Mehman Muradlı: "Azərbaycan ərazisində edilən istənilən qanunsuzluq və cinayətlə bağlı mütləq cinayət təqibi həyata keçirilməlidir"
Azərbaycanın işğal altında olan ərazilərində yerləşən Ermənistan silahlı qüvvələri təcavüzkar əməllərini növbəti dəfə davam etdirərək, iriçaplı silahlardan Azərbaycan Silahlı Qüvvələrinin cəbhəboyu mövqelərini və mülki əhalinin yaşadığı əraziləri intensiv atəşə tutmaqla, beynəlxalq humanitar hüquq normalarının tələblərini kobud surətdə pozub.
Baş Prokurorluğun mətbuat xidmətindən verilən məlumata görə, Ermənistan hərbi hissələri avqustun 8-də, saat 20 radələrində Tovuz rayonunun Ermənistanla həmsərhəd olan Qaralar kəndini iriçaplı silahlardan atəşə tutaraq mülki əhalinin qəsdən məhv edilməsi məqsədilə növbəti təxribat törədiblər. Nəticədə Qaralar kənd sakini - 2004-cü il təvəllüdlü Yusibov Ramil Sabir oğlu ot biçinindən gələrkən qəlpə xəsarətləri alaraq ağır vəziyyətdə xəstəxanaya yerləşdirilib. Həmin faktla bağlı Tovuz Rayon Prokurorluğunda Cinayət Məcəlləsinin 116.0.10 (silahlı münaqişə zamanı mülki əhaliyə və ya döyüşlərdə iştirak etməyən ayrı-ayrı mülki şəxslərə hücum etməklə beynəlxalq humanitar hüquq normalarını pozma), 29, 120.2.7-ci (iki və ya daha çox şəxsi qəsdən öldürməyə cəhd) maddələri ilə cinayət işi başlanıb, istintaq aparılır.
Qeyd edək ki, prokurorluq bundan əvvəl də baş verən analoji hallarla bağlı cinayət işləri açıb. Bu cinayət işlərinin gec-tez hansısa əhəmiyyəti olacaqmı?
Hüquqşünas Mehman Muradlı qəzetimizə açıqlamasında bildirdi ki, cinayət işlərinin açılması doğru addımdır: "Bir sözlə, hüquqi normalara uyğundur. Çünki törədilən əməllər nəticəsində əhaliyə külli miqdarda ziyan dəyir və ya insan tələfatları olur. Buna mütləq hüquqi qiymət verilməlidir. Təbii ki, burada təqsirkar olan ermənilərdir. Biz istintaq çərçivəsində onları hansısa qisimdə məsuliyyətə cəlb edə bilmərik. Ancaq bu heç də o demək deyil ki, hüquqi araşdırma aparılmamalıdır. Bunun həm də tarixi əhəmiyyəti var. Gələcək nəsillər həmin cinayət işləri ilə tanış olanda ermənilərin nə qədər vəhşi millət olduğunu görəcək. İstintaqın gəldiyi nəticəyə uyğun şəkildə günahkarların tapılıb cəzalandırılması istiqamətində beynəlxalq qurumlara müraciət olunmalıdır. Azərbaycanda ermənilərin adının keçdiyi bir çox cinayət işi var. Bu cinayət işlərilə bağlı qəbul edilən qərarlar həm də təkzibedilməz fakt xarakterini daşıyır. Azərbaycan ərazisində edilən istənilən qanunsuzluq və cinayətlə bağlı mütləq cinayət təqibi həyata keçirilməlidir. Son vaxtlar erməni tərəfi də bu praktikadan istifadə etməyə çalışır. Ancaq aydın görünür ki, onların göstərdiyi dəlillər cinayət təqibi üçün əsassızdır".
Məhəmmədəli QƏRİBLİ
