Qabil Hüseynli: "Ermənistan bu mexanizm adı altında Azərbaycan ərazilərinin işğalını möhkəmləndirməyə çalışır"
ATƏT-in Minsk Qrupunun amerikalı həmsədri Riçard Hoqland "Amerikanın səsi" radiosunun Azərbaycan və Ermənistan xidmətlərinə müsahibəsi zamanı bildirib ki, münaqişənin həlli ilə bağlı çərçivə sazişinin mətni, onunla əlaqəli addımlar və mərhələlər mövcuddur:
"Nizamlanmanın əsasında isə regionun əhalisinə sülh, təhlükəsizlik və rifah gətirəcək, vəziyyəti demilitarizasiya edəcək kompromisin axtarılması dayanır. Mən ümid edirəm ki, prezidentlərin növbəti görüşü zamanı tərəflər həmrəylik nümayiş etdirəcək və hətta tam nizamlanma əldə olunmasa da, müəyyən addımların atıldığını elan edəcəklər".
Həmsədrin bu müsahibəsindən erməni mediası belə bir nəticə çıxarıb ki, ABŞ Dağlıq Qarabağda faktların araşdırılması mexanizminin tətbiqinə ciddi cəhd göstərəcək, hətta bunu qarşıda gələn Əliyev-Sarkisyan görüşündə müzakirəyə çıxarmağa çalışacaq.
Erməni mediasının bu təxminlərini nə dərəcədə real saymaq olar?
Politoloq Qabil Hüseynli qəzetimizə bildirdi ki, əvvəla Azərbaycan və Ermənistan prezidentlərinin görüşünün vaxtı dəqiqləşməyib: "Bu xəbəri daha çox erməni mediası yayır ki, BMT-nin sentyabr sessiyası zamanı prezidentlər Nyu-Yorkda görüşəcək. Danışıqlarda irəliləyiş yoxdursa, Azərbaycan Prezidenti erməni həmkarı ilə niyə görüşsün ki? Azərbaycan dəfələrlə bəyan edib ki, görüş xatirinə görüş keçirməkdə maraqlı deyil. Ortada konkret nəticəyə səbəb olan təmaslara isə biz hazırıq. İnsidentlərin araşdırılması mexanizminin tətbiqilə bağlı Azərbaycanın mövqeyi aydındır və dəfələrlə bunu rəsmi şəkildə bəyan da etmişik. Belə bir mexanizmin tətbiqini daha çox ermənilər istəyir.
İnsidentlərin araşdırılması mexanizmi münaqişənin həlli üçün konkret hədəf sayıla bilməz. İnsidentlər nəyə görə baş verir? Dövlət başçısı Münhen Təhlükəsizlik Konfransında əhatəli və məzmunlu çıxışı zamanı beynəlxalq auditoriya qarşısında bildirmişdi: "Sual ondan ibarətdir ki, işğal olunmuş Azərbaycan ərazilərində Ermənistan əsgərlərinin nə işi var? Erməni əsgərinin Ağdamda nə işi var? Əgər o ölmək istəmirsə, onda qoy Ağdama getməsin, olduğu yerdə qalsın, Yerevanda, Gümrüdə, öz ölkəsində qalsın". Ermənistan silahlı qüvvələri işğal olunmuş Azərbaycan ərazilərindən çıxarıldıqdan sonra insidentlər baş verməz, heç onların araşdırılmasına da ehtiyac qalmaz".
Politoloqun sözlərinə görə, Ermənistan bu mexanizmlər adı altında başqa niyyəti hədəfləyir: "Tamamilə aydındır ki, Ermənistan bu mexanizm adı altında Azərbaycan ərazilərinin işğalını möhkəmləndirməyə və ATƏT-in Minsk Qrupunun həmsədrlərinin prezidentlər səviyyəsində verdikləri bəyanatlarda qəbuledilməz və qeyri-davamlı hesab etdikləri status-kvonu saxlamağa çalışır. Biz dəfələrlə bildirmişik ki, Ermənistan qoşunlarının işğal olunmuş Azərbaycan ərazilərindən çıxarılması prosesinin tərkib hissəsi kimi insidentlərin araşdırılması mexanizmini də nəzərdən keçirməyə hazırıq".
Məhəmmədəli QƏRİBLİ
