Qabil Hüseynli: "Bununla Ermənistan özünü əsl problemlərdən sığortalaya bilməyəcək"
Son vaxtlar Ermənistan silahlı qüvvələrinin bölmələri cəbhənin müxtəlif istiqamətlərində iriçaplı silahlardan da istifadə etməklə sutka ərzində atəşkəs rejimini mütəmadi şəkildə pozurlar. Məlumdur ki, Ermənistanın daxilində səfalət, aclıq hökm sürür. Sosial-iqtisadi, demoqrafik vəziyyət olduqca ağırdır. Çox güman ki, Sarkisyan hakimiyyəti əhalinin diqqətini bu problemlərdən yayındırmaq üçün cəbhədəki gərginliyi bilərəkdən artırır. Bu üsullar Sarkisyan üçün nə dərəcədə təsirli faktora çevrilə bilər?
Politoloq Qabil Hüseynlinin sözlərinə görə, Ermənistan qoşunlarının hər gecə cəbhədə təxribat törətməsi daxili amillər - Sarkisyan hakimiyyətinin ciddi problemlərlə baş- başa qalmasının göstəricisidir: "Uzun zamandır Ermənistan cəmiyyətində Sarkisyan rejiminə qarşı böyük nifrət formalaşıb. Bunu bilən Sarkisyan rejimi sərhəddə vəziyyəti gərginləşdirməklə daxili ictimai-siyasi vəziyyəti öz xeyrinə dəyişmək istəyir. Yəni ölkə daxilində siyasi qütbləşmə pik həddinə çatıb və cəmiyyətdə Sarkisyan hakimiyyətinə nifrət son həddədir. Nifrət o qədər güclüdür ki, hətta gənclər ordudan yayınır və ölkəni birdəfəlik tərk edirlər. Bu yolla isə Sarkisyan rejimi cəmiyyətin gözünü qorxutmaq istəyir. Daxildəki etirazları səngitmək məqsədilə ermənilər cəbhə xəttində gərginlik yaratmaqla, Azərbaycanı öz təxribatlarına cəlb etmək istəyirlər. Bu yolla həm də özlərinin ordusunun daxilindəki pozuculuq, fərarilik hallarını "xarici düşmən" obrazı ilə cəzalandırmağa çalışırlar. Bir yandan da bu təxribatlar Azərbaycan tərəfinə psixoloji təsir göstərmək məqsədilə törədilir. Dinc əhaliyə qarşı tətbiq edilən gülləbaranlar, təmas xəttinə yaxın kəndlərin atəşə tutulması cəbhəyə yaxın kəndlərdə yaşayan ailələr arasında panika yaratmaq və əhalini köçməyə sövq etmək məqsədi daşıyır. Ancaq Azərbaycan Ordusu onların bu alçaq cəhdlərinin qarşısını qətiyyətlə alır və mülki əhalini də bütün təhlükələrdən müdafiə edir".
Q.Hüseynlinin sözlərinə görə, ermənilərin cəbhədə gərginlik yaratmasının beynəlxalq aspektləri də ola bilər. Bilirsiniz ki, bu günlərdə Rusiyanın özündə də vəziyyət ürəkaçan deyil. Rusiyaya qarşı tətbiq edilən sanksiyalar əhalinin əhval- ruhiyyəsini xeyli dərəcədə korlayıb. Belə olan halda isə super güclərin gündəmi dəyişmək və diqqəti başqa hadisələrə yönəltmək cəhdləri də Azərbaycan-Ermənistan arasında münasibətlərin gərginləşmə səbəbi ola bilər. Sarkisyan hakimiyyəti belə taktikadan mütəmadi şəkildə istifadə edir. Düşünürəm ki, bununla Ermənistan özünü əsl problemlərdən sığortalaya bilməyəcək".
Məhəmmədəli QƏRİBLİ
