Lalə Rüstəmova: “Koronavirusla mübarizə istiqamətində görülən işlər sayəsində ikinci dalğa ölkəmizdə yüngül formada keçə bilər”
Xəbər verdiyimiz kimi, Ümumdünya Səhiyyə Təşkilatının (ÜST) son statistikaları müxtəlif ölkələrdə koronavirusla bağlı yenidən həyəcan təbili çalmağa səbəb olub.
Hazırda dünya üzrə COVID-19-a yoluxanların sayı 30 milyona çatır. Yoluxanların sayına görə ABŞ və Braziliya hələ də liderliyini davam etdirir. Hindistan isə bu ölkələrin ardınca qərarlaşır. Koronavirusa yoluxanların sayının kütləvi olması İsraildə karantin rejiminin yenidən tətbiq edilməsi ilə nəticələnib. Avropada getdikcə COVID-19 virusunun daşıyıcıları artmaqdadır. Azərbaycanda ikinci dalğanın payız aylarında gələcəyi proqnozlaşdırılır.
Qeyd etdiyimiz kimi, ÜST ikinci dalğa ilə bağlı dünya ölkələrinə müraciət edib. Bəzi ölkələrdə virusun sərt, bəzilərində orta formada keçəcəyi ilə bağlı proqnozlar səsləndirilir. ÜST-in mütəxəssisləri hesab edirlər ki, pandemiyanın ikinci dalğası Azərbaycanda orta-yüngül formada keçəcək.
Maraqlıdır, nə səbəbdən pandemiyanın ikinci dalğasının Azərbaycanda orta-yüngül formada keçəcəyi ilə bağlı fikirlər səslənir?
Virusoloq, Elmi-Tədqiqat Tibbi Profilaktika İnstitutunun Virusologiya şöbəsinin müdiri, dosent Lalə Rüstəmova bildirdi ki, ikinci dalğanın payız aylarında olacağı ilə bağlı fikirlər səslənir: “Nəzərə almaq lazımdır ki, payız aylarında digər kəskin respirator virus infeksiyaları aktiv olur. Adenaviruslar, entenevirus, paraqrip infeksiyaların payız aylarında ikinci dalğaya qoşulması ilə epidemik vəziyyət bir az da kəskinləşə bilər. Kəskin differensasiya olunma getməlidir, hər zökəm və respirator əlamətləri olan şəxsi koronavirus qrupuna aid etmək özü məsuliyyətdir. 6 ayın nəticələrini analiz edib düşünürəm ki, bizim respublikada qabaqlayıcı tədbirlərin aparılmasını nəzərə alsaq, ikinci dalğa orta-yüngül formada keçə bilər. Əlbəttə ki, burada əsas məsələ respirator infeksiyalar aşkar edilən xəstələrin koronaviruslu xəstələrlə qarşılaşmaması məsələsidir. Epidemioloji nəzarətdə ona çalışmaq lazımdır ki, onlar tam ayrı klinikada, ayrı palatada müalicə olunsunlar. Belə bir hal olsa, bu, xəstəxanadaxili infeksiyanı artıracaq, həm də COVID-li xəstənin özünün başqa infeksiyaya yoluxmasına səbəb olacaq. Bu da, sözsüz, vəziyyəti ağırlaşdıra bilər. Hesab edirəm ki, həm tibbi təchizatın, həm də tibbi yardım şəbəkəsinin imkanları çox genişdir. Həmin xəstələrin yerləşdirilməsi üçün imkanlar, palatalar, ayrıca xəstəxanalar var. Bu amilləri nəzərə alaraq, düşünürəm ki, koronavirus infeksiyası bir qədər yüngül keçə bilər. İkinci dalğanın olması ehtimal olsa belə, ən azı, onun qarşısını alan əks- epidemik tədbirlərə hazırıq".
Günel CƏLİLOVA
.jpg)