Yeni dərs ilində ibtidai siniflərdə birinci dərs saatının gigiyenik qaydalara əməl edilmə, 5-9-cu siniflərdə “Müstəqil öyrənmə bacarığı müasir dövrün tələbidir”, 10-11-ci siniflərdə “Məsuliyyətli davranış məsuliyyətli vətəndaşın göstəricilərindəndir” mövzularına həsr edilməsi təklif edilir.
“Trend”-in məlumatına görə, bunu Təhsil Nazirliyinin Ümumi və məktəbəqədər təhsil şöbəsinin müdiri Vəfa Yaqublu Nazirlər Kabinetinin "Karantin rejimi dövründə təhsil müəssisələrində tədris və təlim-tərbiyə prosesinin təşkilinin müvəqqəti Qaydaları" barədə Qərarına həsr olunmuş onlayn mətbuat konfransında deyib.
Məktəblərdə virusdan qorunmağı təşviq edən posterlər asılacaq
Onun sözlərinə görə, qaydalar təhsil prosesinin bütün tərəflərini əhatə edib. Bu qaydaların necə reallaşacağı isə məktəb kollektivinin və cəmiyyətin üzərinə düşür.
V.Yaqublu qeyd edib ki, məktəblərdə virusdan qorunmağı təşviq edən posterlər asılacaq. Bunlar artıq hazırlanaraq məktəblərə çatdırılır.
Nazirlik rəsmisi əlavə edib ki, Bilik Gününün keçirilməsi kütləvi tədbirlər hesab edildiyindən sentybarın 15-də məktəblərdə həmin gün qeyd edilməyəcək.
Şagirdlərin minimal və maksimal sayı ilə bağlı məhdudiyyət olmayacaq
Biz məktəblərdə ənənəvi dərs keçən şagirdlərin minimal və maksimal həddi ilə bağlı məhdudiyyət qoymuruq – deyən Vəfa Yaqublunun sözlərinə görə, siniflərdə olan şagirdlərin sayı otaqların həcmi, onlar arasındakı məsafə ilə bağlıdır: “Əgər dərs 60 kvadrat metrlik sinif otağında keçiriləcəksə, onda bu sinifdə partaları 1,5 metr məsafə ilə düzüləcək. Siniflər nə qədər imkan versə, o qədər şagird həmin otaqda dərs keçəcək, siniflər buna uyğun yarımqruplara bölünəcəklər. Bu, sinif otağının həcmindən asılıdır. Hər parta arxasdında bir uşaq əyləcək. Ehtimal var ki, xüsusi sıxlığı olan məktəblərdə valideynlərin çoxu öz uşağını məktəbə göndərməyək. Bu baxımdan bu məktəblərdə şagird sayı azalacaq. Hər yarım qrup üçünü xüsusi dərc cədbəli hazırlanacaq. Bu cədvəll\r nazirliyin səhifəsində paylaşılıb”.
Məktəb daxilində şagirdlər üçün hazırlıq kursları da risqli sayıldı
Məktəb daxilində şagirdlər üçün hazırlıq kurslarının təşkilinə icazə verilməyəcək. Bunu da Təhsil Nazirliyinin şöbə müdiri Vəfa Yaqublu deyib.
Onun sözlərinə görə, şagirdlər dərsdən sonra yenidən məktəbə gələcəklərsə, bu, yenidən təhsil müəssisələrində şagird sıxlığının yaranması deməkdir: “Amma valideynlər uşaqlarını əlavə müəllim yanına göndərirlərsə, bu onların öz işidir”.
Onlayn dərslərin keçirilməsi ilə bağlı təlimatlar hazırlıq mərhələsində...
Vəfa Yaqublu eyni zamanda bildirib ki, məktəblərdə onlayn dərslərin keçirilməsi ilə bağlı təlimatlar hazırlanır. Onun sözlərinə görə, məktəblərdə onlayn dərslərin keçirilməsinə məktəb rəhbərliyi nəzarət etməlidir: “Ümid edirik ki, müəllimlər bu il daha məsuliyyətli olacaqlar. Şagirdlərin teledərs və onlayn dərslərdən öyrəndiklərinin qiymətləndirməsini aparacağıq”.
Bütün məktəblər hərarət ölçən aparat və dezinfektorlarla təmin ediləcək
Bütün məktəblər hərarət ölçən aparat və dezinfektorlarla təmin ediləcək.
Bunu isə onlayn mətbuat konfransında Təhsil nazirinin müşaviri Rüstəm Ağayev deyib.
Onun sözlərinə görə, bu məsələ ilə bağlı heç bir problem yoxdur.
R.Ağayev onu da deyib ki, məktəblərdə tədris prosesi başlayandan sonra müəllim və şagirdlərin COVID-19 testindən keçirilməsi ancaq onlarda şübhəli hallar aşkarlandıqda mümkün olacaq.
Onun sözlərinə görə, bu işlər Səhiyyə Nazirliyi ilə birgə həyata keçiriləcək: “Şəxsdə hərarətin qalxması, dadbilmənin itməsi və öskürək olarsa, testdən keçiriləcək”.
Müəllimlər dərsləri üz sipəri ilə keçəcəklər
Müəllimlərin dərsdən əvvəl üz siprəri ilə təmin ediləcəyini bildirən Rüstəm Ağayevin sözlərinə görə, müəllimlər dərsləri üz sipəri ilə keçəcəklər.
R.Ağayev qeyd edib ki, şagirdlərin tibbi maskalardan istifadəsi isə valideynlərin seçiminə buraxılıb. Lakin peşə və ali məktəblərdə tibbi maskalardan istifadə məcburidir.
Məktəblərdə xüsusi COVID-19 məntəqəsi...
Məktəblərdə şagirdlərə və müəllimlərə COVID-lə bağlı xüsusi yardım göstərilməyəcəyini deyən Təhsil nazirinin müşaviri bildirib ki, bunun üçün məktəblərdə xüsusi kiçik COVID məntəqəsi və izolyasiya otağı olacaq: “Hərarəti və digər şübhəli əlamətləri olan şagird və müəllimlər həmin otağa yerləşdiriləcək, daha sonra təcili tibbi yardım çağırılacaq və xəstədən test götürüləcək”.
Yoluxma faktı olarsa, məktəb və ya sinif bağlana bilər...
Biz valideynlərə müraciət edərək bildiririk ki, övladlarınızın səhhətində hər hansı problem, virus infeksiyasına oxşar simptomları varsa, onları məktəbə gətirməyin.
Bunu da onlayn mətbuat konfransında Təhsil nazirinin müşaviri Rüstəm Ağayev deyib.
Onun sözlərinə görə, kimsə hərarəti salan dərman atmaqla binaya keçə bilər: “Amma biz bu hallara tam olaraq nəzarət edə bilmərik. Bizdə gələcəkdə belə hal yaransa, Təhsil Nazirliyi yanında Operativ Qərargah yaradılacaq. Məktəbdə yoluxmalar olacaqsa, biz bunu birbaşa nəzarətə götürəcəyik və RGEM, Səhiyyə Nazirliyi ilə birlikdə nəzarət etməklə addımlarımızı müəyyən edəcəyik. Əgər yoluxma olarsa, biz hansısa məktəbin və ya lokal olaraq sinfin bağlanmasına qərar verəcəyik. Ona görə də valideynlərə müraciət edərək deyirik ki, xəstə uşaqlarını məktəbə göndərməsinlər”.
Baki-xeber.com
