Arzu Nağıyev: “... Serj Sarkisyansız idarəetmədə Dağlıq Qarabağla bağlı Ermənistanın konstruktivlik göstərməsi ilə nəticələnər”
Ermənistanda, faktiki olaraq, hakimiyyət dəyişir. Artıq Dağlıq Qarabağ hadisələrinin fonunda hakimiyyətə gəlmiş Serj Sarkisyan xalqın etdiyi etirazlara tab gətirə bilməyərək, istefa verib.
Buna baxmayaraq, Ermənistanda köklü hakimiyyət dəyişikliyi hələ də baş verməyib. Ölkə, faktiki olaraq, Sarkisyanın təyin etdiyi kadrlar tərəfindən idarə olunur. Təbii ki, Azərbaycan tərəfini bu istiqamətdə dərindən düşündürən məsələ Dağlıq Qarabağ problemi ilə bağlıdır. Bununla bağlı ekspertlərin rəylərində haçalanma müşahidə edilir. Bəziləri hesab edirlər ki, Ermənistanda hakimiyyət dəyişsə də, Qarabağ məsələsinə münasibət dəyişməz olaraq qalacaq: “İstər daşnak olsun, istər liberal, istərsə də solçular, onların yanaşma tərzi yumşaq və ya sərt ola bilər, amma ümumi yanaşma arasında fərq olmayacaq”. Təbii ki, bu mülahizələrlə razılaşmayanlar da az deyil. Bu səbəbdən də biz ekspertlərə belə bir konkret sualla müraciət etdik: Sarkisyanın hakimiyyətdən gedişi Dağlıq Qarabağ problemi üçün hansı perspektivləri açır?
Politoloq Arzu Nağıyev qəzetimizə açıqlamasında bildirdi ki, artıq İrəvanda hakimiyyət dəyişikliyi baş verib: “Sarkisyanın istefaya məcbur edilməsi bunun ilk fazası sayıla bilər. İndi olmasa da, bir müddət sonra Ermənistanda növbədənkənar parlament seçkiləri keçirilə bilər. Prosedur bunu deməyə əsas verir. İkincisi, Ermənistanda hakimiyyət dəyişikliyi baş verirsə, hakimiyyətin başına kimin gəlməsindən asılı olaraq, Cənubi Qafqazda situasiyaya təsir edə, qüvvələr nisbəti dəyişə bilər. Yeni hakimiyyətə gələn hökumət Rusiya ilə isti münasibətləri qoruyub saxlayacaq, yoxsa başqa yönlü siyasət yürütməyə cəhd edəcək?
Ermənistanın Rusiyanın təsir dairəsindən çıxması asanlıqla baş verməyəcək. Dağlıq Qarabağ münaqişəsinin həlli, təbii ki, tək Sarkisyanın istefasından asılı deyil. Sarkisyanın istefası Ermənistan siyasətində və iqtisadiyyatında daim bir-birinə qarşı olan klanların kəskin mübarizəsinə gətirə bilər və zənnimcə, belə də olacaq. Məlumdur ki, Ermənistanda Rusiyameylli, Qərbyönümlü qüvvələr və Qarabağ klanı əsas mübarizə aparan siyasi, iqtisadi və hərbi güclərdir. Eyni zamanda, Dağlıq Qarabağ kartı bütün məsələlərdə istifadə edilən əsas vasitədir. Bundan isitfadə edərək maddi vəsaitlər silinir, mitinq və digər aksiyalar keçirilir, çağırışçı analarından öz siyasi məqsədləri üçün istifadə edilir. Bütün bunları nəzərə alaraq, demək olar ki, yeni parlament seçkilərinə gedilsə, siyasi vəziyyət dəyişə bilər. Bu isə danışıqların başlanmasına bir təkanın olacağı kimi qeyd edilməlidir. Çünki bu gün münaqişəyə görə Ermənistan bütün beynəlxalq iqtisadi layihələrdən kənarda qalıb, 30 faizdən çox əhalisi yoxsulluq həddində yaşayır, bu, təxminən bir milyon nəfər deməkdir, 16 faizdən çox əhali işsizdir və onların dolanması xaricdən asılıdır. Təkcə Rusiyada 550 mindən çox erməni miqrant var və statistikaya görə, 2017-ci ildə onlar Ermənistana 1.7 milyard dollar gətiriblər, bu isə Ermənistan büdcəsinin gəlir hissəsinin yarısı qədərdir. Yəni normal bir dövlət rəhbərliyi bunu dərk etməli və səbəbin məhz Dağlıq Qarabağ münaqişəsində olmasını başa düşməlidir. Bu belə olsa, müəyyən addımlar atıla bilər ki, bu da Serj Sarkisyansız idarəetmədə Dağlıq Qarabağla bağlı Ermənistanın konstruktivlik göstərməsi ilə nəticələnər. Mənə elə gəlir ki, sonuncu səsləndirdiyim istiqamət üzrə hadisələrin cərəyan edəcəyi daha inandırıcıdır”.
Məhəmmədəli QƏRİBLİ
