Nazirlər Kabinetinin qərarı ilə təsdiqlənən xüsusi karantin rejimi dövründə təhsilalanlara dair tələblərdə bildirilib ki, məktəblərdə tibbi maskadan istifadə məcburi olmayacaq.
Qaydalarda deyilir ki, xüsusi karantin rejimi dövründə təhsil müəssisələrində təhsilalanların məktəbəqədər və ümumi təhsil müəssisələrində, uşaq musiqi, incəsənət və rəssamlıq məktəblərində maskadan istifadəsi onların valideynlərinin və ya digər qanuni nümayəndələrinin seçiminə verilir.
Pandemiya şəraitində təhsil müəssisələrində maska taxmağın məcburi olmaması nə kimi yoluxma risqləri yarada bilər? Nəzərə alsaq ki, 20-30 şagird qapalı məkanda təhsil alacaq və bu halda maskadan istifadə etməmək problem yarada bilərmi?
Ekspertlərə görə, Avropada, xüsusən də Fransada, qonşu Gürcüstanda məktəblərdə tibbi maskadan istifadə edilməsi məcburi qaydadadır. Onların dediyinə görə, bir müddət əvvəl bizdə də məktəblərdə tibbi maskalardan istifadənin zəruri olduğu və bunun məcbiri qaydada tətbiq ediləcəyi bildirilirdi.
“Görülən bu tədbirlərin hamısı vəziyyəti nəzarət altında saxlamağımıza imkan verəcək”
İnfeksion xəstəliklər və klinik mikrobiologiya uzmanı Fərrux Sədirov “Bakı-Xəbər”ə bildirdi ki, Nazirlər Kabineti tərəfindən bu qərar qəbul edilərkən epidemioloji vəziyyət nəzərə alınıb və bütövlükdə, proses ciddi nəzarətdə saxlanacaq. F.Sədirovun sözlərinə görə, 12 yaşa qədər uşaqlar maskadan düzgün qaydada istifadə edə bilmədikləri üçün onların maska taxması məqsədəuyğun deyil. Maskadan düzgün istifadə edilməməsinin daha çox virus risqi yaratdığını deyən F.Sədirovun sözlərinə görə, sinif otaqlarında şagirdlər arasında sosial məsafənin qorunmasına əməl ediləcək. “Təbii ki, hər atılan addım epidemiyaya yoluxma dinamikasında dəyişikliyə səbəb ola bilər. Amma burada azyaşlı şagirdlərdə maska tətbiqi məqbul görünmür. Çünki azyaşlı şagirdlər maskadan istifadə zamanı qorunmaq əvəzinə, əksinə, yoluxdurma, yoluxma ehtimalı ilə üzləşə bilərlər. Ona görə ki, uşaqlar maskanın çöl tərəfi ilə düzgün rəftar edə bilməyəcəklər, maskanın geyinilməsi, çıxarılması qaydalarına tələb olunan şəkildə əməl etməyəcəklər. Bu da daha böyük risq yarada bilər, yoluxma ehtimalını artırar. Təhsil Nazirliyinin hazırladığı xüsusi tədirlər planı var. Bu tədbirlər planında sinif otaqlarında sıxlığın azaldılması, havalandırmanın artırılması, şagirdlərin şahmat qaydasında yerləşdirilməsi, sosial məsafənin gözlənilməsi və sair öz əksini tapıb. Bu da prosesin nəzarət altında olacağını göstərir. Eyni zamanda, şagird sıxlığının aradan qaldırılması üçün əyani təhsillə yanaşı, onlayn təhsil də tətbiq ediləcək. Şagirdlər hər gün məktəbə getməyəcək, görülən bu tədbirlərin hamısı vəziyyəti nəzarət altında saxlamağımıza imkan verəcək. Proses, bütövlükdə, nəzarətdə saxlanacaq. Görülən işlər də bu məqsədlə, bu niyyətlə görülür”.
F.Sədirov bir mütəxəssis kimi tövsiyə edir ki, 12 yaşdan yuxarı uşaqların maska taxmasına valideynlər daha çox diqqət yetirsələr, bu daha məqsədəuyğun olar. Bu yaşda olan uşaqların maska ilə rəftarı başa düşəcəyini deyən F.Sədirovun dediyinə görə, amma azyaşlı şagirdlər maskadan düzgün istifadə etməyəcək, onu qaydasız şəkildə çıxaracaq, masanın üstünə, cibinə qoyacaq, yaxud başqa yerə atacaq, sonra da istifadə edəcək, bu da yoluxma risqini daha da artıracaq.
İradə SARIYEVA
