Bir sıra dünya dövlətləri pandemiyanın ikinci mərhələsinin başlandığını rəsmən elan etdilər – təhlükə Azərbaycana yaxınlaşır...
Tibbi ekspertlərin proqnozlaşdırdığı kimi, sentyabr ayından bir çox ölkədə koronavirusa yoluxanların sayında kəskin artım başlayıb. Artıq bunun əlamətləri özünü göstərir. Təsadüfi deyil ki, bir sıra dövlətlər pandemiyanın ikinci dalğasının başlamasını rəsmən elan ediblər. Təcrübə göstərir ki, xüsusi karantin rejimindən sonra tətbiq olunan yumşalmalar koronavirus infeksiyasına yoluxma hallarının artmasına səbəb olur.
Gürcüstanda pandemiyanın ikinci dalğası elan olunub. Baş nazir Q.Qaxariya bildirib ki, ölkədə epidemioloji vəziyyət pisləşməyə başlayıb. İsraildə sutka ərzində 4 minə yaxın insanda COVID-19 aşkar edilib. Hökumət 3 həftəlik sərt karantin elan edib. Vətəndaşlara evlərindən 500 metrdən artıq uzaqlaşmaq qadağandır, restoranlar, otellər, idman zalları və hovuzlar bağlanır. Avstriya ilə Çexiya da bənzər addımlar atıblar. Türkiyə, Rusiya və digər ölkələrdə yoluxma hallarının artması və yeni məhdudiyyətlərin tətbiqi gündəmdədir.
Avstriyada koronavirusa yoluxma halları kəskin şəkildə artıb. Avqust ayının əvvəlində gündəlik yoluxma hallarının sayı 100-dən aşağı olduğu halda, iki həftə öncə bu göstərici 350-yə qalxıb və hazırda 1000 nəfərə çatıb. Federal səhiyyə naziri gündəlik artımın çox yuxarı olduğunu və ikinci dalğanın baş verməməsi üçün bütün qüvvələrin səfərbər edilməsinə tələbat yarandığını bildirib. Federal Kansler Sebastian Kurts isə sentyabrın 13-də Avstriya Mətbuat Agentliyinin sorğusuna cavab olaraq, hazırda artımı pandemiyanın ikinci dalğasının başlanğıcı kimi dəyərləndirib. Əhaliyə müraciət edən Kansler sosial təmasları azaltmağa, maskadan istifadə etməyə, sosial məsafə saxlamağa və digər qaydalara ciddi şəkildə riayət etməyə çağırıb. O qeyd edib ki, əhalinin həmrəyliyi sayəsində gələn ilin yayınadək həyat öz normal axarına dönə bilər: “Lakin həmin vaxta kimi hər birimiz üçün çətin payız və qış mövsümü gözlənir. Ona görə də bizdən tələb olunur ki, yaz aylarında olduğu kimi, intizam və qarşılıqlı diqqətlə qarşıdakı ayların öhdəsindən birlikdə gələk”.
Hazırda Avstriyada koronavirusa yoluxma halları əsasən paytaxt Vyanada, eləcə də Aşağı Avstriya və Tirol federal əyalətlərində qeydə alınır. Gündəlik yoluxma hallarının təxminən yarısı Vyana şəhərinin payına düşür və artıq İsveçrə Vyananı risqli regionlar siyahısına daxil edib, Almaniyanın da yaxın günlərdə eyni addım atacağı gözlənir. Yoluxma hallarının qarşısını ala bilmək üçün Avstriya hökuməti sentyabrın 14-dən bir sıra məhdudiyyətlər tətbiq edəcək, belə ki, ölkə üzrə bütün ictimai qapalı məkanlarda maskadan istifadə məcburi olacaq, kütləvi tədbirlərdə iştirakçı sayı azaldılacaq.
Görünən odur ki, məsələ çox ciddi olduğuna görə bir sıra ölkələr pandemiyanın ikinci dalğasını elan ediblər. Bu həm də o deməkdir ki, Azərbaycan da bu istiqamətdə bəzi addımlar atmalıdır. Çünki pandemiyanın yayıldığı bəzi ölkələr coğrafi baxımdan bizə yaxındırlar. Bu tərəfdən də payız mövsümü yaxınlaşır. O üzdən, bütün hallarda, ayıq-sayıqlığımızı artırmalıyıq.
Vidadi ORDAHALLI
