24/10/2020 19:44
728 x 90

Vətəndaş məsuliyyətini başlı-başına buraxanda – bir vaxtlar koronaya qarşı ən qabaqcıl sayılan Şəki pandemiyanın yeni dalğasında...

img

Respublikamızda karantin rejimi yumşaldıldıqdan sonra yoluxma hallarının azalması müşahidə edilmədi. Hətta bu onunla nəticələndi ki, bəzi rayonlarda karantinə kütləvi yoluxma halları baş verdi.

Nazirlər Kabineti yanında Operativ Qərargahın qərarına əsasən, 5 avqust tarixində xüsusi karantin rejimi tətbiq edilən rayon və şəhərlər siyahısından Şəki şəhəri çıxarıldıqdan sonra bu günlərdə orada koronavirusa kütləvi yoluxma qeydə alınıb. Belə ki, Şəkidə “Bazar” adlanan ərazidə koronavirus infeksiyasına kütləvi yoluxma faktı baş verib.

Nazirlər Kabineti yanında Operativ Qərargahdan mətbuata verilən məlumata görə, həmin ərazidə 01.09.2020 tarixindən bu günə qədər götürülən test nümunələrinin 13-də koronovirus testi pozitiv olub. Hazırda məsələ ilə bağlı araşdırma aparılır: "Epidemioloji vəziyyət barədə ictimaiyyətə əlavə məlumat veriləcək. Şəkidə epidemioloji vəziyyətin stabilləşdirilməsi istiqamətində profilaktik və əksepidemik işlər aparılır.

Mövcud vəziyyətdə infeksiya ocağının bazar olduğu nəzərə alınaraq, yaxın günlərdə profilaktik dezinfeksiya işlərinin aparılması məqsədilə Operativ Qərargah tərəfindən bazarın müvəqqəti bağlanması qərarı verilib".

Qeyd etdiyimiz kimi, Şəki avqustun 5-də karantindən çıxarılan ilk rayonlardan olub və qısa vaxt keçdikdən sonra vətəndaş məsuliyyətsizliyi yenidən virusu alovlandırıb.

  • Fərrux Sədirov: “Məsələyə hansı tərəfdən baxırsız baxın, burada söhbət vətəndaşın məsuliyyətsizliyindən...”

İnfeksion xəstəliklər və klinik mikrobiologiya uzmanı Fərrux Sədirov “Bakı-Xəbər”ə bildirdi ki, Şəkidə yoluxmanın bu şəkildə artmasının səbəbi vətəndaşlar arasında virusla bağlı arxayınçılığın yaranmasıdır. F.Sədirov hesab edir ki, bəzi vətəndaşlar karantin yumşalmalarını “artıq virusa yoluxma təhlükəsi yoxdur” kimi qəbul etməyə başlayıb və bu da onlarda arxayınçılıq yaradıb. “Məsələyə hansı tərəfdən baxırsız baxın, burada söhbət vətəndaşın məsuliyyətsizliyindən deyil, duruma alışqanlıq məsələsindən gedir. Aylardır davam edən COVID-19 pandemiyasını nəinki Azərbaycanda, bütövlükdə, dünyada insanlar adi hal olaraq qarşılamağa başlayır. İnsanlarda belə təəssürat yaranır ki, sərt karantin rejimi götürülübsə, müəyyən sosial məkanlar, ictimai iaşə obyektləri açılıbsa, demək, artıq pandemiya bitib, koronavirus yox oldu, xəstəlik yoxdur. Bu kimi düşüncələr, qeyri-ixtiyari olaraq, insanlara rahatlıq gətirir. İnsanlarda yaranan arxayınçılığın nəticələrini də yoluxmaların sayının artmasında görə bilirik. Nəzarətə gəlincə, Azərbaycanda qlobal nəzarət mexanizmi həyata keçirilir. Amma hər bir insanın başının üstündə nəzarətçi qoymaq da mümkün deyil, bu imkansız bir şeydir və dünyanın heç bir yerində bunun tətbiq edilməsi mümkünsüzdür. İnsanlarımızın daha çox maariflənməsinə və məsələni ciddiyə almasına ehtiyac var”.

Əvvəlki pandemiya dövrü ilə müqayisədə hazırda vətəndaşlarımızın daha məsuliyyətli olmağa başladığını deyən F.Sədirovun sözlərinə görə, insanlar artıq maska taxmaq, sosial məsafə və qaydaları gözləməkdə daha həssasdırlar. “Ancaq bu hələ yetərli deyil, bunu daha da gücləndirmək lazımdır”.

  • Ayaz Hüseynov: “Şəkidə də virusa yoluxma halının kütləviləşməsi birbaşa vətəndaş məsuliyyətinin zəif olması ilə bağlı məsələdir”

Hemofiliyalı Xəstələrin Respublika Assosiasiyasının sədri Ayaz Hüseynov bizimlə söhbətində bildirdi ki, Ümumdünya Səhiyyə Təşkilatı tərəfindən COVID-19 virusunun bütün dünyaya yayılması ilə əlaqədar pandemiya elan edildi. O qeyd etdi ki, Azərbaycan Respublikasının Prezidenti İlham Əliyev vəziyyəti öz nəzarəti altına götürdü və hər bir vətəndaşın sağlamlığını hər şeydən üstün tutaraq, ölkədə müvafiq karantin tədbirlərinin görülməsinə göstəriş verdi. “Belə ki, Operativ Qərargahın elan etdiyi ilk sərtləşdirilmiş karantin rejimi öz töhfəsini verib. Lakin cəmiyyətdə bu virusa inamsızlıq var idi və bir çox insan məsələnin süni şəkildə şişirdilmiş olduğunu qeyd edirdi.

Bu düşüncələr zəminində insanlar maska taxmadı, məsafə saxlamadı və yoluxma yenidən artaraq karantin qaydaları sərtləşdi. Hazırda Operativ Qərargahın çoxsaylı yumşalma qərarlarını müşahidə edirik. Məhz bu dönəmdə vətəndaşlarımızın məsuliyyətli olması çox vacib məsələdir. Belə ki, həm payız aylarına doğru digər respirator xəstəliklərin çoxalması və onların COVID-19 virusu ilə bərabər daha da təhlükəli olması aydın məsələdir. Bununla bağlı vərəndaşların daha da məsuliyyətli olması və məsələnin nə qədər ciddi olmasını anlaması çox vacibdir. Unutmayaq ki, bu, ümummilli məsələdir və belə ağır dönəmdə cəmiyyət və dövlət tamlığı ilə bir olmalı və qoyulan qaydalara yekdilliklə əməl edilməlidir. Əks halda, biz sərt karantin rejiminə geri qayıtma risqi ilə üz-üzə qalacağıq. Dünyada COVID-19 infeksiyasına qarşı peyvənd icad edilənə qədər saydığımız sadə qaydalara: 1. maskadan istifadə, 2. sosial məsafə, 3. şəxsi gigiyena, 4. ətraf mühitin qorunmasına əməl etməklə, tez bir zamanda yoluxma sayını minimuma endirərək, əvvəlki həyat tempində yaşaya biləcəyik”.

A.Hüseynovun vurğuladığına görə, dünya ölkələrinə nəzər salsaq, hazırda COVID19 virusunun artma dinamikasını müşahidə edə bilərik. “Müşahidələrimizə gorə, Azərbaycanda çox olmasa da,  amma hələ də qoyulan sadə qaydalara cəmiyyət içində əməl etməyənlər var. Yuxarıda deyilənləri nəzərə alaraq, bir daha təkrarlamaq istərdim ki, birlik nümayiş etdirilməlidir. Dövlətin qoyduğu qaydalara şərtsiz əməl edilməli və yalnız bundan sonra yoluxma sayı minimuma endikdə, normal həyata tam olaraq qayıda biləcəyik”.

Şəkildə yoluxma hallarının kütləvi hal almasınının səbəblərini şərh edən A.Hüseynovun fikrincə, virusla mübarizə ümummilli məsələdir və burada hər bir vətəndaşın payı olmalıdır. “Hər bir Azərbaycan vətəndaşının borcudur ki, bu məsələdə məsuliyyətli olsun, həm özünü, həm də digər vətəndaşımızı qorusun. Burada sadə qaydalara əməl edilsəydi, biz yoluxma sayının bu şəkildə artdığını müşahidə etməyəcəkdik. Xüsusən də üzü soyuq aylara gedirik və məsuliyyət daha da artırılmalıdır. Ona görə də hər bir vətəndaşımızı bir daha dövlətin qoyduğu qaydalara əməl etməyə çağırıram. Bu məsələ cərimə ilə həll olunmur, gərək burada vətəndaşın mənəvi məsuliyyəti də olsun. Ən əsas da indi valideynlər uşaqlarına daha çox diqqət etsinlər, çünki uşaqlar daşıyıcı kimi virusu gətirib ailə üzvlərinə yoluxdura bilərlər. Şəkidə də virusa yoluxma halının kütləviləşməsi birbaşa vətəndaş məsuliyyətinin zəif olması ilə bağlı məsələdir. Burada insanlar məsuliyyət göstərib həm özlərini, həm ailə üzvlərini, həm də digər insanları qorumalıdırlar. Sadə qaydalara əməl edilsə, inanıram ki, çox qısa vaxta biz yoluxma sayını aşağı sala biləcəyik. Peyvənd tapılana qədər hər bir vətəndaş bu virusla yaşama tərzini bilməlidir. Çünki, əks halda, yenidən sərt karantin rejimi gerçəkləşdirilə bilər. Bunun baş verməməsində isə vətəndaş məsuliyyəti əsas rol oynayır” - deyə A.Hüseynov vurğuladı.

İradə SARIYEVA 

Son xəbərlər