Moskvadan “Sarkisyanı ABŞ yıxdı” mesajları gəldi...
Sarkisyanın istefasından sonra Azərbaycan MN Ermənistanda vəziyyətlə əlaqədar bəyanat yayıb. Bəyanat cinayətkar Sarkisyanın Qarabağda təxribatlar edə biləcəyinə diqqət çəkir.
Dünya üçün olduqca ilginc xəbərdarlıq elementlərinə malik bəyanatda qeyd olunur: "Ermənistanda hakimiyyəti sona çatmış qanlı və cinayətkar rejimin tərəfdarlarının qoşunların təmas xəttində vəziyyəti gərginləşdirmək məqsədilə müxtəlif təxribatlara cəhd göstərəcəkləri istisna edilmir.
Bununla əlaqədar bildiririk ki, bütün cəbhəboyu zonada əməliyyat şəraiti qoşunlarımızın tam nəzarəti altındadır, bölmələrimiz atəşkəs rejiminə ciddi riayət edir, gərginliyin artmasının tərəfdarı deyilik və cəbhə xəttində Müdafiə Nazirliyi tərəfindən heç bir hərbi texnikanın cəmləşməsi həyata keçirilmir".
Müdafiə Nazirliyi bəyan edir ki, qoşunların təmas xəttində vəziyyətin kəskinləşməsinə yönələn istənilən düşmən təxribatının qarşısı dərhal, qətiyyətlə və sərt şəkildə alınacaq.
Göründüyü kimi, Azərbaycan Müdafiə nazirliyi çox incə məqamları və elementləri tutub. Həqiqətən də Sarkisyanın cinayətkar dəstəsinin üzvlərinin xalqın qəzəbindən yaxa qurtarmaq üçün cəbhədə irimiqyaslı təxribatlar törətməsi çox realdır. Bununla vaxt udmaq və diqqəti əsas şeylərdən yayındırmaq cəhdləri ola bilər. Digər tərəfdən, Azərbaycan bu arada cəbhə xəttində hər hansı gərginlik yaratmaqda maraqlı olmadığını bəyan etməklə dünyaya çox aydın mesaj verdi ki, baş verə biləcək bütün təxribatların kökü Sarkisyanın hələ də hakimiyyətdən tam getməmiş mafioz klanının və xuntasının niyyətlərinə bağlıdır.
Bu arada, ATƏT-in Minsk Qrupunun həmsədrləri Dağlıq Qarabağ münaqişəsinin tərəflərini təmas xəttində gərginliyi azaltmaq üçün təcili tədbirlər görməyə çağırıb. Bu barədə həmsədrlərin bəyanatında deyilir. "Regionda son siyasi hadisələri və təmas xəttində eskalasiyanın mümkünlüyü fonunda ATƏT-in Minsk Qrupunun həmsədrləri bu həssas dövrdə atəşkəs rejiminə hörmət etməyin vacibliyini vurğulayırlar və xüsusilə də ağır silahları cəbhə xəttindən arxada saxlamağa çağırırlar" – deyə bəyanatda bildirilir.
Həmsədrlər münaqişə tərəflərini gərginliyin azaldılması üçün təxirəsalınmaz tədbirlər görməyə çağırır və münaqişənin uzunmüddətli və dinc həllini tapmaq məqsədilə intensiv danışıqların bərpası üçün tərəflərlə görüşü səbirsizliklə gözləyirlər.
Ermənistandakı hadisələr fonunda, həmsədrlərin cəbhə xəttində yeni gərginlik yaranmasından narahatlıq ifadə etməsi də diqqət çəkir. Buradan belə nəticə çıxarmaq olar ki, Sarkisya rejiminin hələ də hakimiyyətdə qalan tör-töküntülərinin cəbhə xəttində təxribat törətməsi ehtimalı tək Azərbaycanın deyil, həmsədrlərin də diqqətindən yayınmayıb.
Bu arada onu da deyək ki, Rusiya Ermənistanda baş verənləri onun daxili işi saysa da, bəzi Rusiya rəsmilərindən maraqlı konkret açıqlamalar gəlir. Bəzi açıqlamalarda açıq deyilir ki, Sarkisyanı ABŞ devirib.
Bəzi açıqlamalara baxaq.
Ermənistanın ABŞ-ın təsiri altına düşməsi və etibarsız müttəfiqə çevrilməsi ehtimalı şəraitində Rusiya Dağlıq Qarabağ münaqişəsi məsələsi də daxil olmaqla Cənubi Qafqazda üstünlüyü məhz Azərbaycana verməlidir. Bunu “Trend”ə Rusiya prezidentinin səlahiyyətli nümayəndəsi, Siyasi Tədqiqatlar İnstitutunun direktoru Sergey Markov Ermənistanın baş naziri Serj Sarkisyanın istefasını şərh edərkən deyib. S.Markovun sözlərinə görə, S.Sarkisyanın və “Qarabağ klanı”nın gedişi Dağlıq Qarabağ münaqişəsinin həllinə ciddi təsir göstərəcək, amma nə cür təsir göstərəcəyi məlum deyil: “Məsələ ondadır ki, bu təkcə S.Sarkisyanın uzaqlaşdırılması deyil, bu, amerikayönümlü erməni “maydanı”nın qələbəsidir. Nikol Paşinyan erməni dilində mənası “Çıxış” demək olan “Yelk”in rəhbəridir. O dəfələrlə deyib ki, Ermənistan Avrasiya İqtisadi İttifaqından çıxmalıdır. Yəqin ki, bununla bağlı danışıqlar aparılacaq, amma Ermənistanın bu qurumdan çıxması az ehtimal olunur. Həm də ölkə quruma tam daxil də deyil”.
S.Markov hesab edir ki, Ermənistanda iğtişaşlar başlaya bilər, çünki bu çevrilişin nə dərəcədə dinc şəkildə başa çatacağı məlum deyil. Amma “Qarabağ klanı”nın hakimiyyətdən uzaqlaşdırılması Azərbaycana Dağlıq Qarabağ münaqişəsinin həllində ciddi imkan verir: “Heç də bütün ermənilər Dağlıq Qarabağ ətrafındakı rayonların saxlanması və Azərbaycana qaytarılmamasına görə blokadada əziyyət çəkmək istəmirlər. Ona görə də “Kazan formulu” əsasında dinc yolla nizamlanma imkanı artır. Bu formula əsasən, Dağlıq Qarabağ ətrafındakı rayonlar Azərbaycana verilir və bunun cavabında Ermənistanın blokadası qaldırılır”.
Ölkədə hakimiyyətin devrilməsi fonunda Ermənistanın sosial-iqtisadi və siyasi kursunun dəyişməsi məsələsinə toxunan politoloq qeyd edib ki, etiraz hərəkatının liderlərini müstəqil saymır: “Onlar kifayət qədər amerikayönümlüdürlər və onların əsas vəzifələri Ermənistanı Rusiyadan qoparmaq və tarixdə terror aktları ilə tanınan “Daşnaksütyun” kimi təşkilatları Rusiyaya qarşı yönləndirməkdir”.
TAHİR
