Akif Nağı: "Rusiyanın Ermənistana yardımı azalacaq"
ABŞ-ın Rusiyaya qarşı tətbiq etdiyi yeni sanksiyalar Ermənistan tərəfini ciddi şəkildə narahat edir. İrəvanda ABŞ-ın Rusiyaya qarşı yeni sanksiyaları və bunun Ermənistana nə kimi təsir edəcəyi müzakirə olunur. Hətta bu barədə müxtəlif formada fikir irəli sürənlər də var.
Erməni iqtisadçısı Vilen Xaçatryanın fikrincə, Ermənistanı iki təhlükə gözləyir: "Birincisi, Rusiyada işləyən miqrantların göndərdiyi pul kütləsi azalacaq. İkincisi, Rusiya iqtisadi zəifləmə fonunda işçiləri ixtisar edəcək ki, bu da ermənilərin kütləvi sürətdə ölkəyə qayıtması deməkdir. Bizim iqtisadiyyatımız bu yükü qaldıra bilməyəcək".
Rusiyada yaşayan ermənilər Ermənistana qayıtsa, bunun nə kimi təsiri ola bilər?
Qarabağ Azadlıq Təşkilatının sədri Akif Nağı "Bakı-Xəbər"ə açıqlamasında qeyd etdi ki, ABŞ-ın Rusiyaya qarşı sanksiyalar tətbiq etməsi həmin ölkənin özündə də ciddi narahatlığa səbəb olub: "Bəllidir ki, Rusiya birbaşa Ermənistana yardım edən bir dövlətdir. Ermənistan Rusiyanın himayəsindədir. Həm iqtisadi, həm də sosial baxımdan Rusiyanın himayəsindədir. Bu baxımdan Rusiyanın Ermənistana yardımı azalacaq. Bu hal Ermənistana birbaşa mənfi təsir göstərəcək".
Həmsöhbətimizin sözlərinə görə, Rusiyada xeyli erməni yaşayır: "Rusiyada yaşayan ermənilər müəyyən sahələrdə çalışırlar. Bu proses onların iş prosesinə də təsir edəcək".
A.Nağının fikrincə, Amerikanın Rusiyaya tətbiq etdiyi sanksiyalar o ölkədə yaşayan ermənilərin kütləvi qayıdışına səbəb olacaq. Ancaq QAT sədri hesab edir ki, ermənilər Ermənistana deyil, başqa ölkələrə üz tutmalı olacaq: "Çünki Ermənistan səfalət içində olan bir ölkədir. Rusiyada yaşayan ermənilər başqa ölkələrə getməyə cəhd göstərəcək".
Günel CƏLİLOVA
