Artıq yeddi aydır ölkə pandemiya şəraitində yaşayır. Bu pandemiyanın tələb etdiyi bir çox qayda var ki, virusa yoluxmamaq üçün həmin şərtlərə əməl etmək çox vacibdir. Amma azyaşlı məktəblilərin bu şəraitdə təhsil almalarında narahatlıq doğuran bir çox məqam var.
Pandemiya həyatımıza girəndən müəyyən qaydalarla yaşamağa məcbur olmuşuq. Artıq növbəti tədris ili başladığından bu qaydalara təhsil ocaqlarında da əməl etmək şərt olub. Belə ki, respublika ərazisində fəaliyyət göstərən məktəblərin binasına daxil olan bütün şəxslərin hərarəti yoxlanır, hərarəti 37.1-dən yuxarı olan şagirdlər və ya işçi heyəti məktəbə buraxılmır.
Təhsil Nazirliyinin yaydığı məlumatda qeyd olunur ki, 21 sentyabr 2020-ci il tarixində hərarəti 37.1-dən yuxarı olan şagird və işçi heyətinin sayı Bakı şəhərində 21, bölgələrdə isə 29 nəfər olub. Hərarəti yüksək olan şagird və işçi heyəti barədə tibb müəssisələrinə məlumat verilir, bu şəxslərin müvafiq qaydada test olunması nəzərdə tutulur.
Məlumatda bildirilir ki, 21 sentyabr 2020-ci il tarixinə olan məlumata görə, dərs ili başlayandan bu günədək 95 şagird və 26 işçi heyəti olmaqla 121 nəfərdə koronavirus aşkarlanıb. Həmin şagirdlərin əksəriyyəti yuxarı siniflərdə təhsil aldıqları üçün ümumtəhsil müəssisələrinə gəlməmişlər. Bu şəxslər, ümumilikdə, 346 nəfərlə təmasda olublar.
Onu da qeyd edək ki, koronavirusa yoluxma ilə əlaqədar respublika ərazisində cəmi bir məktəbdə, Quba rayonu Qamqam kənd orta məktəbində 8 müəllimin virusa yoluxması səbəbindən əyani formada tədris dayandırılıb, distant formaya keçid edilib. Müəllimlər arasında kütləvi yoluxmanın səbəbi olaraq sosial məsafənin qorunmaması və şəxsi gigiyena vasitələrindən istifadə edilməməsi ehtimal olunur.
Bakıda müəllim və şagirdlərdə koronavirusun aşkar edilməsi səbəbindən 4 sinfin fəaliyyəti distant formaya keçirilib.
Qeyd etdiyimiz kimi, dərs ili başlayandan bu günədək 95 şagird və 26 işçi heyəti olmaqla 121 nəfərdə koronavirus aşkarlanması faktı kifayət qədər çoxdur. Bunun qarşısını almaq üçün mütləq əlavə tədbirlər görülməlidir.
“…heç bir kliniki əlamət olmadan cəmiyyətdə dolaşaraq virusu yayırlar”
Baş infeksionisti Cəlal İsayev bildirdi ki, aşağı siniflərdə koronavirus adətən subklinik səviyyədə keçir ki, bu da onlar üçün xüsusi təhlükə yaratmır: “Təbii ki, onlara heç bir təhlükə yaratmasa da, daşıyıcı kimi bizim üçün çox böyük təhlükədirlər. Onlar virusu ifraz edir və bu nöqteyi-nəzərdən heç bir kliniki əlamət olmadan cəmiyyətdə dolaşaraq virusu yayırlar. Ona görə də bu məqamın ciddi təhlükə olmasını nəzərə alıb yeni mexanizmlər hazırlanmalıdır. Bu rəqəmlər kifayət qədər çoxdur və yoluxmanın qarşısını almaq üçün mütləq əlavə tədbirlər görülməlidir”.
Həmsöhbətimiz onu da əlavə etdi ki, təkcə aşağı sinif şagirdləri deyil, regionlarda yuxarı sinif şagirdləri də yoluxub: “Burada valideynlərin üzərinə ciddi məsuliyyət düşür. Onların maska taxması tələb olunmalıdır. Eyni zamanda, müəllimlərin də səhlənkar davranışları yoluxmalara şərait yaradıb. Şagirdləri qısa tənəffüs vaxtı ayırıb, onların bir-birilə sıx ünsiyyətinin qarşısını almaq lazımdır. Bakıda sinifdə yoluxma halı çox olub və 4 sinif bağlanıb. Bu məsələ ilə bağlı kollegial müzakirə aparılmalı və tez bir zamanda qərar qəbul olunmalıdır”.
Günel CƏLİLOVA
