Məhərrəm Zülfüqarlı: “Azərbaycanda səsvermə yaşına çatmış vətəndaşların adı avtomatik olaraq seçici siyahılarına qeyd edilir”
Məlum olduğu kimi, Azərbaycanda keçiriləcək prezident seçkisini müşahidə edəcək qurumlardan biri də ATƏT/DTİHB-dir. Həmin qurum seçki ilə bağlı keçirilən bütün mərhələləri yaxından izləyir və monitorinq edir. Qurumun Azərbaycanda keçiriləcək prezident seçkilərini müşahidə missiyası aralıq hesabatını açıqlayıb. Hesabat 9-24 mart tarixlərini əhatə edir.
Hesabatda bildirilir ki, uzunmüddətli müşahidə missiyası martın 9-da keçirilmiş mətbuat konfransından sonra rəsmən fəaliyyətə başlayıb. Sözügedən hesabatda seçkilə bağlı monitorinq edilən birinci mərhələ yüksək qiymətləndirilir. Ancaq aralıq hesabatda bəzi tənqidi notlara da rast gəlinir. Hesabatda yer alan analoji məqamlardan birini diqqətə çatdırırıq: “Missiyaya rəsmi qurumlardan məlumat verilib ki, səsvermə hüququna malik insanların qeydiyyatı tam aparılıb. Lakin, eyni zamanda, bəzi müsahiblər ölkədə səsvermə yaşına çatmış insanlarla qeydiyyata alınmış seçicilər arasında fərq olduğunu bildirirlər”.
Hər halda, missiyanın gəldiyi bu qənaəti mütləq həqiqət kimi qəbul etmək olmaz. Çünki belə bir məsələdə Azərbaycan hakimiyyətinin hansısa saxtakarlıqda maraqlı olması mümkün deyil. Deyilən detal seçkinin nəticəsinə təsir etmək gücündə olmayan bir nüansdır. Amma göründüyü kimi, aralıq hesabatda bu, mənfi detal kimi qeyd edilir. Onda isə Azərbaycan hakimiyyətinin belə bir fərqin meydana çıxmasında qətiyyən maraqlı olmadığını missiyaya hansı üsullarla və tutarlı arqumentləri irəli sürməklə izah etmək olar?
Seçki sahəsində böyük təcrübəyə malik olan AVCİA seçki qərargahının rəhbəri Məhərrəm Zülfüqarlı qəzetimizə bildirdi ki, sözügedən qurum bəzən əsası olmayan tənqidlərə yol verir: “Biz onların iş prinsipinə yaxından bələdik. 2013-cü ildə keçirilən prezident seçkilərində tənqidi yanaşdıqları çox gülməli bir məqam vardı. Deyirdilər ki, namizədlər arasında qadın yoxdur. İndi bu bizim günahımızdır? Bizim qanunlarımız qadınlara prezidentliyə namizəd olmağa imkan verirsə, hansısa qadın bu estafetdə özünü sınamaq istəmirsə, bunun məsuliyyətini niyə hakimiyyət daşımalıdır? Dediyiniz təsisat bəzən tənqid tapmayanda gülməli arqumentlərdən yapışır ki, hesabat birtərəfli olmasın. Guya fərqli fikirlər ortaya qoyurlar. Mən onlarla son günlər ərzində iki dəfə görüşmüşəm. Hər zaman da onlarla diskussiya aparıb, səhvlərini demişəm. Bizim ekspertlər, seçki ilə məşğul olan qurumlar onların tənqidi yanaşdıqları hər mövzunu onlara dəqiqliklə izah etməlidirlər. İndi biz bilmirik ki, seçkidən sonra onlar hansı açıqlamaları yayacaqlar. Bu səbəbdən indidən hazır olmalıyıq. Aralıq hesabatda yer alan kiçik tənqidlə bağlı irəli sürülən iddia olduqca primitivdir. Çünki Azərbaycan hakimiyyəti belə “saxtakarlığın” edilməsində maraqlı ola bilməz. Niyə də olsun ki? Bu, nəyi dəyişəcək? Azərbaycanda səsvermə yaşına çatmış vətəndaşların adı avtomatik olaraq seçici siyahılarına qeyd edilir. Texniki səbəbdən adı əlavə olunmayan fərdlər olursa, onlarla bağlı da elan verilir ki, bunu asan yolla edə bilərlər. Hətta onlara virtual olaraq da belə imkan yaradılır. Bu baxımdan da irəli sürülən iddianı ciddi saymıram. Onları inandırmaq üçün isə bütün təmaslarda əlaqədar adamlar bu detalları onların nəzərinə mütləq çatdırmalıdırlar”.
Məhəmmədəli QƏRİBLİ
