Yeganə Hacıyeva: "Belə bir hərəkəti edən ölkə analoji hadisələrlə üzləşəcəyindən..."
ATƏT-in Minsk Qrupu vasitəçiləri də prezidentlərin Nyu-York görüşünü istisna etmirlər. Belə bir görüşün keçiriləcəyilə bağlı təxminlər artdıqca, Ermənistan mediası bu istiqamətdə ciddi təbliğat aparır. Ən maraqlısı isə budur ki, onlar görüş ərəfəsində özlərinə sərf edən dezinformasiyaları da dövriyyəyə buraxırlar. Son günlər ərzində Ermənistan mediasının daha çox yaydığı məlumatlardan biri də müharibə başlayacağı təqdirdə Azərbaycanın Zəngəzura hücum edəcəyi və bununla Naxçıvana quru yolu ilə dəhliz açacağı ilə bağlıdır.
Belə məlumatın yayılması nə ilə bağlıdır?
Politoloq Yeganə Hacıyeva qəzetimizə bildirdi ki, bununla Ermənistan diqqəti Dağlıq Qarabağdan maksimum uzaqlaşdırmağa çalışır: "Fikir verirsinizsə, bu işi, mətbuatla paralel olaraq, onların ordu birləşmələri də görür. Dağlıq Qarabağın hüdudlarından kənarda olan kəndlərimiz, dinc əhali atəşə tutulur. Məqsəd münaqişənin yalnız Dağlıq Qarabağı əhatə etmədiyini göstərməkdir. Zəngəzura gəldikdə isə, ora həqiqətən də Azərbaycanın tarixi ərazisidir və Ermənistana necə verildiyi uzaq keçmişi əhatə etmir.
Prezident İlham Əliyev çıxışlarında mütəmadi olaraq Zəngəzur və İrəvan xanlığının Azərbaycana mənsubiyyətindən danışıb. Bu tarixi danmaq olmaz. Erməni təhlilçilər özlərini sığortalamaq üçün bizi qabaqlayaraq, guya Azərbaycanın Zəngəzurda gözünün olduğu təəssüratını yaratmaq istəyirlər. Eyni zamanda, onlar bilirlər ki, Naxçıvan ərazisində Azərbaycanın güclü hərbi potensialı cəmləşib. Ermənilərin sülh danışıqlarında qeyri-konstruktivlik göstərəcəyi təqdirdə hərbi əməliyyatların geniş miqyası əhatə edəcəyi istisna deyil. Naxçıvanın məhz Zəngəzurla həmsərhəd olduğunu bilən ermənilər bu vasitə ilə özlərini sığortalamağa çalışırlar ki, Naxçıvan istiqamətində olan həmlələrə başqa don geyindirə bilsinlər. Bizim hələlik azad etmək istədiyimiz torpaqlar Dağlıq Qarabağ və ona bitişik olan, işğal altında saxlanan rayonlarımızdır. Zəngəzur məsələsinə isə sonrakı mərhələdə baxmaq olar. Ancaq ermənilər Naxçıvana həmlə etməyə cəhd etsələr, Azərbaycanın müdafiə qüdrəti imkan verir ki, ermənilərin iddia etdiyi plan həyata keçsin. Bilirsiniz ki, ermənilər Azərbaycanın Laçın rayonunu işğal etməklə Dağlıq Qarabağla Ermənistan arasında dəhliz yaradıb. Yəni belə bir hərəkəti edən ölkə analoji hadisələrlə üzləşəcəyindən də ehtiyat etməməlidir".
Məhəmmədəli QƏRİBLİ
