Ayaz Oruclu: "Ölkəmizdəki vəziyyət müqayisəyəgəlməz dərəcədə yaxşıdır"
Azərbaycan əhalisinin sayı 2017-ci ilin əvvəlindən 40 096 nəfər və ya 0,4 faiz artaraq 9 850 077 nəfərə çatıb. Dövlət Statistika Komitəsindən verilən məlumata görə, ümumi əhalinin 53,0 faizini şəhər, 47,0 faizini kənd sakinləri, 49,9 faizini kişilər, 50,1 faizini isə qadınlar təşkil edir. Əhalinin bir kvadrat kilometrə düşən sıxlığı 114 nəfər olub. Hazırda hər 1000 kişiyə 1006 qadın düşür.
Ancaq bizimlə müharibə vəziyyətində olan Ermənistanda isə demoqrafik vəziyyət olduqca acınacaqlıdır. Ermənistanlı demoqraf Ruben Yeqanyan ölkəsində doğum səviyyəsinin aşağı düşdüyünü bildirib: "Problem tək sosial vəziyyətlə bağlı deyil. Ağır 90-cı illərdə Ermənistanda doğulmuş az sayda insan hazırda reproduktiv yaşdadır. Daha yuxarı yaşda olan insanların da nikaha girməsinə baxmayaraq, onların reproduktiv mərhələsi keçdiyindən, valideyn ola bilmirlər, nəticədə əhali artımı baş vermir. Ən böyük problem isə miqrasiya məsələsidir. Hələ ki, miqrasiya sahəsində müsbət irəliləyiş yoxdur. Ölkədən çıxan və gələn şəxslərin illik mənfi saldosu 40 min nəfər təşkil edir ki, bu da Ermənistan əhalisinin 1-1,5 faizi qədərdir".
Ekspert bildirib ki, inzibati amirlik tədbirlərilə demoqrafik vəziyyətin yaxşılaşmasına çalışılsa da, nəticə yaxşıya doğru dəyişməyib.
Real demoqrafik göstəricilər Azərbaycanla Ermənistan arasında hansı fərqi üzə çıxarmış olur?
Ekspert Ayaz Oruclu qəzetimizə bildirdi ki, müqayisəni aparmaq üçün Ermənistanın yaydığı rəsmi rəqəmlərə istinad etmək kifayət edir: "Biz özümüzdən hansısa rəqəmlər səsləndirsək, qərəzli olmaqda günahlandırıla bilərik. Son 12 ayda Ermənistanda daimi yaşayan əhalinin sayı təxminən 13 min nəfər azalıb. Ölkənin milli statistika xidmətinin yaydığı son məlumata görə, bu il aprelin 1-dək Ermənistan əhalisinin sayı 2 milyon 981 min nəfər olub. Əvvəlki ilin eyni dövrü ilə müqayisədə isə əhalinin sayı 2 milyon 994 min nəfər idi.
Erməni demoqrafları isə hesab edirlər ki, ölkədəki demoqrafik vəziyyətin real dinamikasını il ərzində ölkəni nə qədər adamın tərk etməsi ilə bağlı rəsmi rəqəmlər əks etdirir.
Məlumatlara nəzər salanda 2016-cı ilin immiqrasiya baxımından rekord olduğunu görürük və Ermənistan Respublikasının rəsmi sənədlərində bu rəqəm 54 min nəfər göstərilir. Erməni ekspertlər ölkədə demoqrafik vəziyyətin faciəvi həddə çatdığını, ölkədə doğum həddinin də, demək olar ki, hər il azaldığını vurğulayırlar.
2016-cı ilin birinci rübündə Ermənistanda 9125 uşaq doğulduğu halda, bu ilin eyni rübündə ölkədə 8534 uşaq doğulub. Əgər immiqrasiya təbii artımla kompensasiya edilmirsə, onda Ermənistan ciddi demoqrafik böhran, demək olar ki, fəlakətlə üzləşib. Bu göstəriciləri Azərbaycanla müqayisə etdikdə, ciddi təzad ortaya çıxır. Çünki ölkəmizdəki vəziyyət müqayisəyəgəlməz dərəcədə yaxşıdır".
Məhəmmədəli QƏRİBLİ
