Biləsuvar rayon sakini Elmi-Tədqiqat Pediatriya İnstitutunun tibb heyətinə məktub yazdı...
Səhiyyə sistemi həyatımızın ən vacib və ən diqqət tələb edən sahələrindən biri olmaqla, miqyasından asılı olmayaraq hər biri insan həyatı üçün vacib olan elementlərdən ibarətdir. Təsadüfi deyil ki, bu gün ölkəmizdə baş verən dinamik inkişaf bütün sosial sahələrin, o cümlədən səhiyyənin inkişafına əsaslı təkan verib.
Sözügedən sahə ölkəmizdə daim diqqət mərkəzində saxlanır, bu istiqamətdə kompleks tədbirlər həyata keçirilir. Ulu öndər Heydər Əliyevin siyasi kursunun layiqli davamçısı Prezident İlham Əliyevin diqqət və qayğısının nəticəsində Azərbaycanın səhiyyə sistemində aparılan uğurlu islahatların, tibb müəssisələrinin maddi-texniki bazasının təkmilləşdirilməsinin, təchizat və kadr hazırlığı ilə bağlı görülmüş işlərin bəhrəsini bu gün hər birimiz öz həyatımızda hiss edirik. Görülən işlər əhalinin dövlət tibb müəssisələrinə inamını da getdikcə artırır. Bu inamın daha bir ifadəsi Biləsuvar rayon sakini Mahir Qasımov tərəfindən redaksiyamıza ünvanlanan sevinc dolu minnətdarlıq müraciətidir. Bu gün mövcud vəziyyətlə əlaqədar tibb işçilərinə mənəvi dəstəyin əhəmiyyətini nəzərə alaraq, sözügedən müraciəti oxucularımızın diqqətinə çatdırırıq:
“Sizə bu müraciətim Elmi-Tədqiqat Pediatriya İnstitutunun fəaliyyəti ilə əlaqədardır. Diqqətinizə çatdırmaq istəyirəm ki, mən - Biləsuvar rayon sakini Mahir Qasımov 07.08.2020-ci il tarixdə övladım Ramal Qasımlını mədə-bağırsaq pozğunluqları ilə bağlı Elmi-Tədqiqat Pediatriya İnstitutuna aparmışdım. Övladım orada 13 günlük müalicə keçmiş və həkimlər tərəfindən qəbul edilmiş qərara əsasən əməliyyat olunmuşdur. Həkim heyətinin peşəkarlığı nəticəsində əməliyyat uğurla başa çatdırılmış və əməliyyatdan sonrakı müddət ərzində oğlumun səhhətində yaxşılaşma müşahidə olunmuşdur. Təbii ki, övladımın səhhətinin düzəlməsi, bir valideyn olaraq, məni çox sevindirir. Bu səbəbdən də mən sevincimi sizinlə bölmək və redaksiyanız vasitəsilə həkim heyətinə minnətdarlığımı bildirmək istədim. Xüsusən, ilk gündən bizə diqqət və qayğı göstərən şöbə əməkdaşlarına, şöbə müdiri Reqina Nemətovaya, müalicə həkimi Rəna Məmmədovaya çəkdikləri əziyyətə, göstərdikləri peşəkarlığa görə minnətdarlığımı bildirirəm. Cərrahiyyə şöbəsinin müdiri, dəyərli cərrahımız Gündüz Ağayevin bilik və təcrübəsi, eyni zamanda övladımı əməliyyat edən Heyrət həkimin peşəkarlığı övladımı vəziyyətdən çıxartdı. Hər iki cərraha təşəkkürümüz sonsuzdur! Artıq övladımın qida qəbulu yaxşılaşmaqdadır və mən inanıram ki, növbəti əməliyyatdan sonra oğlum sağlamlığını tam bərpa edəcəkdir. Ümumilikdə isə, orada yaradılan şərait, xəstə, xəstə yaxınlarına münasibət onu deməyə əsas verir ki, ölkə prezidenti cənab İlham Əliyev tərəfindən ölkəmizin səhyyə sisteminə göstərilən diqqət və qayğı nəticəsiz qalmır və biz vətəndaş olaraq bunu gündəlik həyatımızda hiss edirik. Mən sonda bir daha qəzet vasitəsilə ölkənin baş pediatrı, professor Nəsib Quliyev başda olmaqla, insitutun bütün tibb heyətinə bir valideyn, bir vətəndaş olaraq minnətdarlığımı bildirir, hər birinə bu çətin və şərəfli peşənin icrasında uğurlar arzu edirəm”
Biz də redaksiya olaraq, öz növbəmizdə, adıçəkilən həkim və tibb heyətinə təşəkkür edir, gələcəyimiz olan uşaqlarımızın sağlamlığının keşiyində onlartək peşəkar mütəxəssislərin varlığından qürur duyuruq!
Hazırladı: Namiq QULİYEV
