22/09/2020 12:56
728 x 90

ÜST-in dünyaya yeni xəbərdarlığı ilk növbədə Azərbaycana da aiddir…

Adil Qeybulla: “COVID-19 soyuq havada daha tez yayılır”

img

Dünya ölkələri COVID-19-la mübarizə yolu axtarır. Bəzi ölkələr koronavirus peyvəndi icad etdiyini bildirir. Lakin virus hələ də can almaqda davam edir. Virusun yayıldığı ilk dövrdə isti havada məhv olacağı ilə bağlı fikirlər səslənirdi. Ancaq geridə qoyduğumuz isti aylarda bunun şahidi olmadıq. Əksinə, virusa yoluxanların sayı artdı. 

Qarşıdan soyuq aylar gəlir. Nəzərə almaq lazımdır ki, payız fəslində insanların immuniteti aşağı düşdüyü üçün qripə yoluxma halı da artır. Ümumdünya Səhiyyə Təşkilatının (ÜST) rəsmisi koronavirusun ikinci dalğası ilə bağlı dünya ölkələrinə xəbərdarlıq edib. Belə ki, soyuq havada virusun yenidən aktivləşəcəyi ilə bağlı dünya ölkələrinə müraciət edib.

  • “Qarşıdan gələn payız-qış aylarında vətəndaşlarımızdan…”

Professor, tibbi ekspert Adil Qeybulla qeyd etdi ki, ÜST-in dünya ölkələrini xəbərdar etməsinin kifayət qədər əsası var. Pandemiya davam edir: “Braziliya, Amerika Birləşmiş Ştatları, Hindistan kimi ölkələrdə isə yeni yoluxanların və ölənlərin sayı sürətlə artmaqdadır. Bəzi ölkələrdə ikinci dalğa başlayıb və Azərbaycanda da gözlənir. Koronovirusdan sağalan şəxslərin təkrar yoluxması kimi məlumatlar da mətbuata sızır. Aydındır ki, COVID-19 soyuq havada daha tez yayılır. Qarşıdan gələn payız-qış aylarında vətəndaşlarımızdan daha diqqətli olmaq, gigiyenik qaydalara əməl etmək, sosial məsafəni qorumaq və tibbi maskadan istifadə etmək tələb olunur. Bu üç qızıl qaydaya riayət etmək, özümüzü və yaxınlarımızı qorumaq deməkdir. Bu zaman səhiyyə sistemi artıq yüklənməz və dövlətimizin maliyyə vəsaitlərinə qənaət etmiş olarıq”.

Həmsöhbətimiz onu da əlavə etdi ki, proses tam bitmədən Azərbaycan və digər ölkələrdə yoluxmaların artması baş versə, ona reinfeksiya demək olar, yəni ikinci dalğa adlandırmaq düzgün olmaz: “Çünki burada proses heç bitməmişdi. İstənilən halda, virusun getdikcə zəifləməsi görünür. Hətta ikinci dalğa olsa belə, birinci dalğadakı kimi, ağır nəticələr olmayacaq. Ona görə də hesab edirəm ki, bu, son dalğa olacaq”.

Günel CƏLİLOVA

Son xəbərlər