Dövlətçilik atributlarımızdan biri olan Azərbaycan dilinin işləkliyini qüsursuz şəkildə təmin etmək hər bir vətəndaşla yanaşı, dildən istifadə edən qurumların da əsas vəzifəsidir, borcudur.
Bilirik ki, ana dilindən düzgün istifadə edilməsi sahəsində qanunvericilik bazası formalaşdırılsa da, dildən istifadə edənlərin məsuliyyətsiz yanaşmaları səbəbindən dilimizin qüsursuz işləkliyinə kölgə salınır.
Bir sıra hallarda rəsmi dövlət qurumlarının saytında da analoji qüsurlar müşahidə edilir. Artıq bu istiqamətdə yeniliklər və bütün qurumlardan dil normalarına düzgün şəkildə riayət olunması tələb olunur.
Məlum olduğu kimi, dövlət orqanlarının saytlarının yaradılmasına dair tələblər təsdiqlənib.
Nazirlər Kabineti “Dövlət orqanlarının internet informasiya ehtiyatlarının yaradılmasına və idarə edilməsinə dair Tələblər”in təsdiq edilməsi haqqında” Azərbaycan Respublikası Nazirlər Kabinetinin 2012-ci il 4 sentyabr tarixli, 189 nömrəli Qərarında dəyişiklik edib. Rəsmi məlumata görə, Baş nazir Əli Əsədovun imzaladığı müvafiq qərara əsasən, Azərbaycan Respublikası Nazirlər Kabinetinin 2012-ci il 4 sentyabr tarixli, 189 nömrəli Qərarı ilə təsdiq edilmiş “Dövlət orqanlarının internet informasiya ehtiyatlarının yaradılmasına və idarə edilməsinə dair Tələblər”ə aşağıdakı məzmunda 8.4-cü bənd əlavə edilir:
“8.4. Dövlət orqanının internet informasiya ehtiyatında dövlət dili normalarına riayət olunması təmin edilməlidir”.
“Dövlət orqanının internet informasiya ehtiyatında da dövlət dili normalarına riayət olunmasının təmin edilməsi üçün...”
Mətbuat Şurasının sədr müavini, media eksperti Müşfiq Ələsgərli “Bakı-Xəbər”ə bildirdi ki, yeni tələblərin təsdiqlənməsi bu sahədə görülən işlərin davamıdır. “Hesab edirəm ki, Azərbaycan dilinin qorunması və inkişaf etdirilməsi üçün sürətli, təxirəsalınmaz tədbirlər davam etdirilməlidir. Yaşadığımız dövrün tələbləri, xüsusilə qloballaşma prosesi və internetin inkişafı bu yöndə ciddi addımlar atılmasını zəruri edib. Bu sırada mən internet üzərində xüsusi dayanmaq istərdim. Təəssüf ki, internetin müsbət məqamları ilə yanaşı, dilimizin normalarının qorunması ilə bağlı proseslərdə çox ciddi ziyanları da mövcuddur. Xüsusi olaraq gənc nəsil sanki özündən yeni bir dil icad edib və sosial şəbəkələr üzərindən yazışmasını, açıqlamasını həmin qondarma dil normaları vasitəsilə həyata keçirir”.
Bu yöndə olan neqativlərin aradan qaldırılmasının vacib olduğunu deyən M.Ələsgərlinin sözlərinə görə, yaranmış zərurət öncə ölkə Prezidenti səviyyəsində qiymətləndirilib. “Prezident İlham Əliyev hələ 2013-cü ildə Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramının qəbul edilməsinə sərəncam verib. Həmin andan sonra isə silsilə tədbirlər həyata keçirilib. 2020-ci ilin iyun ayında cənab Prezident teleradio yayımlarında və digər KİV-də dövlət dili normalarının pozulmasına görə inzibati xətanın protokollaşdırılmasına dair sərəncam imzaladı və bu sərəncamın icra edilməsi üçün həm Milli Televiziya və Radio Şurası, həm də Mətbuat Şurasının qarşısında öhdəliklər qoyuldu. İndi Baş nazir Əli Əsədovun imzaladığı müvafiq qərarı da mən bu prosesin davamı kimi qiymətləndirirəm. KİV kimi, dövlət orqanının internet informasiya ehtiyatında da dövlət dili normalarına riayət olunmasının təmin edilməsi üçün vacib bir qərardır. Əhalinin ən çox müraciət etdiyi ünvanlar olaraq, bu resurslarda dil normalarının qorunması mühüm əhəmiyyət daşıyır. Dövlət qurumlarının internet resurslaında yerləşdirdikləri informasiyalar, bir tərəfdən, əhalinin lazımi informasiya ilə təminatına xidmət edirsə, digər tərəfdən, Azərbaycan dilinin rəsmi üslubda imkanlarının genişləndirilməsi, dil normalarının elmi əsaslarla inkişaf etdirilməsi missiyasını daşıyır. Bu baxımdan, verilmiş sərəncamı mühüm əhəmiyyətli qərar kimi dəyərləndirirəm” - deyə M.Ələsgərli qeyd etdi.
İradə SARIYEVA
