Yeganə Hacıyeva: "Bunun üçün ən uyğun region elə Dağlıq Qarabağdır"
ATƏT-in Minsk Qrupunun ABŞ-lı həmsədri Riçard Hoqland bəyan edib ki, Rusiya ilə münasibətlərin gərgin olmasına baxmayaraq, onlar Dağlıq Qarabağ münaqişəsinin nizama salınması istiqamətində çalışırlar: "Biz anlayırıq ki, hazırda tam hərbsizləşdirmə çətindir, hərçənd bu yaxşı olardı. Amma biz yeni qarşıdurmaların başvermə ehtimalını azaltmalıyıq. Əvvəlcə hər iki tərəfdən təmmas xəttindəki snayperlər çəkilməli, beynəlxalq vasitəçilərin sayı artırılmalı və nəzarət mexanizmləri yerləşdirilməlidir".
Minsk Qrupunun həmsədrləri hesab edirlər ki, Nyu-Yorkda Azərbaycan və Ermənistan xarici işlər nazirlərinin görüşündən sonra prezidentlər səviyyəsində də görüş təşkil etmək olar. Həmsədrlər Qarabağ münaqişəsinin həlli ilə bağlı hər şeyi əhatə edən sənəd hazırlayıb.
Rusiya-ABŞ münasibətlərinin indiki gərgin anında iki ölkənin Dağlıq Qarabağla bağlı birgə məhsuldar əməkdaşlığı alına bilərmi?
Politoloq Yeganə Hacıyeva qəzetimizə açıqlamasında bildirdi ki, iki ölkə arasında doğrudan da gərginlik mövcuddur və bu, artan dinamika üzrə inkişaf edir: "ABŞ-ın yeni administrasiyası Rusiyaya qarşı əvvəlki sələfindən daha sərt mövqe ortaya qoyur. Qanunverici orqan tərəfindən Rusiyaya sanksiyalar tətbiq edilsə də, Trampın mövqeyində bir qədər tərəddüdlər nəzərə çarpır. ABŞ və Rusiyanın müəyyən regionlar üzrə razılaşdığı məqamlar var ki, münasibətlərin hansı səviyyədə olması həmin prosesə təsir etmir. ABŞ və Rusiyanın Suriya siyasətində kəsişmə, ziddiyyət olsa da, Cənubi Qafqazla bağlı bu belə deyil. Buna baxmayaraq, ABŞ gizli şəkildə həmin regionun Rusiyanın təsir dairəsindən çıxarılmasını istəyir. Bizim yürütdüyümüz balanslı siyasət kursu Azərbaycanı həmin ölkələrlə üz-üzə qoymur. Bununla yanaşı, bizim, Ermənistan və Gürcüstandan fərqli olaraq, manevr etmək imkanlarımız da var. Çünki digər iki Qafqaz ölkəsi tərəf seçimini ediblər. Bu baxımdan da hər iki tərəf Azərbaycanla normal münasibət qurmaqda maraqlıdır. Hətta Ermənistanı öz forpostu sayan Rusiya belə Azərbaycanın maraqlarını qorumağa çalışır. ABŞ-ın Dağlıq Qarabağla bağlı hər hansı bir dəyişən siyasəti yoxdur. Azərbaycanla ABŞ arasındakı münasibətlər isə normal tərəfdaşlığa əsaslanır. Dağlıq Qarabağ probleminin həlli üçün hazırda uyğun bir vəziyyət yaranıb. Rusiyada prezident seçkiləri yaxınlaşır. Suriya ilə bağlı vəziyyətin tam həll edilməməsi Putinin nüfuzuna ciddi ziyan vurur. Ukrayna məsələsi də Rusiyaya ciddi problemlər yaradır. Bu baxımdan da gərginləşmiş ABŞ-Rusiya münasibətləri fonunda Rusiyanın hardasa güzəştə gedə biləcəyini təxmin etmək olar. Bunun üçün ən uyğun region məncə, elə Dağlıq Qarabağdır. Nəsə gözləməyə dəyər".
Məhəmmədəli QƏRİBLİ
