Azərbaycanda koronavirus pandemiyasının altıncı ayından sonra Operativ Qərargah yumşalmalara başlayıb. Martdan bağlanan rayonlara gediş-gəliş artıq bərpa olunub, kafe-restoranların içində xidmətə icazə verilib, əksər müəssisə, bir çox sahə işini davam etdirir.
Bu yumşalmaların iki həftə sonra yoluxmada hansı nəticələr verəcəyini proqnozlaşdırmaq çətindir, lakin indiki statistika orta səviyyədədir. Bu tendensiyanı müsbətə doğru qoruyub saxlaya bilsək, bir ay sonra yoluxma tamamilə sıfıra düşə bilər. Halbuki, payız dalğası barədə tez-tez anonslar, proqnozlar eşidirik.
Əslində, analoji yumşalmaya mayda da gedilmişdi və bumeranq effekti verdi, yoluxma və ölü sayı kəskin artdı. Üstəlik, o zaman bölgələrə gediş-gəlişə icazə yox idi.
Qeyd edək ki, bir sıra qonşu ölkələrdə virusa yoluxma sıfıra enmişdi. Ancaq indi həmin ölkələrdə pandemiyanın ikinci dalğası başlayıb. Bu hal qonşu Gürcüstanda da yaşanır. Ölkənin Baş naziri Georgi Qaxariya hökumətin iclasında deyib ki, payız aylarında ikinci dalğa gözlənilirdi: “Ona görə də əsas odur ki, təşvişə səbəb yoxdur. Biz ikinci dalğanı gözləyirdik və proses başlayıb. Vəziyyət tam nəzarət altındadır”. Gürcüstanda yoluxma hallarının artması ilə əlaqədar bır sıra məhdudiyyətlər tətbiq edilib.
Qeyd etdiyimiz kimi, qonşu Gürcüstanda pandemiyanın ikinci dalğası başlayıb. Qonşu ölkədə qeydə alınan ikinci dalğa ilə bağlı ölkəmizdə hansı tədbirlər görülməlidir?
“Pandemiyanın ikinci dalğası ilə ölkəmizin üzləşməməsi üçün dövlət tərəfindən müəyyən işlər görülür”
Həkim-ekspert Rasif Bağırov qeyd etdi ki, pandemiyanın ikinci dalğası ilə ölkəmizin üzləşməməsi üçün dövlət tərəfindən müəyyən işlər görülür. Həmçinin, yaranmış vəziyyətdə qabaqlayıcı tədbirlər davam etdirilir. Məsələn, artıq məlumdur ki, Rusiyanın istehsal etdiyi koronavirus dərmanı beynəlxalq miqyasda təsdiqləndikdən sonra Azərbaycan bu dərmanı idxal edə bilər: “Bundan başqa, ölkədə seroloji testlər də xüsusi diqqət mərkəzindədir. Xatırladım ki, seroloji test orqanizmə daxil olan hansısa virus və infeksiya zamanı ona uyğun olaraq immun sistemində həmin virus infeksiyasına qarşı cisimciklər, yəni zülal, protein tərkibli anticismlər istehsal olunmağa başladığını müəyyən edir. Həmin anticismlər orqanizmin infeksiyadan özünümüdafiə vasitəsidir. Anticismlər qrip və digər viruslara, o cümlədən, koronavirusa qarşı da istehsal olunur”.
Həmsöhbətimiz onu da əlavə etdi ki, açıq havada və sosial məsafəni qorumaqla iaşə obyektlərinin açılması hər hansı problem yaratmayacaq: “Nəzərə almaq lazımdır ki, virusun açıq havada keçiciliyi daha az olur. Bu halda da sosial məsafəni qorumaq başlıca şərt olmalıdır. İlk başdan da açıq havada olan xidmət obyektlərinin fəaliyyəti təmin edilməli idi. Payız aylarında yoluxmada ikinci dalğa ola və digər virus infeksiyalarının da artması müşahidə oluna bilər. İnsanların bu iki halı birdən yaşama ehtimalı da yüksəkdir. İctimai nəzarət mexanizmi güclü olmalıdır. Avropada, Türkiyədə də ictimai nəzarət mexanizmi çox yaxşı işləyir. Bir insan maskasız rahat hərəkət etdiyi halda, ətrafdan ona etirazlar, tələblər bildirilir. Çünki bu virus bütün dünyada qəbul edilib. Sadəcə, iki yol var: maska taxmaq və gigiyenik qaydalara riayət etmək. Bundan başqa, hələlik virusdan qorunmaq üçün heç bir effektiv təsir yoxdur”.
Günel CƏLİLOVA
