Məhərrəm Zülfüqarlı: “Azərbaycan indiki dünyaya bir daha göstərir ki, şəffaf, açıq bir ölkədir”
Aprelin 11-də keçiriləcək prezident seçkilərinə bütün mənalarda maraq artmaqdadır. Bu da təsadüfi deyil. Ona görə ki, Azərbaycanın Seçki Məcəlləsi təkmil, standartlara cavab verən seçkilərin keçirilməsinə şərait yaradır. Çünki Azərbaycanın Seçki Məcəlləsi bəzi ölkələrin Seçki Məcəlləsindən daha təkmildir. Elə ölkələr var ki, orada seçki qanunvericiliyi yoxdur. Azərbaycanın Seçki Məcəlləsində məsələlər daha təfsilatı ilə əksini tapır.
Bununla yanaşı, ölkədə getdikcə seçki komissiyalarının üzvləri peşəkarlaşır, daha çox məlumat əldə edir, cəmiyyət də ilbəil seçkilərə daha fərqli mövqe sərgiləyir. Azərbaycanın Seçki Məcəlləsi beynəlxalq standartlara cavab verən seçkilərin keçirilməsi üçün təkmil bir sənəddir. Beynəlxalq ictimaiyyət hər zaman Azərbaycana maraq göstərib. Çünki Azərbaycan regionda ən güclü, ən inkişaf edən dövlətdir. Bu çox mühüm məsələdir. Elə ölkələr var ki, həm ərazisinə, həm də əhalisinin sayına görə Azərbaycandan böyükdür, amma həmin dövlətlərin adı müsbət və ya mənfi mənalarda hallanmır. Ona görə ki, həmin ölkələr dünya, beynəlxalq təşkilatlar üçün maraqlı deyillər. Azərbaycan hər zaman beynəlxalq təşkilatların maraq dairəsində olub. Demokratikləşmə sahəsində ən mühüm məsələ seçkilərin keçirilməsidir. Əvvəllər keçirilən seçkilər kimi, aprelin 11-nə təyin olunan prezident seçkilərinə də maraq böyükdür. Bunun bir bariz göstəricisi də prezident seçkilərini izləyəcək beynəlxalq müşahidəçilərin sayının çoxluğudur.
Qeyd edək ki, aprelin 11-nə təyin edilmiş prezident seçkilərini müşahidə etmək üçün 603 beynəlxalq müşahidəçi Mərkəzi Seçki Komissiyasında (MSK) qeydiyyatdan keçib. Belə ki, seçkiləri 52 beynəlxalq təşkilatın nümayəndələri müşahidə edəcək, Azərbaycana gələn beynəlxalq müşahidəçilər 54 ölkəni təmsil edirlər.
Göründüyü kimi, xeyli sayda beynəlxalq müşahidəçi seçkiləri müşahidə edəcək. Ümumilikdə, çoxsaylı beynəlxalq müşahidəçinin seçkini müşahidə etməsi Azərbaycan üçün hansı üstünlüklər vəd edir?
Məsələyə münasibət bildirən Azərbaycanda Vətəndaş Cəmiyyətinə Yardım Assosiasiyası (AVCYA) Seçki Qərargahının rəhbəri Məhərrəm Zülfüqarlı buna bir neçə prizmadan yanaşdı: “Bunun bir sıra üstünlükləri var. Azərbaycan indiki dünyaya bir daha göstərir ki, şəffaf, açıq bir ölkədir. İstənilən təşkilat Azərbaycanın dəvəti ilə gəlib seçkiləri müşahidə edə bilər. ATƏT-in Demokratik Təsisatlar və İnsan Haqları Bürosunu müşahidə aparmaq üçün ABŞ-ın bəzi ştatlarına heç buraxmırlar. Ancaq Azərbaycanda sözügedən qurumun seçkiləri müşahidə etməsi üçün hər cür şərait yaradılıb. Bu onu göstərir ki, Azərbaycan dünyaya açıq ölkədir. Seçkilərdə demokratik institutların müşahidə aparmasından narahat deyil. İnşallah, bununla bağlı işlər uğurla həyata keçiriləcək. İndi seçkidən sonra kimlər hansı bəyanatı verəcəksə, ondan sonra məsələyə münasibət bildiriləcək. Reallıq ondan ibarətdir ki, beynəlxalq müşahidəçilərin Azərbaycanda keçiriləcək prezident seçkilərinə marağı böyükdür. Hesab edirəm ki, Azərbaycanın dünyada imicinin daha da yüksəlməsi baxımından bunun mühüm əhəmiyyəti var. Nəzərə almaq lazımdır ki, Azərbaycan regionda ciddi çəkiyə və nüfuza malikdir. Bir sıra məsələlərdə Azərbaycanla hesablaşırlar. Ona görə də ölkəmiz beynəlxalq qurumların maraq dairəsindədir. Bütün bunlar, əlbəttə ki, Azərbaycanın dünyada artan nüfuzunun göstəricisidir. O üzdən, hesab edirəm ki, buna müsbət prizmadan yanaşmaq lazımdır”.
Vidadi ORDAHALLI
