25/10/2020 17:44
728 x 90

Azərbaycanda hərbi vətənpərvərliyin yeni dalğası - səfərbərlik məntəqələrində qələbəlik və hədəf erməni faşizmi…

Kənan Qubadzadə: “Xalqımızın orduya etibarı və inamı da sonsuzdur”

img

Səngər həyatı... Torpaqlarımızın bir qisminin işğal edildiyi bir dövrdə hər bir azərbaycanlı səngərlə yaxından tanışdır. Yetkinlik yaşına çatdıqdan sonra hərbi xidmətə gedən gənclərin çoxunun həyatının müəyyən bir dövrü səngərdə keçir. Hərbi xidmət yeniyetməni kişi kimi formalaşdırırsa, səngər əsl döyüşçü, layiqli vətəndaş və xalqının taleyini öz mənafeyindən üstün tutan qəhrəman kimi yetişdirir.

Tariximizin səhifələri belə oğullarımızın adları ilə doludur. Onlardan Mübariz, Raquf, Samid, Polad kimiləri Azərbaycan oğlunun Vətəni üçün nələrə qadir olduğunu bütün dünyaya bir daha xatırlatdı. İndi ordu sıralarında xidmət edənlər də onların qəhrəmanlıqlarını öz şərəfli yollarında bir mayak bilirlər. Hər biri müqəddəs vəzifələrini yerinə yetirir, ölkə rəhbərliyindən yalnız bir əmri - döyüş əmrini səbrsizliklə gözləyir.

Son günlər sərhəddə baş verən hadisələr vətəndaşlarımızın hərbi-vətənpərvərlik hissini bir daha üzə çıxardı. Şəmkir və Tovuzda baş verənlərdən sonra çoxlu sayda igid oğlumuz könüllü olaraq orduya yazılıb. Bütün bunlar onu göstərir ki, torpaqlarımız uğrunda canından keçməyi üstün tutan vətənpərvər gənclərimiz var. Bu, hər birimiz üçün qürurlu, sevindiricidir və fərəhli bir hissdir. Hərbi komissarlıqların qarşısına yığışan yüzlərlə gənc, hətta ilk Qarabağ döyüşçüləri müharibəyə getmək istəyirlər.

  • “...cəmiyyətimizdə vətənpərvərliyin təbliğatı ən ümdə məqsəd və ən ali vəzifə olmalıdır”

Gənclər Mərkəzi İctimai Birliyinin icraçı direktoru Kənan Qubadzadə bildirdi ki, Azərbaycan müharibə şəraitində yaşadığından, cəmiyyətimizdə vətənpərvərliyin təbliğatı ən ümdə məqsəd və ən ali vəzifə olmalıdır: “İşğalçı Ermənistan tərəfindən artıq illərdir elan olunmamış müharibəyə cəlb edilmişik və nəticə etibarilə, torpaqlarımızın 20 faizi işğala məruz qalıb. Əlbəttə ki, belə bir şəraitdə dövlətimizdə gənclərin vətənpərvərlik ruhunda tərbiyə olunması aktual məsələ kimi böyük əhəmiyyət kəsb edir. Belə ki, vətənpərvərlik kimi ülvi və ali bir hissin aşılanması dövlətin, dilin, adət-ənənələrin, ümumilikdə, bütöv bir xalqın gələcəyini təmin edən amillərdən ən vacibidir. Təbii ki, gənc nəslin buna yiyələnməsi, bütövlükdə, dövlətin ümummilli azərbaycançılıq ideologiyasının qorunması baxımından müstəsna əhəmiyyətə malikdir”.

K.Qubadzadənin sözlərinə görə, Azərbaycan Ordusu getdikcə güclənir. Son illər qoşunların təmas xəttində düşmən ölkənin törətdiyi təxribatların qətiyyətlə dəf edilməsi onu deməyə əsas verir ki, Azərbaycan sülh danışıqları nəticə verməyəcəyi təqdirdə işğal altındakı torpaqları məhz ordusunun gücü ilə azad edəcək.

Həmsöhbətimiz onu da əlavə etdi ki, builki Tovuz hadisələri də göstərdi ki, ordumuzun maddi-texniki təchizatı, döyüş qabiliyyəti yüksək səviyyədədir. Azərbaycan Silahlı Qüvvələri istər quruda, suda, istərsə də havada döyüş tapşırığını yerinə yetirmək, ölkəni istənilən hücumdan müdafiə etmək qüdrətinə malikdir: “Tovuz hadisələrində hərbçilərimizin yüksək vətənpərvərlik nümayiş etdirdiklərinin şahidi olduq. Əsgər və zabitlərimiz Aprel döyüşlərində olduğu kimi, bu döyüşlərdə də şücaət və qəhrəmanlıq salnaməsi yaratdılar. Xalqımızın orduya etibarı və inamı da sonsuzdur. Əhali arasında döyüş ruhu da yüksəkdir. Hər birimiz Ali Baş Komandanın əmrini gözləyirik”.

Son olaraq qeyd edək ki, xalqımız öz şərəfli qəhrəmanlıq yolunu bu gün hünərlə davam etdirir. Necə deyərlər, yeni qəhrəmanlıq dastanının şanlı səhifələrini yazır. Azərbaycanın mərd oğulları torpaqlarımızı zəbt edən mənfur erməni işğalçıları ilə üz-üzə dayanaraq, bütün cəbhə boyu onlara ağır zərbələr vurur, qəhrəmanlıq əzmini nümayiş etdirirlər.

Günel CƏLİLOVA

Son xəbərlər