Məhəmməd Əsədullazadə: "Bunun kökündə Ermənistanın Azərbaycana qarşı işğalçı siyasəti durur"
"Dağlıq Qarabağla bağlı məsələdə bizim məsləhətimiz danışıqların davam etdirilməsidir". Xəbər verildiyi kimi, bunu İran Xarici İşlər Nazirliyinin sözçüsü Bəhram Qasimi keçirdiyi mətbuat konfransında deyib.
O bildirib ki, İranın hər iki şimal qonşusu ilə çox yaxşı münasibətləri var: "Hər iki ölkə bizim üçün önəmlidir. Bu iki ölkənin arasında mövcud olan münaqişə və ixtilaf böyük problemdir. Bu ixtilaf uzun müddətdir var və bizim məsləhətimiz danışıqların davam etdirilməsi yolu ilə problemin həlli və Cənubi Qafqazda sabitliyin yaranmasıdır".
B.Qasimi regiondakı prosesləri diqqətlə izlədiklərini və sərhədləri nəzarətdə saxladıqlarını söyləyib: "Bu münaqişələrə görə sərhədlərimizi pozmağa icazə vermərik. Lakin digər ölkələrin müdaxiləsi ilə münaqişə alovunun genişlənməsi təhlükəsi mövcuddur".
Göründüyü kimi, İran rəsmiləri tərəfindən verilən heç bir bəyanatda işğalçı dövlətə qarşı kiçik də olsa irad və ittiham yoxdur. Yenə də münaqişə tərəfləri arasında bərabərlik işarəsi qoyulur, Ermənistanın təcavüzkar dövlət olması vurğulanmır.
Bütövlükdə, digər ölkələrin müdaxiləsi ilə münaqişə alovunun genişlənməsi təhlükəsinin mövcud olması barədə B.Qasiminin fikirləri nə dərəcədə realdır?
Sözügedən məsələni "Bakı-Xəbər"ə şərh edən politoloq Məhəmməd Əsədullazadənin fikrincə, səslənən fikirlər reallığı əks etdirmir: "İran Qarabağ münaqişəsinin nizamlanması prosesində daim regional əməkdaşlığı irəli sürür və digər ölkələrin iştirakını məqbul bilmir. İran hesab edir ki, Qərb, xüsusən də ABŞ onun sərhədləri yaxınlığındakı konfliktin həllində maraqlı deyil. Qeyd edim ki, İran işğalçı Ermənistana siyasi-iqtisadi dəstək verir. Eyni zamanda, nəfəslik rolunda çıxış edir. Ümumiyyətlə, rəsmi Tehranın yanaşması Rusiyanın mövqeyi ilə, demək olar, eynidir. İran da status-kvonun qorunmasında maraqlıdır. Fikir versək görərik ki, İran Ermənistanla çox isti siyasi münasibətlərə malikdir. Bunun kökündə, təbii ki, Ermənistanın Azərbaycana qarşı işğalçı siyasəti durur. Tehran rəsmiləri bugünkü konfliktdən məmnundur və çalışırlar ki, Azərbaycanın ərazi bütövlüyü təmin edilməsin. Yoxsa, qonşu və müsəlman ölkəsi olan İran torpaqlarımızın işğalında birbaşa iştirak etmiş Serj Sarkisyanı böyük təntənə ilə qəbul etməzdi. Hesab edirəm ki, rəsmi Tehranın siyasəti səmimi deyil və Azərbaycan Qarabağ probleminin həllində İranın bütün təşəbbüslərini ciddi qəbul etməməlidir".
Vidadi ORDAHALLI
