Koronavirus (COVID-19) pandemiyası ilə bağlı yaranmış vəziyyət, digər ölkələrdə olduğu kimi, Azərbaycanın da turizm sektoruna təsirsiz ötüşməyib. Mart ayından başlayaraq bu sahədə ciddi tənəzzülə səbəb olub. Məlumata görə, bu ilin yanvar-iyul aylarında Azərbaycana dünyanın 152 ölkəsindən 618,3 min və ya əvvəlki ilin müvafiq dövrü ilə müqayisədə 2,9 dəfə az əcnəbi və vətəndaşlığı olmayan şəxs gəlib.
Bununla yanaşı, pandemiya ilə əlaqədar əksər ölkədə daxili turist səfərləri daha böyük miqyasda azalıb. Elə ölkələr var ki, orada ölkədaxili turist səfərləri 15-20 dəfə azalıb. Ancaq sözügedən ölkələrlə müqayisədə Azərbaycanda ölkədaxili turist səfərləri bu qədər azalmayıb. Hansı ki, həmin ölkələrdən bəzilərinin əhalisi Azərbaycan qədərdir. Məsələn, Portuqaliyanın əhalisi Azərbaycan əhalisindən 1 milyon nəfər çoxdur. Ancaq bu ölkədə 15 dəfədən çox ölkədaxili turist səfərləri azalıb.
Azərbaycanda isə vəziyyət fərqlidir. Belə ki, bu ilin ikinci rübündə 119,1 min nəfər turizm məqsədilə ölkə daxilində 508,5 min səfər həyata keçirib. COVID-19 koronavirus pandemiyası ilə əlaqədar ölkə daxilində tətbiq edilən hərəkət məhdudiyyətləri səbəbindən ölkə daxilində turist səfərlərinin sayı 9,7 dəfə azalıb.
Göründüyü kimi, bizdə vəziyyət digərləri ilə müqayisədə yaxşıdır. Maraqlıdır, bu nədən irəli gəlir?
“Son dövrlər aparılan yumşaldılmalar daxili turizm sektoruna müsbət təsir edir”
Məsələyə münasibət bildirən ekspert Rəsul Cahangirli bunu bir sıra amillərlə əlaqələndirdi: “Məsələ ondadır ki, Azərbaycanda pandemiya bir sıra ölkələrlə müqayisədə geniş miqyasda yayılmadı. Görülən qabaqlayıcı tədbirlər, hökumətin atdığı bir sıra addımlar buna imkan vermədi. Baxın, Azərbaycan əhalisi Ermənistan əhalisindən 3 dəfə çoxdur. Bizdə koronavirusdan ölənlərin sayı 531 nəfər olduğu halda, 3 milyonluq Ermənistanda ölənlərin sayı 909 nəfərə çatıb. Virusa yoluxanların sayı 45 mini keçib. Azərbaycanın elə rayonları var ki, orada pandemiya yox səviyyəsindədir. Bu nə ilə əlaqədardır? Bu onunla bağlıdır ki, vaxtında rayonlara gediş-gəliş məhdudlaşdırıldı. O səbəbdən bizdə pandemiya geniş yayılmadı. Artıq rayonlara müəyyən səfərlərə icazə verilib. İnsanlar hansısa rayonlara istirahət məqsədilə gedirsə, qaydalara əməl edirlər. Son dövrlər aparılan yumşaldılmalar daxili turizm sektoruna müsbət təsir edir. Bu səbəbdən bir sıra ölkələrlə müqayisədə bizdə ölkədaxili turist səfərləri elə də çox azalmayıb. Hesab edirəm ki, bu, müsbət tendensiyadır. Eyni zamanda, bu, Azərbaycanın üstünlüyüdür”.
Ekspert onu da qeyd etdi ki, bizdə pandemiya turizm sektoruna digər ölkələrlə müqayisədə elə də çox zərər vurmayıb.
Vidadi ORDAHALLI
