Ramil Hüseynov: "Nə qədər ki, bu ölkə militarist və işğalçı siyasətini davam etdirir, vəziyyət belə davam edəcək"
Bütün sahələrdə dərin böhran yaşayan Ermənistanda ictimai-siyasi vəziyyət gərgin olaraq qalır. Son dövrlər işğalçı ölkədə əhalinin sayının azaldığına dair rəsmi rəqəmləri hər gün eşidirik. Ekspertlərin son araşdırmaları göstərir ki, ölkəni tərk edənlər arasında gənclər üstünlük təşkil edirlər.
Əhalinin xaricə axını bu ölkənin təhsil sistemində xüsusilə ciddi problemlər yaradıb. Ermənistanda təhsil sahəsində vəziyyət son dərəcə acınacaqlıdır. Üstəlik, davamlı olaraq pisləşir. Təsadüfi deyil ki, bu il Ermənistanda ali məktəblərə qəbul olunmaq üçün sənəd verən abituriyentlərin sayı da azalıb. "Joxovurd" qəzetinin yazdığına görə, ötən il ali məktəblərə 17 min 649 abituriyent qəbul olunubsa, bu il rəqəm 8 min 266-ya enib. Nəticə etibarilə dövlət ali məktəblərində hələ də 11 min 375 vakant yer qalıb. Bununla yanaşı, Ermənistanda bir çox ixtisaslar sıradan çıxmaq ərəfəsindədir, çünki həmin ixtisaslara abituriyentlər sənəd vermirlər. O cümlədən, son illər ölkədə orta məktəblərin də sayı sürətlə azalır. Belə ki, il ərzində 1404 orta məktəbin sayı azalaraq 1389-a düşüb. Məktəbə gedən uşaq olmadığı üçün, məktəblər bağlanır. Abituriyentlərin sayının azalması miqrasiyanın artması ilə əlaqələndirilir. İşsizlik, səfalət və miqrasiya təhsil sistemini də iflic duruma salıb. Rəsmi statistikaya görə, işğalçı ölkədə 2017-ci ilin birinci rübündə işsizliyin səviyyəsi 19 faiz yüksəlib. Bu, ötən ilin eyni dövrü ilə müqayisədə 0,7 faiz çoxdur. Ermənistanda əmək qabiliyyətli əhalinin 228,4 min nəfəri işsizdir.
Sözügedən məsələni dəyərləndirən VİP-in sədr müavini Ramil Hüseynovun fikrincə, Ermənistanda sosial-iqtisadi vəziyyətin gərginləşməsinin başlıca səbəbi bu ölkənin işğalçılıq siyasəti yeritməsi ilə əlaqədardır: "Məsələ ondadır ki, Azərbaycan ərazilərini işğal edən Ermənistan özünü regionda təcrid edib. Artıq əhali illərdir davam edən ağır sosial-iqtisadi vəziyyətdən bezib. Gələcəyə inamları qalmadığı üçün, vəziyyətdən çıxış yolunu miqrasiya etməkdə görürlər. Ona görə də hər keçən gün ölkədə demoqrafik vəziyyət daha da pisləşir və bu özünü müxtəlif formalarda büruzə verir. Onlardan biri də məktəbə gedən uşaqların sayının azalmasıdır ki, bunun da nəticəsində məktəblər bağlanır. Bu gedişlə Ermənistanda məktəblərin sayı daha da azalacaq. Çünki bu, ölkədəki ağır demoqrafik vəziyyətlə birbaşa bağlıdır. Bu həm də o deməkdir ki, ölkəni əmək qabiliyyətli əhali tərk edir. Digər ölkələrə köç edən erməni ailələri uşaqlarının gələcəyini Ermənistanda görmürlər. Nə qədər ki, Ermənistan militarist və işğalçı siyasətini davam etdirir, vəziyyət belə davam edəcək". Vidadi ORDAHALLI
