“Biz pandemiyanın fəsadlarına, iqtisadi tənəzzülə, neft gəlirlərimizin azalmasına baxmayaraq, məktəb tikintisini, ali məktəblərin tikintisini davam etdirdik”. Bu fikirlər Prezident İlham Əliyevin yeni dərs ilinin başlanması və Bilik Günü münasibətilə müraciətində yer alıb.
Ölkə başçısı qeyd edib ki, bu il 147 məktəbin tikintisi nəzərdə tutulur: “Onların böyük hissəsi artıq hazırdır və Bilik Gününə hazır vəziyyətə gətirilib. Bir neçə məktəbin açılışı bu ilin sonuna qədər nəzərdə tutulur. Onu da bildirməliyəm ki, 147 məktəbin 45-i Heydər Əliyev Fondunun təşəbbüsü ilə inşa edilib. Artıq 17 ildir ki, Heydər Əliyev Fondu bu sahədə çox böyük işlər görür. Bildiyiniz kimi, Azərbaycanda yeni məktəblərin tikintisinin geniş vüsət alması Heydər Əliyev Fondu tərəfindən başlanmış “Yeniləşən Azərbaycana yeni məktəb” proqramı çərçivəsində həll olunmuşdur.
Son 2-3 il ərzində biz kiçik kəndlərdə modul tipli məktəblər inşa edirik. Bu il modul tipli 60 məktəbin tikintisi təmin edilir və ediləcəkdir. Beləliklə, cəmi bir il ərzində 150-yə yaxın məktəb tikilir və əsaslı təmir edilir. Bildirməliyəm ki, son 17 il ərzində, bütövlükdə, Azərbaycanda 3700-ə qədər məktəb tikilib və əsaslı şəkildə təmir edilib. Bu, bizim məktəb fondumuzun böyük əksəriyyətini təşkil edir. Çünki Azərbaycanda hazırda 4500-ə qədər məktəb var, onların 3700-ü tam yeni görkəm almışdır və yenidən inşa edilmişdir. Odur ki, təhsilə qoyulan vəsait hər bir ölkənin gələcəyinə, müstəqilliyinə, təhlükəsizliyinə qoyulan vəsaitdir. Təsadüfi deyil ki, Azərbaycanda büdcə xərcləri arasında təhsil sahəsinə ayrılan xərclər ikinci yerdədir. Əgər biz müharibə şəraitində olmasaydıq, birinci yerdə olardı. Çünki hazırda ən böyük xərclərimiz müdafiə sahəsi ilə bağlıdır. Bu da təbiidir”.
Göründüyü kimi, pandemiya dövründə belə, məktəb tikintisi dayanmayıb. Hansı ki, bu çox önəmli uğurdur.
“Bu, təhsilə ölkə başçısının verdiyi önəmin göstəricisidir”
Məsələyə münasibət bildirən təhsil sahəsi üzrə ekspert, tarix üzrə elmlər doktoru, professor Məhərrəm Zülfüqarlının sözlərinə görə, Prezident İlham Əliyev hər zaman ölkədə təhsilin inkişafına xüsusi önəm verir: “Pandemiya şəraitini müharibə şəraiti ilə müqayisə etmək lazımdır. Belə bir şəraitdə məktəb tikintisini davam etdirmək çox böyük uğurdur. Bu, təhsilə ölkə başçısının verdiyi önəmin göstəricisidir. Nəzərə almaq lazımdır ki, pandemiya ilə əlaqədar bir sıra ölkələr sosial layihələri təxirə salıblar. Yaponiya İkinci Dünya Müharibəsindən məğlub dövlət olaraq çıxdı. Ancaq onlar böyük dağıntılara baxmayaraq, qısa müddətdə inkişafa nail oldular. Nəticədə Yaponiya dünyanın ən inkişaf etmiş ölkələrindən biri oldu. Nəyin hesabına? Təhsilin hesabına. Bunun əsas səbəbi yapon ailəsinin güclənməsindən başlanan islahat idi. Prezident məlum müraciətində Azərbaycan ailəsini gücləndirmək məsələsinə xüsusi önəm verdi. Yəni Azərbaycan ailəsini gücləndirmək strategiyası idi ki, bu minvalla, təhsilə böyük önəm verilsin. Vətən, millət üçün sədaqətli vətəndaşlar yetişdirəcək. Prezidentin göstərdiyi istiqamətlər üzrə Azərbaycan mühüm addımlar atacaqsa, qısa müddətdə biz dünyanın inkişaf etmiş ölkələrindən birinə çevrilə bilərik. Ona görə də biz səylərimizi artırmalıyıq. Çünki kadr siyasətində əvvəllər yol verilmiş nöqsanlar hələ də mənfi təsirini göstərməkdədir. Ona görə də ölkə başçısının məlum taleyüklü çıxışından irəli gələn tezislərin həyata keçirilməsi kadr islahatlarından keçir. Bu, vətənə, millətə bağlı, dövlətə sədaqətli kadrların önə çəkilməsini tələb edir”.
Ekspertin fikrincə, kadr siyasətində nöqsanlar aradan qaldırılsa, biz təhsil sahəsində çox ciddi uğurlar əldə edəcəyik.
Vidadi ORDAHALLI
