Son vaxtlar şəhidlərimizin fotoşəkillərini avtomobillərinin şüşələrinə vuraraq şəhər küçələrində şütüyən gənc sürücüləri tez-tez görürük. Bunu həmin sürücülərin şəhidlərimizə hörməti kimi qəbul edirik. Amma bəzən elə hallara da rast gəlinir ki, belə sürücülərin bəzilərinin şəhid adına hörmətsizlik nümayiş etdirdiyinin şahidi oluruq.
Son vaxtlar şəhidlərimizin fotoları vurulan maşınlarla kobud qayda pozulması ilə bağlı hadisələr tez-tez gündəmə gəlir. Bəzi sürücülər şəhid hərbçilərimizin şəkillərini avtomobillərinin şüşələrinə yapışdırmaqla yüksək sürət həddini keçərək yol hərəkəti qaydalarını kobud şəkildə pozurlar.
Kamran Əliyev: “Vətən uğrunda canından keçmiş qəhrəmanlarımızı hər zaman xatırlamaq məqsədini daşıyırsa, bu, çox qürurverici haldır, amma…”
Baş Dövlət Yol Polisi İdarəsinin şöbə rəisi, polis polkovniki Kamran Əliyev bildirdi ki, onların bu hərəkətləri vətən uğrunda canından keçmiş qəhrəmanlarımızı hər zaman xatırlamaq məqsədini daşıyırsa, bu, çox qürurverici haldır: “Amma gəlin onu da unutmayaq ki, şəhidlərimizin fotoşəkillərinin yeri gündən qorunmaq üçün pərdə əvəzi avtomobillərin arxa və ya yan şüşələrində deyil, daha mötəbər yerlərdə, o cümlədən kitablarda, jurnallarda, dərsliklərdə olmalıdır ki, bu da mövcuddur. Bu gün ölkəmizdə elə şəhər, elə rayon, elə bir kənd yoxdur ki, orada şəhidlərin xatirəsinə “Şəhidlər parkı”, “Şəhidlər bulağı” və ya “Şəhidlər guşəsi” olmasın. Şəhidlərin ruhuna hörmət milliyyətindən, dinindən asılı olmayaraq, hər bir Azərbaycan vətəndaşının müqəddəs borcudur. Amma avtomobildə bu şəkillərin müxtəlif məqsədlərlə istifadə olunması düşünmürük ki, onların ruhuna hörmət əlamətini ifadə etsin. Məsələn, indi elə bir sürücüyə rast gələ bilmərik ki, o, təsadüfən də olsa, yol hərəkəti qaydasını pozmasın. Bir anlıq təsəvvür edin, siz hörmət əlaməti olaraq şəhidin şəklini avtomobilə vurmusunuz və bilmədən, yaxud istəmədən qaydaları pozmaq məcburiyyətində qalmısınız. O halda, sizi görən digər insanlar nə düşünəcək?
Qeyd edim ki, belə avtomobil sürücülərinin törətdikləri qayda pozantuları ilə əlaqədar avtomatik rejimdə qeydə alınmış fotoşəkillər də mövcuddur. Onlarda yalnız bir fikir yaranacaq ki, şəhidin şəklindən məqsədli şəkildə sui-istifadə edir. Məhz belə halların baş verməməsi üçün qəhrəman şəhidimiz Mübariz İbrahimovun atası Ağakərim İbrahimov da Baş DYP İdarəsinə etdiyi müraciətdə gənc sürücülərimizin şəhidlərimizə olan sayğılarını, sevgilərini yüksək qiymətləndirdiyini, lakin bəzi sürücülərin şəhid şəkilləri vurulmuş avtomobillərlə yol hərəkəti qaydalarını pozmasının əleyhinə olduğunu və bunun yolverilməz olduğunu bildirib. Onun müraciəti təkcə öz oğlu ilə bağlı deyildi. O, bütün şəhidlərimizin ruhuna ehtiramla, hörmətlə yanaşmağı xahiş edərək, həmin şəkillərin avtomobilin gündən qorunan və ya tez-tez çirkab dəyən yerlərində deyil, salonunda yerləşdirilməsini daha uyğun hesab edib. Odur ki, əziz gənclərimiz bilsinlər ki, şəhidlərə olan sevgilərinə biz polislərin də heç bir şübhəsi yoxdur, lakin bu sevgini, bu hörməti yol təhlükəsizliyinə təsir edə biləcək hər hansı vasitələrlə deyil, onların uğrunda şəhid olduqları dövlətin qanunlarına əməl etməklə, düşmənlərimizin ölkəmizə qarşı apardığı çirkin siyasətin, sosial şəbəkələrdəki erməni əkstəbliğatının qarşısının alınmasında aktivlik göstərməklə və hər zaman ordumuza dəstək verməklə ifadə etsələr, həm şəhidlərimizin ruhu şad olar, həm də özlərini bu dövlətin, bu vətənin, bu xalqın müdafiəsində durmuş qəhrəman bir əsgər kimi hiss edərlər”.
Aytəkin Kamranqızı: “Hansısa sürücü şəhidlərimizin şəklindən sui-istifadə edib qayda pozuntusuna yol verirsə, bu, əlbəttə, həm şəhidə hörmətsizlikdir, həm də…”
Sosioloq Aytəkin Kamranqızı bildirdi ki, vətən uğrunda həlak olan şəhidlərin xatirəsini əbədiləşdirmək üçün onların şəkillərinin şəxsi avtomobillərə vurulması hər bir insanın şəxsi fikridir. Lakin burada yenə də avtomobil sürücüsünün məsuliyyəti və həmin şəhidə hörməti olmalıdır: “Hansısa sürücü şəhidlərimizin şəklindən sui-istifadə edib qayda pozuntusuna yol verirsə, bu, əlbəttə, həm şəhidə hörmətsizlikdir, həm də qaydalara düzgün əməl etməməsidir. Belə hal ikiqat məsuliyyətsizlik hesab olunur. Qanun hamı üçündür. Yol hərəkəti qaydalarını pozan istənilən sürücü DYP əməkdaşları tərəfindən saxlanaraq məsuliyyətə cəlb olunmalıdır. Şəhidlərimizə sayqı-hörmət başqa məsələdir, qanun-qaydaya hörmət başqa".
Günel CƏLİLOVA
