Zaur Əliyev: "Tək xalçaların yox, əl əməyinə uyğun hazırlanan istənilən növ məhsulun üzünü çıxarıb öz adlarına çıxırlar"
Ermənilər işğal etdikləri Azərbaycan torpaqlarından öz məqsədləri üçün istifadə etməkdə davam edirlər. Onların turizmlə bağlı fəaliyyəti son vaxtlar özünü daha qabarıq büruzə verməyə başlayıb. Məqsəd də aydındır - Qarabağdakı turizmə diqqəti artırmaq, turistləri cəlb etmək.
Ermənilər bu dəfə Xankəndidə əl əməyi sərgisi keçirib. Sərgidə müxtəlif növ xalçalar, mədəniyyət nümunələri nümayiş olunub. Onu da qeyd edək ki, həmin sərgidə nümayiş olunan mədəniyyət nümunələri Azərbaycan mədəni incilərinin oxşarıdır.
Ermənilərin Xankəndidə sərgi təşkil etməsi barədə fikir bildirən siyasi elmlər üzrə fəlsəfə doktoru Zaur Əliyev "Bakı-Xəbər"ə açıqlamasında qeyd etdi ki, işğaldan sonrakı dövrdə ermənilər müxtəlif növ əl işlərinin üzünü çıxarır: "Ermənilər istənilən növ milli dəyəri təbliğ edən məhsulun üzünü çıxaran zavod açıb. Hansısa ölkənin hərracında qədim Azərbaycan xalçası çıxarılırsa, onlar onu alır. Tək xalçaları yox, əl əməyinə uyğun hazırlanan istənilən növ məhsulun üzünü həmin zavodda çıxarırlar. Beləliklə, oxşarını hazırladıqları istənilən növ əl əməyi məhsulunu öz adlarına çıxarırlar. Məsələn, XVII əsrə aid Təbriz və ya Qarabağ xalçasının ilmələrindən istifadə edirlər. Bununla onlar erməni mədəniyyətinin Qarabağda qədim olmasını dünyaya çatdırmaq istəyirlər.
Onu da deyim ki, işğal zamanı xalçalarımız fabrikdə qalıb. Ermənilər həmin xalçaların surətini çıxarıb dünyaya öz xalçaları kimi təqdim etməklə məşğuldur. Bir sözlə, ermənilər plagiatlıqla məşğuldur".
Z.Əliyev onu da qeyd etdi ki, tarixə nəzər salanda açıq-aydın görünür ki, ermənilər xalça toxunması və ya əl əməyi işləri ilə məşğul olmayıb: "Ermənilər yalnız spirtli içki istehsalı və turşu qoymaqla məşğul olub. Ermənilərin dünyaya tanıtdığı xalçaların normal səviyyədə ekspertizası aparılsa, xalçalarda olan ilmələrin Azərbaycana aid olduğu üzə çıxar. XVII əsrə aid Azərbaycan xalçaları Çexiya, Polşa, Rusiya, İran və digər xarici ölkələrin muzeylərində var. Və həmin muzeylərdə olan xalçaların ilmələri açıq-aşkar sübut edir ki, onlar qədim Azərbaycan mədəniyyəti nümunələridir".
Həmsöhbətimizin sözlərinə görə, ermənilərin Xankəndidə sərgi keçirməsinin məqsədi, əslində, turist qəbulu deyil, torpağın guya onlara aid olmasını əcnəbilərə nümayiş etdirməkdir: "Dünya xalqlarının Qarabağın tanınmasına diqqətini çəkmək istəyən ermənilər Qarabağın tarixini və mədəniyyət abidələrini nümayiş etdirmək üçün, dünya ermənilərini və digər xalqların nümayəndələrini bu ərazilərə turist gəzintilərinə dəvət edir".
Günel CƏLİLOVA
