Qabil Hüseynli: "Bir növ, mərhələli həll planının tərkib hissəsidir"
ABŞ Ermənistan-Azərbaycan, Dağlıq Qarabağ münaqişəsinin sülh yolu ilə həlli üçün münaqişə tərəfləri ilə işə sadiqdir. Bunu ATƏT-in Minsk Qrupunun amerikalı həmsədri Riçard Hoqland deyib.
O qeyd edib ki, ərazilərin geri qaytarılması, azərbaycanlı qaçqın və məcburi köçkünlərin öz torpaqlarına qayıtması, güc tətbiq edilməməsi və Dağlıq Qarabağın statusunun müəyyən edilməsi məsələləri hərtərəfli həll prosesinin vacib tərkib hissələridir və tərəflər bunları müzakirə etməlidirlər:
"Məhz buna görə də ATƏT-in Minsk Qrupunun digər həmsədrləri ilə birgə çalışırıq ki, Azərbaycan və Ermənistan prezidentlərinin görüşünü tez bir zamanda təşkil edək. Mən xatırlatmaq istərdim ki, həmsədrlər vasitəçidir. Biz tərəfləri yekun qərar qəbul etməyə məcbur edə bilmərik".
R.Hoqland onu da bildirib ki, yaxın həftələrdə və aylarda diplomatik fəaliyyətin genişlənəcəyi müddətdə həmsədrlər danışıqların yüksək səviyyədə təmin olunması üçün bir sıra bəyanatlar verəcək.
Göründüyü kimi, Hoqland danışıqların əsas 4 istiqamət üzrə aparılmasının vacibliyini vurğulayır. ABŞ-lı həmsədrin açıqlamasına necə yanaşmaq olar?
Politoloq Qabil Hüseynli qəzetimizə bildirdi ki, son günlər ABŞ-dan olan həmsədrin xüsusi fəallığı nəzərə çarpır: "Biz adətən həmsədrlərdən növbətçi bəyanatlar eşitməyə öyrənmişik. Hoqland isə konkret yol xəritəsi ortaya qoyur. Demək ki, ABŞ-ın yeni administrasiyası problemin həllində nəticənin əldə olunmasında daha maraqlı görünür. Xüsusi fəallıq bununla izah edilə bilər. Həmsədrin açıqladığı 4 şərt Azərbaycanın da mövqeyilə tam uzlaşır. Bir növ, mərhələli həll planının tərkib hissəsidir. Ərazilərin geri qaytarılması, azərbaycanlı qaçqın və məcburi köçkünlərin öz torpaqlarına qayıtması, güc tətbiq edilməməsi və Dağlıq Qarabağın statusunun müəyyən edilməsi məsələləri hərtərəfli həll prosesinin vacib tərkib hissələridir. Erməni tərəfi isə dəfələrlə bu plandan qaçıb. Bu 4 şərt daxilində bəzi detallar müzkirə oluna bilər. Təbii ki, ermənilər status məsələsində başqa şərtlər irəli sürürlər. Azərbaycanın isə mövqeyini Prezident bəyan edib. Biz onlara Azərbaycanın tərkibində ən yüksək muxtariyyət verməyə hazır olduğumuzu bəyan etmişik. Prinsip etibarilə, Hoqlandın təklifi bizi qane edə bilər. Yəqin ki, digər həmsədrlərlə razılaşdırılmış mövqedir. İndi gözləyək görək, Ermənistan buna əməl edəcəkmi?".
Məhəmmədəli QƏRİBLİ
