Vüqar Müfidzadə: “Balaxanıda ekoloji problemlər artıq aradan qaldırılıb”
Bir vaxtlar neft gölməçələri və geniş zibilliklərin yerləşdiyi ərazilər hazırda simasını dəyişərək daha çox turistik bir məkan olmaqdadır. Bu gün Azərbaycanda ekoloji tarazlığın qorunması, vaxtilə çirklənmiş ərazilərin təmizlənməsi məsələlərinə böyük əhəmiyyət verilir. Aparılan təmizlik, bərpa işlərindən sonra həmin ərazilər əhalinin böyük diqqətinə səbəb olur.
Son dövrlər görülən işlərin nəticəsi olaraq vaxtilə fəlakət zonası olan ərazilər indi gözəl parklar, istirahət zonalarına çevrilib. Bu ərazilərimizdən biri kimi Balaxanını qeyd etmək olar, son bir ildə Balaxanıdakı dəyişikliklər hamının heyrətinə səbəb olur.
Balaxanı ilə bərabər şəhərimizin digər yerlərində də əsaslı təmizlik işləri aparılır. Bu sırada Bibiheybəti də qeyd etmək lazımdır.
Qeyd etdiyimiz kimi, hər iki ərazi vaxtilə neftlə çirklənmiş, ekoloji cəhətdən natəmiz bölgə sayılırdı. Ancaq Prezidentin tapşırığından sonra Balaxanıda aparılan yenidənqurma işlərindən sonra həmin ərazi turistik məkana çevrilib.
Prezident İlham Əliyev sentyabrın 23-də Bakının Balaxanı qəsəbəsində aparılan abadlıq işləri ilə tanış olub. Dövlət başçısı Balaxanıda olarkən bunları deyib: “Biz müstəqilliyimizi bərpa edəndə Balaxanı, Bibiheybət ekoloji fəlakət şəraitində idi və bizim xalqımıza nə verdi? Bu, artıq ritorik sualdır. Ona görə bu gün biz bu yerləri ekoloji fəlakət zonalarından ekoloji cənnət zonalarına çevirməliyik və bunu edirik".
Qeyd edək ki, Balaxanı Bakının qədim tarixi olan ərazisidir. Kəndin adının mənası Qılman İlkinin "Bakı və bakılılar" kitabında qeyd olunub: "bala" - yuxarı, hündür, "xana" - ev deməkdir. XIX əsrin 70-ci illərindən başlayaraq, Balaxanı Bakının əsas neftçıxarma mərkəzlərindən birinə çevrilməyə başlayıb. Son illərə qədər ərazisinin bir hissəsi məişət tullantıları poliqonuna çevrilən Balaxanı artıq paytaxtın ən gəzməli-görməli şəhər tipli qəsəbəsinə çevrilib.
Yaxın müddət ərzində Bibiheybət də yeni görkəmlə həm daxili, həm də xarici turistlərin diqqətini cəlb edəcək.
- “Balaxanı Bakının ilk neft çıxarılan ərazisidir, ona görə də layihə məhz Balaxanı qəsəbəsində gerçəkləşdirildi”
“Bakı Abadlıq Xidməti” MMC-nin nümayəndəsi Vüqar Müfidzadə qeyd etdi, Balaxanı qəsəbəsində abadlıq işlərinə 2019-cu ilin noyabr ayından başlanıb. Onun sözlərinə görə, əsasən təmir işləri dörd küçədə - Səfəvilər, Dirçəliş, Sabir və Cahangir Cahangirov küçələrində aparılır: “Artıq iki küçədə - Səfəvilər və Dirçəliş küçəsində təmir, demək olar ki, yekunlaşıb. Küçələrdə kommunikasiya xətləri, yerüstü işıq, rabitə, su, qaz xətləri torpaq altına salındı, yenidən kanalizasiya xətti çəkildi, yüksək sürətli fiberoptik rabitə və internet xətti çəkildi. Yerə plitə daşlar düzüldü. Evlərin damı təmir olunur, hasarlar, küçələr işıqlandırılır və yaşıllaşdırılır”.
Həmsöhbətimizin sözlərinə görə, bu layihənin məhz Balaxanıda həyata keçirilməsi heç də təsadüfi deyil: “Məlumdur ki, Balaxanı Bakının ilk neft çıxarılan ərazisidir. Ona görə də layihə məhz Balaxanı qəsəbəsində gerçəkləşdirildi. Balaxanıda ekoloji problemlər artıq aradan qaldırılıb. Qəsəbə kiçik olsa da, tarixi abidələri ilə zəngindir. Biz orada yenidənqurma işləri apararkən bir neçə tarixi abidə aşkarladıq. Məsələn, Balaxanı qum hamamı yerin altından çıxarıldı. KOBİA Balaxanıda kiçik sahibkarlığa dəstək verir. Bu qəsəbədə kiçik sahibkarlıq obyektləri olan xalçaçılıq, misgərlik, çap mərkəzi fəaliyyət göstərir”.
Son olaraq qeyd edək ki, Balaxanı bir turizm məkanı olaraq turizm marşrutlarına salınacaq və həm xarici, həm də daxili turistlər ora cəlb ediləcək. Bu da yerli əhali, sakinlər üçün əlavə imkanlar yaradacaq.
Günel CƏLİLOVA
