20/09/2020 17:37
728 x 90

Bakı dünyanın məşhur parklar şəhərləri yolunda sürətlə qabağa çıxır - təkcə son illərdə Prezidentin açdığı parklar...

Aytəkin Kamranqızı: “Paytaxt Bakının, eləcə də ölkəmizin hər yerinin abadlaşdırılması, yeni istirahət parklarının salınması, tarixi irsimizin qorunması cənab Prezidentin həmişə diqqət mərkəzindədir”

img

Məlum olduğu kimi, son illər paytaxt Bakıda böyük quruculuq-abadlıq işləri həyata keçirilib. Nəinki şəhərin mərkəzində, həmçinin, ucqar qəsəbələrində yeni parklar salınır, təmir-bərpaya ehtiyacı olan parklar tamamilə yenidən qurulur, bütün infrastrukturları ilə insanların ixtiyarına verilir.

Bildiyimiz kimi, sentyabrın 14-də Prezident İlham Əliyev Bakının Əmircan qəsəbəsində Murtuza Muxtarov adına parkda yaradılan şəraitlə tanış olub. Murtuza Muxtarov adına park açılışdan sonra artıq istifadəyə verilib.

Açılışda bildirilib ki, qəsəbənin Cabir Əliyev küçəsində yerləşən keçmiş “7 Qoç” parkı 1992-ci ildə salınıb. Uzun illər parkın ərazisində heç bir təmir işləri görülməyib. Qəsəbə sakinlərinin müraciəti nəzərə alınaraq, parka əslən Əmircandan olan, XIX əsrdə ilk qazma avadanlığı zavodu açan və qazma dəzgahı ixtira edən xeyriyyəçi Murtuza Muxtarovun adı verilib, burada onun büstü qoyulub.

Heydər Əliyev Fondunun dəstəyilə iki ay ərzində burada genişmiqyaslı abadlıq işləri aparılıb, gözəl və müasir park yaradılıb.

Bildirdiyimiz kimi, son illər paytaxtımızda, eləcə də Azərbaycanın bölgələrində saysız-hesabsız parklar inşa edilib. Mübaliğəsiz deyə bilərik ki, bu gün Bakı dünyanın məşhur parklar şəhərləri sırasında özünə yer tutmaqdadır. Davamlı olaraq bu istiqamətdə işlər görüldüyü üçün, tikilən və tikintisi planlaşdırılan parklar da az deyil.

  • “Ölkəmizdə son illər park quruculuğuna, yaşıllaşdırma işinə xüsusi diqqət yetirilir”

Sosioloq Aytəkin Kamranqızı bizimlə söhbətində bildirdi ki, son illər ölkəmizdə ciddi quruculuq, abadlıq işlərinin aparılması müasir dövlət quruculuğu siyasətinin mühüm tərkib hissəsinə çevrilib.    

Müsahibimiz vurğuladı ki, son 10-15 ildə paytaxtda və regionlarda yaşıllaşdırma, abadlaşdırma, parksalma işləri daha qabarıq şəkildə özünü göstərir. Əsaslı təmirdən sonra yenidən istifadəyə verilən Dənizkənarı Milli Park, 2009-cu ildə bərpa işləri aparılan Filarmoniya bağı (Qubernator bağı), 2013-cü ildə açılan, 6 hektar ərazidə salınmış və müasir parklardan olan Dədə Qorqud parkı, Heydər Əliyevin abidəsi ucaldılan memarlıq kompleksinin yerləşdiyi, Bakının ən gözəl parklarından biri olan, Heydər Əliyev Sarayının qarşısında yerləşən Heydər Əliyev adına park, əsaslı yenidənqurmadan sonra 2011-ci ildə açılan Zabitlər parkı, dövlət başçısının Bakının park və xiyabanlarının əsaslı təmiri və yenidən qurulması ilə bağlı tapşırığına əsasən, 2013-cü ildə əsaslı şəkildə yenidən qurulan və sözün həqiqi mənasında, yeni görkəmdə paytaxtımızın sakinlərinin və qonaqlarının istirahət etdiyi Bakının Dağüstü parkının bu yöndə görülən işlərə əyani misal olduğunu bildirən ekspertin sözlərinə görə, bu parklar paytaxtımızı daha da gözəlləşdirir. Ekspert, həmçinin, qeyd etdi ki, 2010-cu ildə əsaslı şəkildə yenidən qurulan, Gəncə şəhərində yerləşən “Xan bağı” mədəniyyət və istirahət parkı, Tovuz şəhərində yerləşən və 10 hektar ərazisi olan Heydər Əliyev parkı, o cümlədən də digər bölgələrdə yaradılan Heydər Əliyev parkları görülən işlərdəndir. “Ölkəmizdə  son illər park quruculuğuna, yaşıllaşdırma işinə xüsusi diqqət yetirilir. Bir vaxtlar qurumuş ağacları, sınıq-salxax oturacaqları ilə insanları təəssüfləndirən parklardan əsər-əlamət qalmayıb. Bu gün paytaxtımızda saysız-hesabsız abad, bura istirahətə gələn insanların rahatlığını təmin edən parklar var ki, bu parklar da ölkə başçısı İlham Əliyevin təşəbbüsü, tapşırığı ilə abadlaşıb. 2019-cu ildə Prezident İlham Əliyevin iştirakı ilə Bakının Atatürk prospektində yerləşən parkın əsaslı yenidənqurmadan sonra açılışı oldu. Sirr deyil ki, Prezidentin tapşırıq və göstərişlərinə əsasən, paytaxtımızda icra olunan layihələr nəticəsində Bakı dünyanın ən gözəl şəhərlərindən birinə çevrilib, paytaxtımız gündən-günə abadlaşır, müasirləşir və yenilənir. Bu baxımdan da yeni park və xiyabanların salınması, mövcudlarının yenidən qurulması, sosial obyektlərin inşası, ictimai yerlərin istifadəyə verilməsi bu məsələdə xüsusi rol oynayır. Cənab Prezident həmin parkın açılışında  bildirib: “...Ümumiyyətlə, Bakı son illər ərzində bağlar və parklar şəhərinə çevrilib. Deyə bilərəm ki, parkların sayına görə biz dünya miqyasında ən qabaqcıl yerlərdəyik... İndi Bakı dünyanın ən gözəl şəhərlərindən biridir. Baxın, son illərdə şəhərimizdə nə qədər park salınıb. İlk növbədə, bizim ən böyük parkımız bulvar. Əvvəllər bulvarın uzunluğu 3 kilometr idi, indi 15 kilometrdir. Hər tərəf yaşıllıq, hər tərəf gözəl, hər tərəf abad. Heydər Əliyev Mərkəzinin və Konqres Mərkəzinin ətrafında 20 hektarı əhatə edən böyük bir park var. İndi uşaqlar, yaşlı nəsil orada istirahət edir. Yusif Səfərov küçəsindəki park. Orada da yöndəmsiz binalar var idi, infrastruktur dağılmışdı. Orada da park salındı. Yəni bu abadlıq-quruculuq işləri vətəndaşlar üçündür. Çünki vətəndaşlar ictimai yerlərdən istifadə etməlidirlər. Bu parkda da çox gözəl şərait yaradılıb”.

Cənab Prezident bidirib ki, şəhərin hər yerində gözəl parklar, ictimai zonalar olmalıdır və bunu yaradırıq. Doğrudan da son illər bu istiqamətdə işlər sürətlənib. Bakı həm özünün abadlığı, həm memarlığı, həm də müasir görünüşü ilə dünyanın ən önəmli şəhərlərindən birinə çevrilib. Qeyd etdiyim kimi, son illər ölkəmizin paytaxtı Bakı şəhəri, sözün həqiqi mənasında, geniş quruculuq meydanına çevrilib. Şəhərin abadlaşdırılması sahəsində böyük işlər görülüb və bu proses uğurla davam etdirilir”.

Ekspert qeyd etdi ki, keçən ilin oktyabr ayında Bakının Nəsimi rayonunda 28 May, Dilarə Əliyeva və Fikrət Əmirov küçələrinin kəsişməsində yeni parkın istifadəyə verilməsi də mühüm hadisələrdən biridir. Köhnə “Sovetski” məhəlləsində, Abdulla Şaiq, Nəriman Nərimanov və Mirzə Ağa Əliyev küçələrində yerləşən və birinci hissəsinin açılışı 22 may 2019-cu il tarixində gerçəkləşdirilən Bakının mərkəzi parkının bu yöndə həyata keçirilən böyük layihələrdən biri olduğunu deyən A.Kamranqızının sözlərinə görə, vətəndaşların istirahətinin, asudə vaxtlarının səmərəli təşkil edilməsində parkların rolu böyükdür. Bu ilin mart ayında Şah İsmayıl Xətainin heykəlinin köçürüldüyü yeni salınmış parkdan da danışan sosioloq qeyd etdi ki, böyük tarixi şəxsiyyət Şah İsmayıl Xətainin heykəli iki magistral yolun ortasında yerləşdiyi üçün, abidəni insanların ziyarət etməsi üçün problem yaranırdı, ancaq ölkə başçısının qayğısı nəticəsində heykəl köçürüldü və abad bir parkda qoyuldu. “Bakı ən abad, ən gözəl parklara sahibdir və xarici turistlər də bizim parkları bütün cəhətlərinə görə çox bəyənirlər. Məlumdur ki, paytaxt Bakının, eləcə də ölkəmizin hər yerinin  abadlaşdırılması, yeni istirahət parklarının salınması, tarixi irsimizin qorunması cənab Prezidentin həmişə diqqət mərkəzindədir” - deyə ekspert bildirdi.

İradə SARIYEVA

Son xəbərlər