Akif Nağı: “Prosesin qarşısı vaxtında alınmasa, bu, kütləvi xarakter alsa, sonra bizim üçün daha çətin olacaq”
Azərbaycan ərazisində qanusuz fəaliyyət göstərən qondarma “Dağlıq Qarabağ Respublikası”nın “xalq məclisi”nin sədri Aşot Quliyan Fransaya etdiyi səfər çərçivəsində həmin ölkənin yüksək vəzifəli şəxsləri tərəfindən qəbul edilib. Ermənistan mətbuatının verdiyi məlumata görə, Qulyan həmçinin “Artsax-Fransa” dostluq cəmiyyətinə rəhbərlik edir.
Məlumatda bildirilir ki, Aşot Qulyan aprelin 5-də Fransa Senatının və Xalq Məclisinin deputatları ilə yanaşı, həmin ölkə rəhbərliyində mühüm posta sahib olan rəsmilər tərəfindən qəbul edilib. Onu qəbul edənlər sırasında Fransa Xalq Məclisinin sədr müavini Byuro-Bonnarın, həmin qurumun “Ermənistan-Fransa” dostluq qrupunun rəhbəri Jak Marilosyanın, Senatın “Ermənistan-Fransa” qrupunun rəhbəri Jilber-Lyuk Devinazın adlarını çəkmək olar. Həmin görüşlərdə Aşot Qulyan bildirib ki, təmsil etdiyi “Artsax” Fransa ilə bütün sahələr üzrə əməkdaşlığın qurulmasına yüksək dəyər verir və bunu prioritetlər sırasına aid edir. Qondarma qurum rəsmisi bildirib ki, Paris və Xankəndində təşkil edilən görüşlərin formatları isə münasibətlərin daha da dərinləşməsinə, təcrübə mübadiləsinə kömək edir: “Bu xüsusda biz “Fransa-Artsax” qrupunun fəaliyyətinə böyük önəm veririk. Hansı ki, bizim üçün Fransaya açılan pəncərə rolunu oynayır”.
Vurğulanır ki, Fransız parlamentarilər Aşot Qulyana Dağlıq Qarabağ münaqişəsinin real vəziyyəti və həlli perspektivləri haqda suallar veriblər. Qulyanla yanaşı, erməniləri həmin görüşlərdə “Artsax” “parlamenti”nin “Vətən” fraksiyasının rəhbəri Artur Tovmasyan, Martuni (Xocavənd) şəhərinin meri Mqer Xaçaraturyan, qondarma qurumun Fransadakı təmsilçisi Ovanes Qevorkyan, Ermənistanın Fransadakı səlahiyyətli nümayəndəsi Levon Amirdjanyan təmsil ediblər. Qondarma qurumu təmsil edən nümayəndə heyətinin Fransadakı səfər proqramı davam edir.
Qeyd edək ki, Fransa Dağlıq Qarabağ münaqişəsinin həlli ilə bağlı yaradılan vasitəçilik missiyasına həmsədrlik edən ölkələrdən biridir. Onun rəsmilərinin bu cür davranışları həmin missiyanın üzərinə kölgə salır və Parisin separatçılara göstərdiyi qayğının təzahürü kimi dəyərləndirilə bilər. Dəfələrlə Azərbaycanın rəsmi etirazlarına baxmayaraq, təəssüflər olsun ki, Fransa qondarma quruma göstərdiyi diqqət və açıq dəstəkdən əl çəkmir. Əksər hallarda Fransa hökuməti bu cür davranışların onların rəsmi mövqeyi kimi yozulması ilə razılaşmayıb. Bəs hazırkı vəziyyət necə izah oluna bilər? Fransanın qanunverici orqanının sədr müavini və digər rəhbər şəxsləri separatçılardan ibarət nümayəndə heyətini rəsmi səviyyədə qəbul edirsə, bunun adını nə qoymaq olar?
Qarabağ Azadlıq Təşkilatının sədri Akif Nağı qəzetimizə bildirdi ki, Fransanın bu hərəkətinə artıq hansısa başqa don geydirilməsi mümkün deyil: “Bilirsiniz ki, Fransa adətən ortaya belə məsələlər çıxanda vəziyyətdən müxtəlif bəhanələrlə çıxmağa çalışır. İndiki vəziyyət isə acınacaqlıdır. Qondarma qurumun bir nümayəndə heyətinə Fransada dövlət səviyyəsində diqqət göstərilib. Mən bunu Fransanın münaqişəyə olan dövlət mövqeyi kimi dəyərləndirirəm. Məlumata rast gəldim ki, bizim Xarici İşlər Nazirliyi bununla bağlı nota verməyə hazırlaşır. Düz edirlər, hətta bir az da sərt mövqe ortaya qoyulmalıdır. Artıq ermənilər təhlükəli bir mərhələyə start veriblər. Onlar faktiki olaraq qondarma rejimin tanıdılması işinə girişiblər. Mən deyərdim ki, hətta müəyyən nəticələrə də imza atıblar. Bir müddət əvvəl qondarma rejimin rəhbəri ABŞ-a səfər edib Konqresdə görüşlər keçirdi. İndi də onun nümayəndəsi sayılan Qulyan ermənilərin daha çox məskunlaşdığı Fransaya səfər edir və yüksək səviyyədə qəbul edilir. Fransa hökuməti bu məsələyə birmənalı şəkildə aydınlıq gətirməlidir. “Azərbaycanın ərazi bütövlüyünü tanıyırıq” kimi bəyanatlarla bu cür münasibət bir araya sığmır və bizə kifayət etmir. Azərbaycan hakimiyyəti bu cür dövlətlərə münasibətdə daha sərt olmalıdır. Yeri gəlsə, diplomatik əlaqələrin kəsilməsinə gedilməlidir. Çünki prosesin qarşısı vaxtında alınmasa, bu, kütləvi xarakter alsa, sonra bizim üçün daha çətin olacaq. Artıq ermənilər bu istiqamətdə ciddi maliyyə də xərcləyirlər. Yalnız dövlət deyil, cəmiyyət də məsələyə sərt reaksiya verməlidir. Biz artıq Fransa Səfirliyinin qarşısında bu məsələ ilə bağlı etiraz aksiyası keçirməyi planlaşdırırıq. Fransanın bu cür davranışı ATƏT-in Minsk Qrupuna olan mənfi münasibəti bir qədər də pisləşdirmiş oldu. Onlar açıq şəkildə ermənilərin tərəfini saxlayırsa, hansı güvəndən söhbət gedə bilər?”
Məhəmmədəli QƏRİBLİ
