Bakı Nəqliyyat Agentliyinin dayanma-durma qaydalarını pozan sürücülərə qarşı cərimə tətbiq etməsi uzun müddətdir ictimaiyyətdə sərt şəkildə tənqidlərə səbəb olur. Sürücülər bildirirlər ki, ilk növbədə, BNA avtomobillərin qanuni park edilməsi üçün yerlər yaratmalı, təkliflər verməli, sonra bu cür cərimələri yazmalıdır. Eyni zamanda, bildirilir ki, bu cür cərimələr BNA tərəfindən heç bir xəbərdarlıq edilmədən yazılır.
Bu barədə dəfələrlə irad və narazılıq bildirilsə də, BNA-nın əməkdaşları hansısa aptek, market və ya iaşə obyektinin qarşısında avtomobilin bir neçə dəqiqə saxlandığını görən kimi həmin maşının şəklini çəkib, sürücüyə cərimə haqqında bildiriş göndərirlər.
Bu günlərdə millət vəkili Rüfət Quliyev Milli Məclisin İqtisadi siyasət, sənaye və sahibkarlıq komitəsinin iclasında BNA-nın əməkdaşları haqqında narazılıq edib. Millət vəkili Bakı Nəqliyyat Agentliyini (BNA) sərt tənqid edib: “Mən də taksilərin fəaliyyətində qayda-qanunun yaradılmasının tərəfdarıyam. Amma hamımız bilirik ki, bunun axırı hara gedir. BNA-nın əməkdaşları niyə şəkil çəkib qaçırlar? Gəlib izah etsinlər ki, burada saxlama, orada saxla. Daha niyə şəkil çəkən kimi qaçırlar? Təklif edirəm ki, harada dayanma-durma qadağandırsa, bunu plakata yazıb həmin əraziyə vursunlar. Vətəndaş da bilsin ki, burada 5, 10 dəqiqə durmaq olmaz. BNA-nın mühüm şəxslərini dəvət edək və soruşaq ki, cərimələrdən yığılan pullar hara gedir?”.
Millət vəkili Tahir Kərimli bir müddət öncə BNA-nın nəyin bahasına olursa-olsun, cərimə yazmasını böyük bəla adlandırmışdı.
Vaxtilə müğənni Aybəniz Haşımova da BNA-nın işçilərinin yazdığı cərimələrdən gileylənib, bunu biabırçılıq adlandırmışdı. Belə ki, A.Həşimova sosial şəbəkədə yazdığı statusda qeyd edib ki, marketlərin qarşısında maşın saxlamağa qadağanız varsa, onda zəhmət olmasa bunu insanlara bildirin. Onlar da bilsinlər ki, marketdən alış-veriş etmək üçün yalnız taksidən istifadə etməlidirlər: “Ödəniş aparatı qoyulub bir neçə marketin qarşısına. İnsanlar orada pulu ödəyib, marketə daxil olurlar. Evə çatmamış isə artıq BNA-nın cəriməsi gəlir. Bunu necə başa düşək? Zəhmət olmasa bu yerlərə bir işarə qoyun, insanlar da bilsin ki, orada maşın saxlamaq olmaz”.
Qeyd edək ki, BNA-nın əməkdaşlarının avtomobilin şəklini çəkməsi, sonra sürücüyə cərimə haqqında bildirişin gəlməsi sürücülərin haqlı narazılığına səbəb olur.
“Parklanma üçün yer yoxdur, bir tərəfdən də harada saxlayırsa, gəlib cərimə yazırlar”
Sosial sahə üzrə ekspert İlqar Hüseynli bildirib ki, əslində, BNA ondan gözlənilənləri tam doğrultmadı: “Əsas gözləntilər ondan ibarət idi ki, şəhər ərazisində ciddi infrastruktur imkanları yaradılacaq və BNA da buna hər hansı bir töhfə verəcək. Eyni zamanda, ölkənin ən ciddi problemlərindən olan parklanma ilə bağlı ciddi irəliləyişlərin olacağına ümid var idi. Lakin çox təəssüf ki, BNA vətəndaşlara xidmət sektorundan daha çox, cərimə yazan, sürücülərin problemlərini artıran qurum funksiyasına gəlib çıxdı. Bu qurum özünü ölkə ictimaiyyətinə dediyim formada təqdim edə bilib. Biz məsələyə sırf qanunvericilik baxımından yanaşsaq, dayanma və durma ilə bağlı qadağan olunan işarələrin olduğu yerdə sürücüyə cərimənin yazılmasında qanunsuz məqam yoxdur. Burada deyə bilmərəm ki, BNA qanunu pozub. Əvvəllər, məlum olduğu kimi, bu məsələlərlə Azərbaycan Dövlət Yol Polisi məşğul olurdu. Ancaq dəyişikliklərdən sonra bu işlə məşğul olmaq bilavasitə BNA-nın səlahiyyətlərinə verildi. O cümlədən də cərimələrin tətbiqi məsələsi də bu quruma tapşırıldı. Ona görə də işarələrin olduğu yerdə yazılan cərimələr qanunvericiliyə uyğundur.
Həmsöhbətimiz onu da vurğuladı ki, istər prospektlərin infrastruktur imkanlarının artırılması, istərsə də ölkədə ödənişli parklanmaların təşkili baxımından ciddi işlər görülmür: “Şəhərdə nəqliyyatın durmadan artımı bu məsələlərdə də ciddi problemlər yaradır. Vətəndaş maşınını saxlayıb bir neçə dəqiqəlik aptekə, mağazaya daxil olur, qayıdanda isə cərimələrlə üzləşir. Yaxud da nəqliyyat vasitəsinin aparılması halları ilə üzləşirsə, sözsüz ki, narazı qalacaq və qalır da. Ona görə də öncə infrastruktur imkanları artırmaq lazımdır. Parklanma və dayanma-durma yerlərinin sayı nə qədər çoxalacaqsa, o qədər də vətəndaşların rahatlığını təmin edib, cərimədən yaxa qurtarma hallarını artıracağıq. Onlar öz fəaliyyətlərini elə qurmalıdırlar ki, vətəndaşlar narazı qalmasınlar. Burada vətəndaş konkret olaraq qeyri-bərabər vəziyyətə salınıb. Çünki parklanma üçün yer yoxdur, bir tərəfdən də harada saxlayırsa, gəlib cərimə yazırlar. Yəni məsələyə vətəndaşların gözü ilə baxdıqda, onlar haqlı durumdadırlar. Ona görə ki, ilk növbədə, maşın saxlamaq üçün şərait yaratmaq lazımdır. Bu şəraitə əməl edilmədikdə isə cərimə yazmaq haqqın var. Dayanmağa başqa yer yoxdursa, insanlar nə etməlidirlər? Bütün bunlar nəzərə alınarsa, vətəndaşlarla BNA arasında yaşanan və davamlı hala gələn narazılıq aradan qalxar. Əks halda, problem daha da genişlənəcək və narazılıqlar getdikcə artacaq”.
Son olaraq bildirək ki, BNA-nın əsas vəzifələri sürücü və piyadaların təhlükəsizliyini təmin etmək və mütəmadi maarifləndirmə işləri aparmaqdır. Ancaq biz bunun əksinin şahidi oluruq.
Günel CƏLİLOVA
