20/09/2020 17:35
728 x 90

Restoran sahibləri oktyabr-noyabr ayları üçün əsl “toy ajiotajı” yaradırlar – dünya dövlətlərində yeni virus dalğası şəxsi mənfəətdən aşağı tutulur

img

Bir müddət əvvəl karantin qaydaları qorunmaqla açıq məkanda fəaliyyət göstərən kafe və restoranların da açılmasına icazə verilib. Bu məkanlarda sosial məsafənin saxlanması və qaydalara əməl olunmasına aidiyyəti qurumlar tərəfindən daim nəzarət olunur. Tələb olunan qaydalara əməl olunmadıqda isə cərimələr tətbiq edilir.

Beləliklə, restoran və kafelərin açıq məkan şəraitində fəaliyyət göstərməsinə icazə verildikdən sonra əksəriyyət toy-nişan məclislərinə də yaxın vaxtlarda icazə veriləcəyinə ümid edir. Bu məsələni böyük ümidlə gözləyənlər arasında şou-biznes əhli də çoxluq təşkil edir. Lakin Nazirlər Kabineti yanında Operativ Qərargah hələlik toy və nişanların keçirilməsinin risqli olduğunu qeyd edir. Bəzi ekspertlər bildirirlər ki, kafe və restoranların açıq məkanlarda fəaliyyətinə icazə verildiyi üçün toy və nişan tədbirlərinin də açıq məkanlarda keçirilməsinə icazə vermək olar və bununla bağlı Türkiyə təcrübəsini əsas gətirirlər.

Azərbaycana gəldikdə isə, artıq 7 aydan çoxdur ölkədə toyların keçirilməsi qadağandır. Ekspertlər qeyd edirlər ki, bu qadağa uzandıqca, gələcəkdə bir çox problem ortaya çıxa bilər. Bu səbəbdən bəzi rəsmilər də toylara müəyyən şərtlər daxilində icazə verilməsinin tərəfdarı olduqlarını qeyd edirlər.

Onu da bildirək ki, toylara icazənin verilməsi ilə bağlı son günlər bəzi millət vəkillərinin təkliflərindən sonra şadlıq evlərinə sifarişlər artıb. Toy etmək istəyənlər oktyabr və noyabr ayları üçün sıraya düzülüblər. Növbə üstündə əməlli-başlı mübahisə düşür desək, yalan olmaz. Məhərrəmlikdən sonra toyların təşkilinə icazə veriləcəyi ilə bağlı yayılan xəbərlər vətəndaşlarda əməlli-başlı ümid yaradıb. Son günlər şadlıq evlərinə edilən zənglərin sayı və toy etmək üçün yazılan növbələr xeyli artıb.

Onu da qeyd edək ki, dünya yenidən pandemiyaya qayıdır. Artıq bəzi ölkələrdə koronavirusun ikinci dalğası başlayıb. Gürcüstanda pandemiyanın ikinci dalğası elan olunub. Baş nazir Q.Qaxariya bildirib ki, ölkədə epidemioloji vəziyyət pisləşməyə başlayıb. İsraildə sutka ərzində 4 minə yaxın insanda COVID-19 aşkar edilib. Hökumət 3 həftəlik sərt karantin elan edib. Vətəndaşlara evlərindən 500 metrdən artıq uzaqlaşmaq qadağandır, restoranlar, otellər, idman zalları və hovuzlar bağlanır. Avstriya ilə Çexiya da bənzər addımlar atıblar. Türkiyə, Rusiya və digər ölkələrdə yoluxma hallarının artması və yeni məhdudiyyətlərin tətbiqi gündəmdədir. Əksər dünya ölkəsi sərt karantin rejimi tətbiq etdiyi halda, bizimkilər niyə sağlamlıqlarını düşünmür, dəm-dəsgahlı toy arzusundadırlar. Olmazmı ki, ailə qurmaq istəyən gənclər sadə nikahla izdivaclarını qursunlar.

Nəzərə almaq lazımdır ki, koronavirus, əsasən, hava-damcı yolu ilə yayıldığından, bu virusun insanların sıx toplaşdığı, ara məsafəsi saxlamadığı, eləcə də tibbi maskadan istifadə etmədiyi yerlərdə yayılma risqi yüksəkdir. Toy mərasimləri elə bir adətlərimizdəndir ki, orada insanlar sıx toplaşır, şənlənir, yemək yeyirlər. Toylarda maskadan istifadə mümkün deyil. İnsanlar rəqs edir, bir-birilə görüşür, gözaydınlığı verirlər. Belə bir mühitdə virusun yayılmasına şərait yaranır. Danılmaz faktdır ki, Azərbaycanda toylar təkcə ailə üzvlərinin iştirakı ilə keçirilmir. Toya qohum-əqrəba, dost-tanış dəvət olunur. İnsan sayının çox olması virusa yoluxanların sayının artmasına səbəb olur.

Bəllidir ki, hazırda da əksər insan karantin qaydalarına əməl etməkdən yayınır. Küçəyə çıxan zaman insanların bir-birilə yenə də qucaqlaşıb, öpüşdüyünün şahidi oluruq. Bəzi insanlar karantin qaydalarına əməl etməyərək, özlərini qəhrəman sayırlar. Bu cür vəziyyətdə toylara icazə verilməsi mümkün deyil. Bəli, toyların keçirilməsinə ehtiyac var. Amma bizim xalq hələ buna hazır deyil.

Günel CƏLİLOVA

Son xəbərlər