20/09/2020 11:03
728 x 90

Bakıda sərnişin avtobuslarının öz-özünə alışması - səbəblər axtarılır, “Bakubus” nə izah verir...

img

Təsəvvür edin ki, avtobusda getdiyiniz zaman nəqliyyat vasitəsi qəfil od tutub yanır. Bu mənzərəni yaşamağın özü nə qədər dəhşətlidirsə, kənardan bunu müşahidə etmək də bir o qədər əndişə yaradır. Son iki-üç həftə ərzində sərnişindaşıma avtobuslarında yanğın hadisələrinin baş verdiyinə dair məlumatlar alırıq.

88A nömrəli müntəzəm marşrut xətti üzrə 99JH038 dövlət qeydiyyat nişanlı avtobusda yanğın hadisəsi olub. Bildirək ki, son 15 gündə sayca ikinci avtobusdur ki, bu aqibətlə üzləşir.

Xəttə buraxılan avtobuslar hər səhər hərəkətdən əvvəl texniki baxışa cəlb olunurmu, cəlb olunursa, bu olayların baş verməsinin səbəbi nədir?

  • Mais Ağayev: “Yanğının səbəbləri araşdırılır”

Bakı Nəqliyyat Agentliyinin (BNA) mətbuat xidmətinin rəhbəri Mais Ağayev baş verən hadisə ilə bağlı “Bakı-Xəbər”ə bildirdi ki, hadisə avtobus başlanğıc dayanacaq məntəqəsindən depoya qayıdan zaman baş verib. “Belə ki, avtobusda texniki nasazlıq hiss edən sürücü depoya qayıtmaq istəyib. Avtobus boş olub və xəsarət alan yoxdur. Yanğının səbəbləri araşdırılır və nəticəsi barədə ictimaiyyətə əlavə məlumat veriləcək”.

Avtobusların xəttə buraxılmazdan əvvəl texniki baxışdan keçirildiyini deyən M.Ağayevin sözlərinə görə, yanğın “BakuBus”a aid olan avtobusda baş verib.

“BakuBus”un mətbuat xidmətinin rəhbəri Qabil Babayevlə də əlaqə saxladıq. Lakin Q.Babayev hadisə ilə bağlı heç bir şərh vermək istəmədiyini və bununla bağlı “BNA ilə əlaqə saxlayın” dedi.

BNA-nın mətbuat xidmətinin rəhbəri Mais Ağayev “Bakupost”a isə bildirib ki, 1 və 15 sentyabr tarixlərində “BakuBus” MMC-nin istismarında olan iki sərnişin avtobusunda baş verən yanğın hadisələri ilə bağlı araşdırma aparılıb. Mütəxəssislərin ilkin rəyinə əsasən, yanğının yüksək təzyiqli yağ borusunun pərçimdən qopması nəticəsində baş verdiyi ehtimal olunur.

Onun sözlərinə görə, hadisənin istehsal xətasından qaynaqlandığı ehtimal edildiyindən, artıq Fransanın İVECO şirkəti ilə danışıqlar aparılır. Şirkətin ixtisaslı mütəxəssisləri Bakıya dəvət edilib. “Məlumat üçün bildiririk ki, 2015-ci ilin sentyabrından müntəzəm sərnişindaşımaya cəlb edilən “BakuBus” avtobuslarında gündəlik və dövri texniki qulluq, təmir və dezinfeksiya işləri aparılır. Bu işlər istehsalçı şirkət tərəfindən təlim keçilən və sertifikatlaşdırılmış texniki personal tərəfindən yerinə yetirilir.

Qeyd edək ki, eyni markalı avtobuslarda buna bənzər hadisələr 2018-ci ildə Fransada, 2019-cu ildə isə İtaliyada baş verib”, - deyə M. Ağayev vurğulayıb.

Mətbuatda “BakuBus”a aid avtobuslarda baş verən yanğın hadisələrinə şərh verən ekspertlər hesab edirlər ki, 15 gündə sayca ikinci avtobusda yanğın hadisəsinin olması “BakuBus” avtobuslarının iki aydan artıqdır fasiləsiz istismarı ilə əlaqədardır. Mütəxəssislərin fikrincə, metronun işləmədiyi 72 gün ərzində “BakuBus” MMC-nin depolarındakı avtobuslar tam sayda daşımalara cəlb olunub. Yəni qarajlarda ehtiyat avtobus saxlanmırdı, çünki yüksək sərnişin tələbatını qarşılamaq lazım idi. Bu isə, öz növbəsində, avtobusların dövri təmir işlərinin icrasına təsir edir. Bu da mütəxəssislərin şərhidir.

  • Elmar Nurəliyev: “Maşında nasazlıq, problem olubsa, onu texniki müayinədən keçirməli olan...”

Təhlükəsizlik üzrə ekspert Elmar Nurəliyev “Bakı-Xəbər”ə bildirdi ki, sərnişindaşıma avtobusları xəttə buraxılmamışdan əvvəl texniki müayinədən keçirilməlidir. “Şirkətlərdə bu işlə texniki şöbə məşğul olur. Bu şöbə tərəfindən avtobusun texniki cəhətdən saz olması, istismara yararlı olub olmaması, salondakı oturacaqların, avtobusun şüşəsinin qaydasında olması, eləcə də sürücünün maşını idarə edib-etməmək iqtidarında olması müəyyən edilir. Bundan sonra sürücünü işə buraxırlar. Eyni zamanda da əgər maşında hər şey texniki cəhətdən öz qaydasındadırsa, buna müsbət rəy verən texniki şöbənin işçisi sürücünün icazə vərəqəsinə imza atır ki, maşın müayinədən keçib, hər şey qaydasındadır, avtobus sərnişindaşımanı həyata keçirə bilər. Son baş verən olaya obyektiv yanaşsaq, deyə bilərəm ki, maşın texnikadır və hər bir texnikada müəyyən problemlər ola bilər. Bu mümkündür. Amma bunun yaranma səbəbləri var. Avtobusa lazımi qulluq edilməyib, dəyişən detalların yerinə keyfiyyətsiz detallar qoyulub, yaxud da maşında nasazlıq ola-ola, xəttə çıxarılıb. Elə detallar var ki, onların istifadəsi limitlədir, ola bilsin, onun limiti bitib, dəyişdirilməyib. Burada səbəblər çox ola bilər. Maşında nasazlıq, problem olubsa, onu texniki müayinədən keçirməli olan adam yoxlamadan xəttə buraxıbsa, bu işdə o məsuliyyət daşıyır”. 

E.Nurəliyevin sözlərinə görə, texniki müayinədən keçirilmədən xəttə buraxılan və hərəkət edərkən texniki problemlə üzləşən sərnişindaşıma nəqliyyatında yaranan bu kimi problemlər qəzaya səbəb ola bilər: “Nəzərə alsaq ki, sərnişin avtobuslarında onlarla insan olur, mütləq qaydada bu işə ciddi yanaşılmalıdır” - deyə müsahibimiz qeyd etdi.

Bütün hallarda, burada söhbət sərnişinlərin təhlükəsiz daşınmasından gedir və hadisə zamanı nəqliyyat vasitəsində sərnişinlər olsaydı, bu daha böyük faciə yaradardı. Sərnişindaşıma xidmətini həyata keçirən şirkətlər bütün məsələlərdə sərnişinlərin təhlükəsizliyini nəzərə almalıdırlar ki, texniki nasazlıqlar insan tələfatına səbəb olmasın.

İradə SARIYEVA

Son xəbərlər