Arzu Nağıyev: “Seçkilərdən sonra müəyyən kadr və digər islahatlar aparıla bilər və bu da adi proseslərdən biridir”
Bu gün Azərbaycanda tam ictimai-siyasi sabitlik mövcuddur. Ölkəmiz təkcə Cənubi Qafqazda və MDB məkənında deyil, dünyada aparıcı bir mövqeyə sahibdir. Heç şübhəsiz, belə bir sabitliyin olduğu ölkədə prezident, parlament və bələdiyyə seçkilərinin ən yüksək səviyyədə keçirilməsi mümkündür.
Prezident seçkilərinin keçirilməsi proseduruna uyğun olaraq, bir sıra mərhələlər uğurla keçildi. Artıq vətəndaşlarımızın qutu başına getməsinə sayılı günlər qalır. Ancaq ölkədəki situasiyadan görünür ki, vəziyyətin belə qənaətbəxş olması heç də hamının ürəyincə deyil. Bəzi radikal düşərgə təmsilçiləri çıxışlarında etiraf edirlər ki, Azərbaycanda hakimiyyəti seçki yolu ilə dəyişmək mümkün deyil. Bunun üçün də onlar özləri üçün yeganə çıxış yolunu situasiyanın gərginləşməsində görürlər. Hesab edirlər ki, yalnız bu cür qanunsuz vasitələrlə hansısa kardinal dəyişikliyə nail ola bilərlər. Bu baxımdan da daim gərginliyin olacağı, stabilliyin pozulacağına dair məlumatları dövriyyəyə buraxırlar. Həmin düşərgə iddia edirdi ki, Azərbaycanda seçki öncəsi gərginlik yaşanacaq. Görünən budur ki, bədbin proqnozları özünü doğrultmadı. Bu səbəbdən də həmin yalanı kompensasiya etməyin yolunu vaxtı dəyişməkdə görüblər. Həmin çevrələr indi də deyirlər ki, gərginlik, stabilliyin pozulması seçkidən sonraya təsadüf edə bilər. Ancaq biz dəfələrlə ölkə başçısının çıxışlarından eşitmişik ki, ölkəmizdə bu sarıdan heç bir narahatlıq və risq faktoru yoxdur.
Prezident seçkisindən sonra ölkədə gərginliyin olacağına dair bəzi radikal dairələrin verdiyi bədbin proqnozları nə dərəcədə əsaslı saya bilərik?
Təhlükəsizlik məsələləri üzrə ekspert Arzu Nağıyev qəzetimizə açıqlamasında bildirdi ki, Azərbaycanda ictimai-siyasi vəziyyət artıq uzun illərdir bir çox ölkələrə nümunə ola biləcək səviyyədə sabitdir: "Əgər belə olmasaydı, mötəbər beynəlxalq tədbirlərin, idman yarışlarının Azərbaycanda keçirilməsi mümkün olmazdı. Dünyanın böyük güc sahibi olan dövlətlərin xarici işlər nazirləri, ordu generalları aralarındakı mübahisəli məsələlərin müzakirəsi üçün ardıcıl olaraq məhz Azərbaycanı, onun paytaxtı Bakını seçirlərsə, bu, ölkəmizdəki sabitlik, təhlükəsizlik durumuna verilən yüksək qiymətdir. Düşünürəm ki, belə bədbin proqnozlar hansısa konkret faktlara söykənilərək verilməlidir. Hazırda istər daxili, istərsə də xarici siyasətdə elə bir gərginlik hiss edilmir. Bundan başqa, Dağlıq Qarabağ münaqişəsi ilə də bağlı kiçik təxribatlar nəzərə alınmasa, mühüm bir dəyişiklik hiss edilmir. Bu gün müstəqil xarici müşahidəçilərin yaydığı bəyanatlarda da elə bir həyəcanlı fikirlərə rast gəlinmir. Təbii ki, seçkilərdən sonra müəyyən kadr və digər islahatlar aparıla bilər və bu da adi proseslərdən biridir. Belə hadisələr isə ölkəmizdə hansısa gərginliyə səbəb ola bilməz. Çünki ən ali dövlət rəsmiləri, hətta ölkə başçısı da daxildəki vəziyətin stabilliyindən dəfələrlə məmnunluq ifadə ediblər. Bildiyiniz kimi, seçkiöncəsi təbliğat və təşviqat prosesi də normal gedir. Bu baxımdan da hesab edirəm ki, prezident seçkilərinin əminamanlıq şəraitində keçəcəyinə dair kimdəsə şübhə ola bilməz. Bundan əlavə, Azərbaycanda stabillik və təhlükəsizliyin qorunmasına cavabdeh olan qurumlar da olduqca peşəkar səviyyədə çalışırlar. Hətta belə kiçik niyyətlər olsa belə, onların qarşısının vaxtında alınacağına heç bir şübhə ola bilməz”.
Məhəmmədəli QƏRİBLİ
