20/09/2020 11:58
728 x 90

Azərbaycanda gündəlik yoluxanlar sağalanları sayca ilk dəfə üstələdi – qarşıdan daha risqli fəsil gəlir, qonşularda virus geniş yayılır...

Adil Qeybulla: “Yenə də metrodan istifadə edənlər maskanı çənədən aşağı taxacaqlarsa, təbii ki, yoluxma sayı artacaq”

img

Bazar günü Azərbaycanda koronavirus infeksiyasına daha 155 yoluxma faktı aşkarlanıb. Son rəqəmlərə əsasən, 149 nəfər sağalıb, 3 nəfər vəfat edib. Bir gün əvvəl isə həmin göstəricilər müvafiq olaraq 135 (yoluxanlar), 167 (sağalanlar) və 2 nəfər (vəfat edənlər) olub.

Göründüyü kimi, ölkədə yenidən koronavirusa yoluxanların sayı sağalanları keçdi. Neçə vaxtdır gündəlik olaraq sağalanlar say baxımından yoluxanları üstələyirdi. Bu isə ümid yaradırdı ki, vəziyyət müsbətə doğru dəyişməkdə davam edəcək.

İndiyədək koronavirusa yoluxanların ümumi sayı 38327, COVID-19-dan ölənlərin ümumi sayı isə 562-dir. Bu günə qədər 35756 nəfər koronavirusdan sağalıb. Hazırda 2009 aktiv xəstə var.

Qeyd edək ki, Azərbaycanda ilk koronavirusa yoluxma halı 28 fevralda qeydə alınıb. Martın 24-dən qüvvədə olan xüsusi karantin rejimi sentyabrın 30-dək uzadılıb.Nazirlər Kabineti mayın 4-dən etibarən xüsusi karantin rejimini bir qədər yumşaldıb. İyun ayında isə qurum koronavirusun qarşısının alınması məqsədilə həftəsonları ev təcridi rejimi tətbiq edib Artıq yalnız Bakı, Sumqayıt şəhərləri və Abşeron rayonunda sərt karantin rejiminin qaydaları qüvvədədir.

Qeyd olunduğu kimi, virusa yoluxanların sayı sağalanları üstələyir. Nəzərə alsaq ki, artıq dərslər başlayır, metro işləyir, üstəlik, qonşu ölkələrdə virusa yoluxanların sayı artır, o zaman Azərbaycanda virusa yoluxanların daha da artma risqi varmı?

  • “Qapalı məkanlarda karantin davranışlarına ciddi nəzarət olunmalı və qaydaları pozan adamlar cəzalandırılmalıdırlar”

Məsələyə münasibət bildirən tibb elmləri doktoru, professor Adil Qeybullanın sözlərinə görə, virusa yoluxma sayının artıb-azalması karantin davranışlarından asılı olan məsələdir: “Bu məsələ ilə bağlı vəziyyətimiz karantin davranışlarına bağlıdır. Yəni qapalı mühitdə karantin davranışlarına əməl olunacaqsa, o zaman yoluxanların sayı çox olmayacaq. Karantin davranışlarına əməl edilməyəcəksə, virusa yoluxanların sayı daha da artacaq. Nə qədər bu qaydalar pozulacaqsa, o zaman vəziyyət pisləşəcək, bax, söhbət bundan gedir. Artıq metro işləyir. Yenə də metrodan istifadə edənlər maskanı çənədən aşağı taxacaqlarsa, təbii ki, yoluxma sayı artacaq. Bu şəkildə davam edəcəksə, əlbəttə, insanlar bundan əziyyət çəkəcəklər. Ona görə də qapalı məkanlarda karantin davranışlarına ciddi nəzarət olunmalı və qaydaları pozan adamlar cəzalandırılmalıdırlar. Biz bu şəkildə işləri aparmalıyıq. Yəni hərəkət, fəaliyyət azadlığı var, amma bütün bunlar karantin davranışları ilə olmalıdır. Virusa yoluxanlar artsa, qaydalar yenidən sərtləşdiriləcək. O zaman insanlar bundan əziyyət çəkəcəklər”.

Professorun fikrincə, insanlar son dərəcə məsuliyyətli olmalıdırlar.

Vidadi ORDAHALLI

Son xəbərlər