Cənubi Qafqazda koronavirusun ən geniş yayıldığı ölkə Ermənistandır. Bu ölkədə sutka ərzində virusa yoluxanların sayı Gürcüstan və Azərbaycanla müqayisədə gündəlik artıq olur. Ermənistanda virusdan ölənlərin sayına gəlincə, burada koronavirusdan ölənlərin sayı yenidən artıb.
Ermənistan üzrə COVID-19-dan ölənlərin sayı 909-a çatıb. Azərbaycanda koronavirusdan həyatını itirənlərin sayı 557-dir, Gürcüstanda isə virusdan 19 nəfərin vəfat etdiyi bildirilir.
10 milyondan çox əhalisi olan Azərbaycanda vəfat edənlərin sayının 557 olmasının təbii qəbul olunmalı olduğunu deyən ekspertlər hesab edirlər ki, əhalisinin sayı çox olan ölkələrdə ölü sayının müəyyən qədər çox olması normaldır. Amma əhalisi az olan ölkələrdə ölüm hallarının çox olması artıq dəhşətli bir hal yaradır.
“2 milyon əhalisi olan Ermənistanda epidemioloji vəziyyəti heç zaman nəzarətdə saxlamaq mümkün olmayıb”
Həkim-terapevt Leyla Bayramlının sözlərinə görə, Azərbaycan dövləti koronavirusun hələ ilk dalğaları dünyada hiss olunan vaxtlardan qabaqlayıcı tədbirlər həyata keçirdi və bunun nəticəsində də ölkəmizdə həm yoluxmaların, həm də ölənlərin sayı başqa ölkələrdəki kimi dəhşətli rəqəmləri əks etdirmədi. “Azərbaycanın 10 milyondan artıq əhalisi var. Cənubi Qafqazın ən böyük respublikasıdır. Azərbaycanda koronavirusa qarşı çox ciddi mübarizə tədbirləri həyata keçirilir. Bu tədbirlər də effektiv nəticələr verir. Azərbaycanda epidemioloji vəziyyət tam olaraq nəzarətdədir və koronavirusla bağlı artım-azalma dinamikası ciddi müşahidə altındadır. Bizdə prosesə nəzarət günü-gündən gücləndirilir. Bizdə keçirilən testlərin sayı da Gürcüstan və Ermənistanla müqayisədə bir neçə qat çoxdur, bundan əlavə, Bakı sakinləri arasından təsadüfi seçilən təxminən 1000 insandan seroloji testlər də götürülüb. Bütün bunlar hamısı virusa qarşı mübarizə tədbirləri çərçivəsində görülən işlərdir. Bizdə virusa yoluxan xəstələrin müayinəsı və müalicəsi dövlət hesabına həyata keçirilir”.
Ermənistan və Gürcüstanın müqayisəsinə gəlincə, ekspert bildirdi ki, Gürcüstanla Ermənistanın əhalisi isə təxminən eyni saydadır, hətta Gürcüstan əhalisi bir neçə faiz artıqdır. “Çünki Gürcüstan əhalisinin sayı real göstərilir, Ermənistan əhalisinin sayı isə süni şəkildə şişirdilərək təqdim edilir. Ermənistanda hazırda 2 milyona yaxın insan yaşayır, amma hökumət bu ölkədə əhalinin sayının 3 milyon olduğunu deyir. Bu gün əhalisinin real sayı 2 milyon olan Ermənistanda COVID-19-a yoluxanların ümumi sayı 45 503-ə çatıb. Ermənistanda koronavirus böyük bir cəhənnəm yaradıb. 2 milyon əhalisi olan Ermənistanda epidemioloji vəziyyəti heç zaman nəzarətdə saxlamaq mümkün olmayıb. Bu gün Paşinyan hökuməti beynəlxalq qurumlardan maliyyə qoparmaq üçün yüz oyundan çıxır, amma ölkədə virusun qarşısının alınması üçün heç bir tədbir görülmür. Ermənistanda COVID-19-a yoluxanların ümumi real sayının 45 503 olması inandırıcı görünmür. Çünki orada yoluxanların sayının 200 mindən çox olduğunu hələ bir müddət əvvəl Paşinyan özü demişdi. Ermənistan hökuməti koronavirusun qarşısını almaq üçün heç bir tədbir görmək istəmir, ona görə də ölü sayı 1000-ə çatır. Bundan başqa, bu ölkə virusun yayılmasının günahkarı kimi Ümumdünya Səhiyyə Təşkilatını suçlayır. Halbuki, ÜST zamanında öz tövsiyəsini verib, təhlükə barədə bütün dünya ölkələrini xəbərdar edib. ÜST necə xəbərdarlıq etməmişdi ki, bütün ölkələr təhlükəsizlik tədbirləri gördülər. ÜST-in səsini bircə Ermənistan “eşitmədi”. İndi də koronavirusa yoluxan insanların və ölənlərin yaxınlarının başını qatmaq üçün Ermənistan hökuməti yalanlar uydurur.
Azərbaycan dövləti ÜST-in tövsiyələrinə yüksək səviyyədə əməl edən dövlət kimi bu qurumun təşəkkürünü qazanıb. Ermənistan hökuməti isə koronavirusla yarıtmaz fəaliyyəti nəticəsində gözdən düşüb.
Gürcüstanda isə Ermənistanla müqayisədə virusa yoluxanların sayı cüzidir, ölənlərin sayı isə qat-qat aşağıdır. Günədək bu ölkədə virusa yoluxanların sayı 2 075 nəfərə çatıb, sentyabrın 12-də 158 yeni yoluxma faktı qeydə alınıb. Gördüyümüz kimi, Gürcüstanda virusa yoluxanların sayı Ermənistanda yoluxanların sayından çox-çox azdır. Ölüm sayına gəlincə isə, Ermənistanda koronavirusdan kütləvi ölüm halları baş verir, Gürcüstanda isə ölənlərin sayı heç 20 nəfər deyil. Gürcüstanda virusun yayılmasının qarşısının alınması ilə bağlı ciddi təhlükəsizlik tədbirləri görülsə də, əhaliyə hər cür dəstək göstərilsə də, Ermənistanda virusun qarşısının alınması üçün heç bir tədbir görülməyib. Bu səbəbdən də Ermənistanda virusdan ölənlərin sayı 1000-ə çatır. Bu isə bölgə üçün ciddi təhlükələr yaradır” - deyə L.Bayramlı qeyd etdi.
İradə SARIYEVA
