23/09/2020 00:28
728 x 90

ÜST-dən şok bəyanat, karantin rejiminin ziyanı daha çox imiş – Azərbaycandan reaksiyalar...

Pərvanə Vəliyeva: “Karantin rejiminin sərtləşdirilməsinə qarşı alternativ yol odur ki...”

img

Pandemiya ilə əlaqədar olaraq, Azərbaycan da daxil olmaqla, dünyanın əksər ölkəsində sərtləşdirilmiş karantin rejimi elan edilib. Doğrudur, ölkəmiz son dövrlər karantin qaydalarının yumşaldılması prosesini həyata keçirsə də, bir sıra dövlətlərdə, eləcə də bizimlə qonşu respublikalarda sərtləşdirilmiş karantin rejimi ya davam etdirilir, ya da bunun gerçəkləşdiriləcəyi deyilir.

“Qafqazinfo” xəbər verir ki, Milli Məclisin Səhiyyə komitəsinin sədr müavini, tibb elmləri doktoru Rəşad Mahmudov APA TV internet kanalında yayımlanan “APAralel” verilişində çıxışı zamanı koronavirus pandemiyasına görə dünyada və Azərbaycanda bundan öncə atılan addımlar və qarşıda bizi gözləyən proseslərlə bağlı danışıb. R.Mahmudov qeyd edib ki, yenidən alovlanmalar olduğu zaman hər bir ölkəyə ÜST tərəfindən tövsiyələr verilib: “Artıq konkret bir qərar verildi. Ağır, sərtləşdirilmiş karantin rejimlərinin COVID-19 virusu ilə mübarizədə heç bir faydasının olmadığı, hətta zərərinin daha çox olduğu sübut edildi. Əslində, zərərinin çox olduğunu hamı bilirdi. Amma tibbi nöqteyi-nəzərdən faydasına görə karantin elan olunurdu, amma görüldü ki, faydası da yoxdur. Bundan sonra ən ağır, pik hadisələr olsa belə, parklarımız bağlanmayacaq”.

Doğrudanmı sərtləşdirilmiş karantin rejiminin tətbiq edilməsi COVID-19-la mübarizədə effekt vermir? Belədirsə, mütəxəssislər ehtimal edilən yeni dalğa zamanı hansı tədbirləri uyğun görürlər?

  • “Hər yer açıq olsun, amma həmin yerlərdə ciddi qadağalar tətbiq edilsin”

“Sağlamlığa Xidmət” İctimai Birliyinin icraçı direktoru Pərvanə Vəliyeva “Bakı-Xəbər”ə bildirdi ki, insan bir cinayət törətdikdə ona verilən cəza azadlıqdan məhrumetmə olur: “İnsan üçün ağır cəza onun azadlıqdan məhrum edilməsidir. Bilirsiniz ki, sərt karantin rejimi zamanı insanların evdən bayıra çıxmasına məhdudiyyət qoyulur, müəyyən zaman ərzində ona zəruri şeylər almaq üçün icazə verilir. Ümumiyyətlə, sərt karantin rejimi insanların psixikasına çox ciddi təsir göstərir. Əlbəttə, insanları ağır karantin rejimində saxlamamaqla təhlükədən qorunmaq üsulları ilə bağlı maarifləndirmək, bu vacib məsələni onların şüuruna yeritmək lazımdır. Sərt karantin rejimi tətbiq edilmədən maska taxmağı, sosial məsafə saxlamağı, sanitar-gigiyena qaydalarına əməl etməli olduqları daha çox təbliğ edilməli və bunun onlarda artıq vərdiş halına keçməsinə nail olmaq lazımdır. Rəşad doktor doğru vurğulayıb ki, sərtləşdirilmiş karantin rejiminin faydasından çox ziyanı var. Doğrudan da belədir. Çünki sərtləşmə artdıqca, bu, insanlarda panika yaranmasına səbəb olur ki, yoluxanların sayı artırsa, biz də yoluxacağıq. Sərtləşmə baş verəndə insanlar evdən bayıra çıxa bilmirlər, müəyyən şərtlər daxilində yaxınları ilə görüşə, ünsiyyət qurub özlərindən neqativ enerjini ata bilmirlər. Karantin rejiminin sərtləşdirilməsinə qarşı alternativ yol odur ki, qorunma üsulları təbliğ edilsin, bu istiqamətdə maarifləndirmə işi artırılsın, eyni zamanda, hər yer açıq olsun, amma həmin yerlərdə ciddi qadağalar tətbiq edilsin”.

P.Vəliyevanın fikrincə, Gürcüstanda olduğu kimi, Azərbaycanda da müəyyən qadağalar qoyulsun və əsasən də maskadan istifadə etməyən xidmət sahələrinin əməkdaşları və müştərilər böyük məbləğdə cərimə edilsinlər.

İradə SARIYEVA

Son xəbərlər