18/09/2020 22:03
728 x 90

Bölgələrin internet təminatı səviyyəsində problemlər onlayn dərslərə təsir göstərəcək…

img

Artıq yeni tədris ili başlayıb, ölkəmizdə hibrid təhsilalma formasından istifadə edilir. Şagirdlərin bölgülər üzrə əyani və onlayn şəkildə təhsil almağına start verilsə də, indiyə qədər də öz həllini tapmayan internet problemi üzündən müəllim və şagirdlərin bir hissəsi arasında dərs əlaqələri yarana bilmir.

Ölkəmizdə internet təminatının aşağı səviyyədə olması virtual, onlayn tədrisin həyata keçirilməsinə ciddi əngəl törədir. Çoxlu sayda müəllim və şagird internet probleminə görə onlayn dərslərə qatılmaq məsələsində çətinliklərlə qarşılaşır. Tədris ili hələ bir neçə gündür başlanıb. Tədris prosesi pandemiya şəraitinə uyğun şəkildə qurulub. Proqnozlara görə də qarşıda bizi pandemiyanın yeni dalğası gözləyir. Bu halda, indidən internet təminatında yaranan problemləri aradan qaldırmaq lazımdır ki, sabah uşaqlarımız tədrisdən kənar düşməsinlər. Kəsintisiz internetin nəinki paytaxta, bütün respublikada təmin edilməsi hava-su kimi lazımdır. Gərək əlaqədar qurumlar bu məsələ ilə ciddi məşğul olsunlar ki, qarşıdakı aylarda analoji problemlə qarşılaşmayaq.    

  • İlqar Orucov: “Regionlarda internet təminatında problemlərin olması valideynlərdə narazılıq yaradır”

Gənc Alim, Aspirant və Magistrlər Cəmiyyətinin sədri, fizika-riyaziyyat üzrə fəlsəfə doktoru, Təhsil Nazirliyi yanında İctimai Şuranın məsul katibi İlqar Orucov bizimlə söhbətində bildirdi ki, bu problemin həllinə operativ şəkildə yanaşılmalıdır. İ.Orucov hesab edir ki, hazırkı dövrdə ənənəvi təhsili əvəz edə biləcək təhsil forması yoxdur, bu səbəbdən də mövcud üsul seçilib. “Hazırkı tədris ili üçün distant və qarışıq təhsil formalarının tətbiq edilməsi ilə bağlı qərarı doğru hesab edirəm. Bu qərar müvəqqəti bir dövrü əhatə edir. Distant təhsil modeli orta təhsil sistemində effektiv deyil. Bununla belə, hazırkı məqam təhsil alanları itirməmək üçün bunu diktə edir. Amma regionlarda internet təminatında problemlərin olması valideynlərdə narazılıq yaradır. Ona görə də təhsil alanlar üçün internet tariflərində güzəştlərin tətbiq edilməsi vacibdir. Eyni zamanda, təhsil verənlərin pulsuz internetlə təminatı çox vacibdir” - deyə müsahibimiz qeyd etdi.

  • Məlahət Mürşüdlü: “Şagirdin, yaxud müəllimin evdə interneti kifayət qədər sürətli deyilsə, bu, dərsin keyfiyyətinə təsir edəcək”

Digər təhsil eksperti Məlahət Mürşüdlünün sözlərinə görə də bu problem kökündən həll edilməlidir: “Keçən tədris ilinin sonlarına yaxın pandemiya ilə əlaqədar olaraq məktəblər müvəqqəti olaraq bağlandı və müəllimlər bir sıra proqramlardan istifadə edərək onlayn dərslərə başladılar. Lakin çox təəssüflər olsun ki, internet təminatının aşağı olması nəticəsində bir sıra problemlər yarandı. Şagirdlərin xeyli hissəsi onlayn tədrisdən kənarda qaldı. Xüsusən də rayon yerlərində bu hal özünü daha qabarıq formada göstərdi. Tədris ili yeni başlayıb və internet problemi operativ şəkildə həll edilməlidir ki, qarşıdakı aylarda problemlə üzləşməyək. Kəsintisiz internetin təmin edilməsi çox vacibdir və əlaqədar qurumlar bununla bağlı addımlar atmalıdırlar. Şagirdin, yaxud müəllimin evdə interneti kifayət qədər sürətli deyilsə, bu, dərsin keyfiyyətinə təsir edəcək”.

İradə SARIYEVA

Son xəbərlər