Daşdəmir Əliyev: "Bu üsul da lazımi effekt verməyəcək"
Ermənistanın müdafiə naziri Vigen Sarkisyanın 2017-ci il iyunun 20-də verdiyi əmr hərbçilər tərəfindən etirazla qarşılanıb. Erməni KİV-inin yazdığına görə, yeni əmrə əsasən hərbçilərlə bağlanmış müqavilələrin şərtləri dəyişdirilib.
Vəkil Norayr Norikyan bildirib ki, bu əmrdən sonra 17 zabit hüquqlarının bərpa edilməsi tələbi ilə məhkəməyə müraciət ediblər. Əmrə görə, hərbi təhsil müəssisəsini bitirmiş zabit 10 il başa çatmamış xidmətdən imtina edərsə, hər il üçün hazırda mövcud olan 250 min dram (880 AZN) "cərimə" əvəzinə, dövlətə 1 milyon dram (3525 AZN) ödəməlidir. Bir çox zabitlər yeni müqaviləni imzalamaqdan imtina ediblər.
N.Norikyan deyib: "Təəssüf ki, zabitlərin böyük əksəriyyəti bu gün Ermənistanı tərk etmək məcburiyyətində qalıb. Bu bizim ümumi bəlamızdır və ordunun problemidir. Ermənistan ordusunun zabiti öz ailəsini saxlamaq iqtidarında deyil, ailəsini dolandırmaq üçün xaricə getməyin yollarını axtarır. Bu həm də dövlətin strateji problemidir və dövlət bu sahədə əsaslı dəyişikliklər etməyə borcludur.
Elə şərait yaradılmalıdır ki, zabit ordunu özbaşına tərk etməsin. Müdafiə Nazirliyi çalışır ki, bu yolla ordudan axının qarşısını alsın, ancaq mümkün deyil".
Erməni zabitlərlə bağlanan yeni müqavilələr nəyin göstəricisi sayıla bilər?
Ekspert Daşdəmir Əliyev qəzetimizə açıqlamasında bildirdi ki, bu faktın özü Ermənistan ordusunda olan acınacaqlı vəziyyətin bariz göstəricisidir: "Biz dəfələrlə bu barədə məlumat vermişik. Bildirmişik ki, Ermənistan ordusunda "dedovşina", korrupsiya, fərarilik halları baş alıb gedir. Erməni anaları mətbuatda açıq şəkildə bəyanatlar veriblər ki, övladlarının Qarabağda ölməsini istəmirlər. Hətta bir neçə dəfə bununla bağlı aksiya da keçiriblər. Bundan çıxış yolunu tapa bilməyən Ermənistan hakimiyyəti müxtəlif üsullara əl atır. Ordu ilə xalqı birləşdirmək, daha doğrusu, arada olan uçurumu götürmək üçün, yeni konsepsiya da ortaya atdılar. Ancaq görünür bu da effekt vermədi. Bu səbəbdən də inzibati yollara əl ataraq zabitlərin ordunu tərk etməsinin qarşısını almağı düşünürlər. Zabitlərlə bağlanan yeni müqavilə onları məcburi şəkildə orduda xidmətdə saxlamaq məqsədini daşıyır. Təbii ki, mövcud vəziyyətdə olan Ermənistanın alternativ yollara əl atmaq şansı da qalmayıb. Dilənçi həddində olan ölkənin iqtisadiyyatı zabitlərin rifahını qaldırmaq, onları orduya bağlamaq üçün tədbirləri həyata keçirməyə imkan vermir. Əməkhaqqını qaldırmaq gücündə olmayan hökumət hədə-qorxu ilə ordudan olan fərariliyi azaltmaq istəyir. Ancaq düşünürəm ki, bu üsul da lazımi effekt verməyəcək. Artıq bir çox zabitlər yeni müqaviləni bağlamaqdan imtina edirlər".
Məhəmmədəli QƏRİBLİ
