Dünyada koronavirus infeksiyasına yoluxanların və xəstəlikdən ölənlərin sayı durmadan artmaqdadır. Ölkələr üzrə virusa yoluxma sayı 30 milyonu ötüb, pandemiya qurbanlarının sayı isə 943 mindən artıqdır. Dünya miqyasında COVID-19 virusundan sağalanların sayı isə 20 milyonu ötüb. Ən çox virusa yoluxma ABŞ-da (6 664 021), Hindistanda (5 118 253) və Braziliyada (4 419 083) qeydə alınıb.
Ölkəmizdə yoluxma və sağalma statistikasına nəzər saldıqda müsbət dinamika görürük. Nəzərə almaq lazımdır ki, Azərbaycan dünyada koronavirusla mübarizədə az itki verən ölkələrdəndir. Etiraf etməliyik ki, bu nəticəyə Prezident İlham Əliyevin pandemiyaya qarşı mübarizədə gördüyü qabaqlayıcı tədbirlər, onun qətiyyəti, iradəsi, əzmi sayəsində nail olunub. Belə ki, Azərbaycanda ilk vaxtlardan COVID-19 virusunun yayılmasının qarşısının alınması istiqamətində bir sıra effektiv tədbirlər görüldü ki, bu da ölkədə epidemioloji vəziyyəti nəzarətdə saxlamaq imkanı yaratdı.
Təcrübə göstərir ki, hansı ölkədə erkən yumşalmalara gedilibsə, hazırda orada epidemioloji vəziyyət pisləşməyə doğru dəyişir. Hətta bəzi ölkələr ikinci və üçüncü dalğa təhlükəsi ilə üz-üzə qalıblar.
İsraildə sutka ərzində 4 minə yaxın insanda COVID-19 aşkar edilib. Hökumət 3 həftəlik sərt karantin elan edib. Vətəndaşlara evlərindən 500 metrdən artıq uzaqlaşmaq qadağandır, restoranlar, otellər, idman zalları və hovuzların bağlanmasına başlanıb.
Artıq qonşu Gürcüstanda da pandemiyanın ikinci dalğası elan olunub. Baş nazir Q.Qaxariya da bildirib ki, ölkədə epidemioloji vəziyyət pisləşməyə başlayıb.
O cümlədəm, İranın Tehran əyalətinin ərazisində koronavirus pandemiyasının üçüncü dalğası başlayıb. Bu barədə Tehranda Koronavirusla mübarizə əməliyyatı qərargahının rəhbəri Əlirza Zali bildirib. O qeyd edib ki, Tehranda artıq üçüncü dalğa başlayıb: “İkinci dalğa ilə üçüncü dalğa arasında vaxt intervalı çox cüzi olub”.
Qeyd edək ki, İranda son sutka ərzində daha 3 097 nəfərdə koronavirus aşkarlanıb, 183 nəfər vəfat edib. Bununla da ölkədə xəstələnənlərin sayı 422 140-a, virus qurbanlarının sayı isə 24 301-ə yüksəlib.
Qonşu ölkələrdə koronavirusun ikinci və üçüncü dalğasının başlaması ölkəmizdə narahatedici duruma səbəb olub. Qonşu ölkələrdə vəziyyətin kritikləşməsi nəzərə alınaraq, respublikamızda nə kimi tədbirlər görülməlidir?
“Əldə edilmiş müsbət dinamika hər an pozula bilər”
Milli Məclisin Səhiyyə komitəsinin üzvü İlham Məmmədov bildirdi ki, payızda mövsümi xəstəliklər artır: "Əldə edilmiş müsbət dinamika hər an pozula bilər. Yoluxma hallarının artma ehtimalları hələ də yüksəkdir.
Bu günə kimi Cənubi Qafqaz regionunda ən az yoluxma halı qeyd edilən qonşu Gürcüstanda da artıq vəziyyət pisləşib. Avropanın bir çox ölkəsində artıq ikinci dalğa başlayıb. Həmçinin, İranda üçüncü dalğa başlayıb. Eyni zamanda, Avstriyada, Almaniyada, İngiltərədə yenidən qaydaların sərtləşmə metodları üzərində işlənilir. Qardaş Türkiyədə açıq havada belə, tibbi maskadan istifadə zəruri olub".
Onun fikrincə, yenidən sərt karantin qaydalarına dönməmək üçün hər kəs üzərinə düşən məsuliyyəti dərk etməlidir.
Günel CƏLİLOVA
