Yeni tədris ilində pandemiya ilə əlaqədar olaraq, dərslər həm əyani, həm də distant (məsafədən) formada təşkil edilir. Müəyyən edilmiş qaydalara əsasən, I-IV siniflər tədris ilinə əyani və distant (məsafədən), V-XI siniflər isə distant formada başlayıblar. Məlum olduğu kimi, ibtidai sinif şagirdləri həftədə iki dəfə məktəbə gedir, V-XI sinif şagirdləri isə oktyabrın 1-dən həftədə iki dəfə əyani təhsil almağa başlayacaqlar.
Son günlər sosial şəbəkələrdə bəzi özəl orta ümumtəhsil məktəblərində dərslərin həftənin bütün günlərində əyani təşkil edildiyinə dair xəbərlər yayılıb. Bunun isə Təhsil Nazirliyinin pandemiya şəraitinə uyğun olaraq qəbul etdiyi qərar və təlimatlara zidd olduğu açıq şəkildə ortadadır.
Sosial şəbəkələrdə yayılan məlumatlara Təhsil Nazirliyi sərt reaksiya verib və özəl orta məktəblərin yol verdiyi bu hərəkətin qanunazidd olduğunu bəyan edib. Belə ki, Təhsil Nazirliyi özəl ümumtəhsil müəssisələrinə xəbərdarlıq edib və bununla bağlı müraciət yayıb. “...2020-2021-ci tədris ilində ümumtəhsil müəssisələrində tədris və təlim-tərbiyə prosesinin karantin rejimində təşkili Nazirlər Kabinetinin müvafiq qərarı əsasında həyata keçirilir. Belə ki, Bakı, Sumqayıt şəhərləri və Abşeron rayonunun ümumtəhsil müəssisələrinin fəaliyyəti əyani olaraq həftədə 2 dəfə, digər şəhər və rayonlarda isə əyani formada həftədə 3 dəfə xüsusi tədris planlarına uyğun təşkil edilir.
Lakin sosial şəbəkələrdə bəzi özəl ümumtəhsil müəssisələrində şagirdlərin həftədə 5 dəfə əyani şəkildə tədrisə cəlbi ilə bağlı fikirlər səsləndirilir.
Bildiririk ki, bu, Nazirlər Kabinetinin tədrisin təşkili ilə bağlı müvafiq qərarlarına riayət edilməməsidir. Təhsil müəssisələrində tədrisin təşkili ilə bağlı bütün məsələlər Təhsil Nazirliyinin nəzarətindədir və belə hallar təsdiqini taparsa, müvafiq şəkildə tədbirlər görüləcək”.
Qeyd edilənə görə, bəzi özəl orta ümumtəhsil məktəblərində həftədə 5 dəfə əyani dərs keçildiyi deyilsə də, digərlərində həftədə iki dəfə keçirildiyi bildirilir.
Övladları özəl orta məktəblərdə olan valideynlər şikayət edirlər ki, bu gün də onlardan 5 günlük dərs üçün təhsilhaqqı tələb olunur. Bu hal yalnız özəl orta məktəblərdə deyil, özəl uşaq bağçalarında da müşahidə olunur. Özəl bağçalar da özəl orta məktəblər kimi təhsilhaqqının ötən illərdəki qaydada ödənilməsini tələb edirlər.
Təhsil mütəxəssisləri deyirlər ki, özəl orta təhsil müəssisələri pandemiya dövründə yalnız onlayn tədris həyata keçirib və bağçalar isə, ümumiyyətlə, işləməyib, amma onlar da valideynlərdən tam ödəniş tələb edirlər.
Ekspertlər qeyd edirlər ki, hətta elə özəl bağçalar var, uşaq gəlməsə belə, adını siyahıda saxlayır və onun valideyninə ödəniş etməli olduğunu deyirlər.
Təhsil ekspertlərinin sözlərinə görə, pandemiya şəraitində təhsilhaqqının əvvəlki qaydada ödənişinin tələb edilməsi doğru deyil. Onlar deyirlər ki, onsuz da özəl orta məktəblərdə və bağçalarda təhsilhaqqı kifayət qədər yüksəkdir. Xidmətə gəlincə, ekspertlər deyirlər ki, ödənilən pul müqabilində göstərilən xidmət də yüksək olub, lakin indiki şəraitdə o müəssisələr tam gücü ilə işləmirlər. Bu səbəbdən də 2 günlük dərsə görə 5 günlük dərs gününün ödənişinin tələb edilməsi doğru deyil.
“Özəl məktəblər və bağçalar tərəfindən təhsilhaqqının keçənilki qaydada tələb edilməsi doğru deyil”
Tanınmış təhsil eksperti Məlahət Mürşüdlü baki-xeber.com-a bildirdi ki, özəl orta ümumtəhisil məktəblərinin dövlətin müvafiq qaydaları əsasında tərtib olunan nizamnaməsi var. M.Mürşüdlü vurğuladı ki, nazirliyin verdiyi təlimatda özəl məktəblər bəndi olmadığı üçün, ola bilsin, onların bəziləri əyani tədrisə başlayıb.
Təhsilhaqqı məsələsinə gəlincə, M.Mürşüdlü dedi ki, hər gün müvafiq dərs cədvəlinə uyğun əyani dərs keçilərsə, şagirdlər özəl məktəblərin bütün xidmətlərindən yararlanarsa, burada dərs oxuyar, yemək yeyər, məşğələ keçər, avtobusdan istifadə edərsə, yalnız bu halda təhsilhaqqının tam şəkildə ödənilməsi tələb oluna bilər, əks halda isə bunu tələb etmək olmaz. “Həftədə iki-üç dəfə dərs keçilirsə və şagird məktəbin digər xidmətlərindən istifadə etmirsə, onda özəl orta məktəb rəhbərliyinin valideyndən əvvəlki qaydada təhsilhaqqı tələb etməsi doğru deyil. Keçən illər təhsilhaqqı ona görə o qaydada idi ki, bu məktəblərdə şagirdlərə bütün lazımi xidmət göstərilirdi. Fikrimcə, hansı orta təhsil müəssisəsində və uşaq bağçasında valideynlərdən keçilməyən dərslərə, məşğələlərə, göstərilməyən xidmətlərə görə pul tələb edilirsə valideynlər bir araya gəlib həmin məktəblərin təsisçiləri ilə görüşməlidirlər. İndiki halda, özəl məktəblər və bağçalar tərəfindən təhsilhaqqının keçənilki qaydada tələb edilməsi doğru deyil və narazı valideynlər bunu Tarif Şurasının diqqətinə çatdırmalıdırlar. Bu məsələnin həlli üçün təsisçilər mütləq şəkildə valideyni qəbul etməli və dinləməli, təhsilhaqqını xidmətə uyğun almalıdırlar. Problem ortaq məxrəcə gəlmək yolu ilə həll oluna bilər” - deyə M.Mürşüdlü qeyd etdi.
İradə SARIYEVA
