyük ala qapı var, o da bu təxribatçı videoda yoxdur. Hesab edirəm ki, hansısa məscidlə uşaqların futbol oynamasını montaj ediblər. Yenə də deyirəm, bu təxribatdır” - deyə F.Nurullayev qeyd etdi.
Hacı Təyyar Hüseynli: “...Azərbaycanda olan dini mühitə qarşı xüsusi düşünülmüş bir addımdır”
İlahiyyatçı hacı Təyyar Hüseynli də bizimlə söhbətində Heydər Məscidinin adının bu şəkildə hallandırılmasının qəbuledilməz olduğunu qeyd etdi. T.Hüseynlinin sözlərinə görə, bu, Azərbaycanı istəməyən qüvvələrin təxribatıdır və xalqımız bu təxribata uymamalıdır. “Bu videonu mən də gördüm və çox qeyzləndim. İndiki həssas dönəmdə kimlərinsə Heydər Məscidinə ləkə yaxmaq cəhdlərini qəbul etmək olmaz. Bütün Qafqazda, dünyada tanınan, Azərbaycan üçün böyük əhəmiyyəti, dəyəri, çəkisi olan bir məscidin qaralanmasını narahatlıqla qarşıladım. Bu təxribatdır. Hesab edirəm ki, Heydər Məscidinin qara qüvvələr tərəfindən hədəfə alınması bütün İslam dünyasına, Azərbaycanda olan dini mühitə qarşı xüsusi düşünülmüş bir addımdır, təxribatdır. Əlbəttə, bu da cəmiyyətdə, ölkədə qarışıqlıq yaratmağa hesablanıb. Özü də bu məscidi məqsədli şəkildə seçiblər və onunla bağlı həqiqəti əks etdirməyən bir görüntü yayıblar. Biz ayıq-sayıq olmalıyıq, düşmən təxribatına uymamalıyıq. Bu həssas dönəmdə bizdən bu tələb olunur”. T.Hüseynli bildirdi ki, o, Heydər Məscidinin rəhbərliyini, axundlarını və imamlarını şəxsən tanıyır, onların hamısı dininə, dövlətinə, xalqına sədaqətlə xidmət edən insanlardır. “Onlar məsciddə çox nümunəvi mənəvi-dini mühit yaradıblar. Bu məsciddə əvvəlcədən məzhəbçilik məsələləri olmayıb, yoxdur. Həqiqətən də məzhəblərarası münasibətlərdə tolerantlıq modelini seçiblər. Kiminsə Heydər Məscidinə qarşı belə əsassız ittiham irəli sürməsi məni çox narahat etdi. Ona görə də münasibət bildirməyi özümə borc bildim” - deyə müsahibimiz vurğuladı.
Yazını çapa hazırlayarkən redaksiyamıza bir video daxil oldu. Türkiyə telekanallarından birində yayımlanan həmin videoda göstərilir ki, bu ölkədə yerləşən Hacı Yasin Kaplan Məscidində bir qrup uşaq futbol oynayıb və onların bu davranışına sosial media tərəfindən ciddi etirazlar edilib. Həmin süjetdə qeyd edilir ki, Hacı Yasin Kaplan Məscidində baş verən futbol oyunu bir vətəndaş tərəfindən mobil telefon vasitəsilə lentə alınıb və sosial şəbəkələrdə paylaşılıb, sosial şəbəkə istifadəçiləri isə olaya münasibət bildirərək məscidin içində futbol oynanılmasını üzüntü ilə qarşıladıqlarını bildiriblər. Görüntüdə bir tərəfdə iki komandaya bölünən uşaqlar futbol oynayır, digər tərəfdə isə insanlar namaz qılırlar.
Biz həmin videonun əslini də, Heydər Məscidi ilə bağlı hazırlanan təxribatçı videonu da sizə təqdim edirik.
İradə SARIYEVA
Saxa
Videonun əsli
