Müasir dövrün tələblərinə cavab verən ixtisaslı kadrların yetişdirilməsi elə də asan iş deyil. Nəzəriyyəni öyrəndik, bəli, bəs praktika? Hər kəsə bəllidir ki, praktikasız yetişkin kadr kimi üzə çıxmaq mümkün olmur. Belə ixtisaslardan biri də jurnalistikadır.
Jurnalistika fakültəsini əla qiymətlərlə bitirib, hətta müəllimlərinin sevimlisi olan tələbələr var ki, jurnalistikada özlərini tapa bilməyiblər. Bu elə bir sahədir ki, çalışdıqca püxtələşirsən, peşəkarlaşırsan. Nəzəriyyəni praktikada uğurla tətbiq edənlər peşəkar jurnalist kimi özünü təsdiqləyir.
Son illər jurnalistikaya qəbulda qabiliyyət imtahanının tətbiq edilməsinin səbəbi kimi test imtahanlarında müəyyən bal toplamış abituriyentlərin başqa fakültələrə qəbul olunmadıqda “əlacsız” qalıb jurnalistikanı seçdikləri göstərilirdi. Deyirdilər ki, qabiliyyət imtahanı olarsa, kimin yazı qabiliyyətinin, jurnalistikaya marağının olduğu bilinəcək və bu abituriyentlər gələcəkdə seçdikləri ixtisası daha yaxşı mənimsəyəcək və bu ixtisas üzrə ürəklə, sevərək təhsil alacaqlar. Elə deyilənlər də özünü doğrultdu.
Jurnalistikanın bakalavr və magistr ixtisasına keçirilən qabiliyyət imtahanında iştirak edənlərin yazı səviyyəsi ekspertləri razı salmayıb. Belə ki, imtahan iştirakçılarının bir qismi orfoqrafik, leksik, qrammatik qaydalara düzgün əməl etməyiblər. Hətta bəziləri durğu işarələrini düzgün, yerində işlədə bilməyiblər.
Jurnalistika fakültəsinə qabiliyyət imtahanı verən abituriyentlərin dil kasadlığı, dillə bağlı problemləri barədə mütəxəssislərlə danışdıq.
Media sahəsi üzrə ekspert Azər Həsrət bildirdi ki, jurnalistikanın bakalavr və magistr imtahanında iştirak edənlərin yazı səviyyəsinin aşağı olması problemi neçə ildir yaşanır: “Bunun məlum səbəbi var. Belə ki, indiki gənclik bədii ədəbiyyat oxumur. Bədii ədəbiyyat oxumadıqları üçün onlar dil qaydalarını tam mənimsəyə bilmirlər. Məlumdur ki, orta məktəbdə şagirdlərə dilin qaydaları keçirilir, ancaq bu, dar çərçivədə olur. Onu da əlavə edim ki, orta məktəbdə oxuyarkən dərs tapşırıqları ilə yanaşı, boş vaxtlarımızda bədii ədəbiyyat oxuyaraq dilin qayda-qanunlarını öyrənirdik. Ancaq indiki abituriyentlər boş vaxtlarını sosial mediada keçirməyə üstünlük verirlər. Nə qədər çox mütaliə edərlərsə, dil qaydalarını da o qədər çox mənimsəyərlər”.
Günel CƏLİLOVA
