Ramil Hüseynov: "Dağlıq Qarabağ məsələsində ATƏT-in Minsk Qrupunun 25 illik səriştəsizliyi, beynəlxalq qanunların işləməməsi göz qabağındadır"
Avqustun 8-də Müdafiə Nazirliyinin mətbuat xidməti məlumat vermişdi ki, ATƏT-in fəaliyyətdə olan sədrinin şəxsi nümayəndəsinin mandatına uyğun olaraq, avqustun 9-da Ağdam rayonu Sarıcalı kəndinin yaxınlığında yerləşən Azərbaycan və Ermənistan qoşunlarının təmas xəttində növbəti monitorinqin keçirilməsi planlaşdırılır.
Sözügedən monitorinqi Azərbaycan Ordusunun nəzarətində olan ərazidə ATƏT-in fəaliyyətdə olan sədrinin şəxsi nümayəndəsi Anji Kaspşik və onun səhra köməkçisi Mixail Olaru, Ermənistan silahlı qüvvələri tərəfindən işğal edilmiş Azərbaycan ərazisində isə şəxsi nümayəndənin səhra köməkçiləri Gennadi Petrika, Oqnyen Yoviç və Martin Şusterin aparacaqları bildirilirdi.
Bu arada qondarma "DQR" guya "Artsax" və Azərbaycan Silahlı Qüvvələrinin təmas xəttində ATƏT-in monitorinq aparması barədə məlumat yayıb. Maraqlısı odur ki, ATƏT separatçı qurumun bu açıqlamasına öz etirazını bildirməyib. Nəzərə alsaq ki, separatçı qurum tanınmayıb, o zaman onların ATƏT adından bu cür danışmağa əsasları yoxdur. Bütün hallarda, ATƏT niyə bu təqdimata etiraz etmir?
Məsələyə münasibət bildirən VİP-in sədr müavini Ramil Hüseynovun sözlərinə görə, bu, ATƏT-in Dağlıq Qarabağ münaqişəsinə yanaşmada sərgilədiyi riyakarlığın göstəricisidir: "Aydın məsələdir ki, qondarma "DQR"in huquqi baxımdan bu barədə açıqlama vermək səlahiyyəti yoxdur. Ona görə ki, separatçı qurum tanınmayıb. Açıqlama verirsə, bu həm beynəlxalq, həm də yerli qanunlara ziddir. ATƏT-in adından danışılırsa, o zaman adıçəkilən qurum borcludur ki, buna öz etirazını bildirsin. Ancaq biz nəyi müşahidə edirik? ATƏT buna öz etirazını bildirmək əvəzinə, bunu görməzdən gəlir. Belə olduğu təqdirdə, əlbəttə ki, separatçı qurum bu kimi qanunazidd əməllərini bundan sonra də davam etdirəcək. Çünki Dağlıq Qarabağ məsələsində ATƏT-in 25 illik səriştəsizliyi, beynəlxalq qanunların işləməməsi göz qabağındadır. Faktiki olaraq beynəlxalq qanunlara əməl olunmur. Bunları görə-görə, ATƏT-in məlum məsələyə adekvat reaksiya verəcəyini gözləmək sadəlövhlük olar. Münaqişənin indiyə qədər həll olunmamasının günahkarlarından biri də ATƏT-in Minsk Qrupudur".
Vidadi ORDAHALLI
