24/10/2020 19:10
728 x 90

Bölgələrə gediş-gəliş açılandan otel qiymətləri iki-üç dəfə sıçrayıb…

img

Mart ayından etibarən davam edən karantin rejimi xarici turizmlə yanaşı, daxili turizmə də təsirsiz ötüşmədi. Rayonlara gediş-gəlişin qadağan olunması digər tərəfdən bu işlə məşğul olanların işsiz qalması ilə nəticələndi. Eyni zamanda, səyahət etmək istəyənlərin planlarını al-üst etdi.

Nəhayət ki, sentyabrın 8-dən bu qadağanın ləğv olunması daxili turizmin nisbətən canlanmasına zəmin yaratdı. Baxmayaraq ki, yay bitib, insanlar mülayim havanın hökm sürdüyü indiki günlərdən maksimum şəkildə yararlanmağa çalışırlar. Hər yay istirahət üçün təbiət qoynuna üz tutanlar 6 ay davam edən qadağadan sonra yenidən rayonlara yollanırlar.

6 ay işləməyən otellər itirdikləri qazancı geri almaq üçün qiymətləri qaldırıblar.

  • Göydəniz Qəhrəmanov: “Regionlardakı otellərdə qiymət bahalaşması, demək olar ki, yoxdur, yalnız həftənin son günlərində…”

Məsələ ilə bağlı fikir bildirən Azərbaycan Turizm Agentlikləri Assosiasiyasının (ATAA) Ekspertlər Şurasının sədri Göydəniz Qəhrəmanov dedi ki, sentyabrın 8-dən regionlara gediş-gəliş məhdudiyyəti götürülüb: “Vətəndaşlarımız öz istirahətlərini regionlarda keçirə bilərlər. Otellər açıqdır və müştəriləri qəbul edirlər. Ötən həftənin şənbə-bazar günlərində regionlardakı otellərdə, demək olar ki, boş yer yox idi. Regionlardakı otellərdə qiymət bahalaşması, demək olar ki, yoxdur. Yalnız həftənin son günlərində az qiymət fərqləri müşahidə olunur”.

  • Ceyhun Aşurov: “…bunun üçün güzəşt kampaniyaları təşkil etmələri mütləqdir”

Turizm eksperti Ceyhun Aşurov bildirdi ki, dünyada hazırda daha çox bərpa proseslərinə üstünlük verilir: “Otellər bunun üçün müxtəlif endirim və güzəştli kampaniyalar təşkil edirlər. Hətta onlayn rezervasiya portalları belə öz fərqlərini azaldıb istehlakçının, yəni turistin xeyrinə müəyyən güzəştlər tətbiq edirlər. Məsələn, 3 gün qalana 1 gün hədiyyə, qonağa pulsuz şam yeməyi və digər bu tip məhsullar təklif olunur. Hazırda daxili turizm növünün aktivləşməsi ehtimal olunur, yəni insanlar səyahət edərkən daha çox tanıdıqları və əmin olduqları yaxın ərazilərə getməyə üstünlük verirlər. Bizdə də yaranmış vəziyyətlə əlaqədar olaraq müəyyən nəticələr götürüldü və bunun sayəsində artıq regionlara səfərlər intensivləşib”.

Ekspertin sözlərinə görə, regiondakı otellərin hamısı bu intensivləşməyə hazır deyildi: "Bəzi otellər hələ da bağlıdır və açılmağı düşünür. Lakin otellər var ki, hətta pandemiya dövründə də fəaliyyət göstərirdi və ezamiyyə hüququ olan insanlar müəyyən şərtlər çərçivəsində həmin otellərdə qalırdılar. Qeyd etmək lazımdır ki, otellər sanitar-gigiyenik normalara riayət olunması, qida təhlükəsizliyi ilə bağlı Nazirlər Kabinetinin son qərarında əks olunan şərtlərə mütləq şəkildə əməl etməlidirlər. Həmçinin, otellər özləri daha çox turistin cəlb olunması üçün endirim kampaniyaları həyata keçirməlidirlər. Məsələn, həftəiçi günlər bir qiymət, həftə sonları isə başqa qiymət təklif olunur və yaxud qonaqlar uşaqla gəlirsə, uşaqların pulsuz yerləşdirilməsi, otağın qiymətinə səhər və ya axşam yeməyinin daxil edilməsi kimi fürsətlər təqdim edilməlidir. Yəni otel daxilində təklif olunan müxtəlif məhsul və xidmətlər otağın qiymətinə daxil edilir və ya müəyyən güzəştlər təqdim olunur ki, turistlərin qiyməti salmadan eyni qiymətə daha çox xidmətdən yararlanmaq imkanı olsun. Təbii ki, bunlar da öz müsbət nəticəsini göstərir. Düşünürəm ki, məhdudiyyətlər aradan qaldırıldıqdan sonra turistlərin regionlara səfərləri aktivləşəcək. Lakin artıq sentyabrın 15-də dərslər başlayıb və insanlar daha çox həftə sonlarında və qeyri-iş günlərində regionlara səfər etməyə üstünlük verəcəklər. Təəssüflər olsun ki, yay mövsümü artıq sona çatıb və turizm üçün tam uyğun bir vaxtda otellərin hazır olmasını ifadə etməsinə baxmayaraq, mövcud epidemioloji vəziyyət, xəstəliyin yayılması məhdudiyyətlərin tam aradan qaldırılmasına imkan vermədi. Lakin bu son fürsətlər da otelçilər tərəfindən dəyərləndirilib və onlar çalışmalıdırlar ki, otellər bu dövrdə müəyyən kampaniyalar həyata keçirərək, turistləri cəlb edib müəyyən gəlir əldə etsinlər. Bunun üçün güzəşt kampaniyaları təşkil etmələri mütləqdir”.

Günel CƏLİLOVA

Son xəbərlər